मानव बेचबिखन तथा जबरजस्ती करणीको आरोपमा ३ जना पक्राउ- मधेस - कान्तिपुर समाचार

मानव बेचबिखन तथा जबरजस्ती करणीको आरोपमा ३ जना पक्राउ

शंकर आचार्य

पर्सा — युवतीलाई प्रलोभन दिई बन्धक बनाएर जबरजस्ती करणी गरेको आरोपमा प्रहरीले वीरगन्जबाट ३ जनालाई पक्राउ गरेको छ । पक्राउ पर्नेहरूमा मोरङ कटहरी गाउँपालिका ४ घर भई हाल वीरगन्ज महानगरपालिका ८ स्थित एक रेस्टुरेन्टमा काम गर्ने २५ वर्षीय सुरजकुमार साह, वीरगन्ज १६ स्थित कार्की होटलकी सञ्चालिका ४२ वर्षीया लक्ष्मी बुढाथोकी (कार्की) र जुम्ला हेमा गाउँपालिका ३ जोगीवडा टोल घर भई हाल वीरगन्ज-१६ फूलबारी टोलमा डेरा गरी बस्ने ३५ वर्षीय हरिचन्द्रनाथ योगी रहेका छन् । 

साहले जेठ ५ गते काठमाडौंकी एक २५ वर्षीया युवतीलाई विवाह गर्ने प्रलोभन देखाई वीरगन्ज बसपार्कस्थित एक होटलमा लगेर पटकपटक करणी गरेको उनलाई आरोप लागेको छ ।

त्यसपछि उनले जेठ ९ गते ती युवतीलाई होटल सञ्चालिका कार्कीको जिम्मा लगाई आफू फरार भएको प्रहरीले दाबी गरेको छ ।

प्रहरीका अनुसार कार्कीले जेठ १० गते योगीले विवाह गर्छ भनी झुक्याएर ती युवतीलाई योगीको जिम्मा लगाएकी थिइन् भने योगीले युवतीलाई आफ्नो कोठामा लगी मानसिक र शारीरिक यातना दिई पटकपटक जबरजस्ती करणी गरी कोठा बाहिर निस्कन नदिई राखेका थिए ।

शनिबार राति ९ बजेतिर ती युवती योगीको कोठाबाट भागेर आफन्तको सम्पर्कमा आएकी थिइन् । आइतबार घटनाबारे जानकारी पाएलगत्तै जिल्ला प्रहरी कार्यालयबाट खटिएका विभिन्न टोलीले वीरगन्ज महानगरपालिकाका विभिन्न स्थानबाट तीनै जनालाई पक्राउ गरेको थियो । आरोपितहरूलाई जबरजस्ती करणी र मानव बेचबिखन तथा ओसारपसार कसूरमा अनुसन्धान भइरहेको जिल्ला प्रहरी कार्यालयका प्रवक्ता डीएसपी ओमप्रकाश खनालले जानकारी दिए ।

प्रकाशित : जेष्ठ १६, २०७९ १२:११
प्रतिक्रिया
पठाउनुहोस्

बुबाको त्यो अन्तिम आशिर्वाद

हरि गौतम

रुकुम पश्चिम — उत्सव पोखरेल आइतबार बिहान जोमसोम उडान गर्ने तयारीमा थिए । पोखरा रहेका उत्सवले उडान भर्नुअघि बुबालाई फोन गरे । जाजरकोट सदरमुकाममा रहेका उत्सवका बुबा मणिरामसँग उनको छोटो कुराकानी भयो । पोखरा-जोमसोम उडान गर्ने तयारीमा रहेको जानकारी उत्सवले गराए । त्यसपछि मणिरामले ‘शुभयात्रा बाबु’ भनेर आशिर्वाद थिए । 

उत्सव पोखराबाट जोमसोमका लागि उडे । मणिराम भने आफू कार्यरत जाजरकोटकै नलगाड नगरपालिकातिर गुडे । मणिराम कार्यक्षेत्र पुग्दा नपुग्दै खबर आइपुग्यो । उत्सव सहचालक रहेको तारा एयरको विमान सम्पर्कविहीन भयो भनेर । मणिराम नगरपालिकाकै व्यवस्थापनमा नेपालगञ्ज हुँदै काठमाडौं पुगे ।

आइतबार दिनभर जहाजको केही पत्ता लागेन । सोमबार बिहान जहाज दुर्घटना भएको पत्ता लागेपछि मणिरामलगायत उत्सवको परिवार मात्रै होइन‚ गाउँ नै शोकमा डुबेको छ । ३० अप्रिल २०२१ देखि उनी तारा एयरमा जोडिएर काम गर्न थालेका उनले एक वर्षदेखि विमान उडाइरहेका थिए ।

२५ वर्षीय उत्सव चौरजहारी नगरपालिका ३ का स्थायी बासिन्दा हुन् । चौरजहारी क्षेत्रका पहिलो पाइलट उत्सवको निधनले चौरजहारीसहित सम्पूर्ण जिल्ला नै स्तब्ध बनेको छ । ‘जे नहोस् भन्ने चाहेका थियौं, त्यही भयो,’ बाबु-छोराको टेलिफोन संवाद प्रत्यक्ष सुनेका नलगाड नगरपालिका प्रमुख प्रशासकीय अधिकृत मानबहादुर गिरीले भने, ‘लाउड स्पिकरमा बाबु-छोराको संवाद सुनेको हुँ । उत्सवले उडान छ भनेपछि मणिराम सरले शुभयात्रा बाबु भन्नुभयो बुबाको त्यो आशिर्वाद नै अन्तिम भइदियो ।’

मणिराम र मानबहादुर जाजरकोट सदरमुकामको एउटा होटलमा सँगै बसेका थिए । ‘सानैदेखि पाइलट बन्ने योजना रहेको भाइ पाइलट पनि बन्यो’ नाताले उत्सवका दाइ पर्ने दिवश पोखरेलले भने, ‘तर‚ हामी सबैलाई रुवाएर कता उड्यो उड्यो ।’ तालिकाअनुसार उत्सव विभिन्न ठाउँ उड्थे । नेपालगञ्ज-हुम्ला, नेपालगञ्ज-डोल्पा, नेपालगञ्ज-रुकुम पश्चिम, नेपालगञ्ज-काठमाडौं, पोखरा-नेपालगञ्ज, नेपालगञ्ज-जोमसोम सबैतिर उनले उडान भर्थे ।

उत्सवले फिलिपिन्सबाट पाइलट कोर्स गरेका थिए । १० कक्षासम्म चौरजहारी अध्ययन गरेका उनले प्लस टुको अध्ययन काठमाडौंमा गरेका थिए । उत्सवले उडान गर्न थालेपछि उनका दाइ उमेश पनि पाइलट कोर्स गरिरहेका छन् । बुबा मणिराम र आमा उषाका दुई छोरा मात्रै हुन्- उमेश र उत्सव । मणिराम जाजरकोटको नलगाड नगरपालिकामा स्रोत व्यक्तिका रुपमा कार्यरत छन् भने आमा उषा दाङको एक विद्यालयमा अध्यापन गराउँछिन् ।

प्रकाशित : जेष्ठ १६, २०७९ ११:३६
पूरा पढ्नुहोस्
प्रतिक्रिया
पठाउनुहोस्
×