लिलामी नहुँदा कुहिँदै काठ
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
रौतहट — डिभिजन वन कार्यालय चन्द्रनिगाहपुरको मुख्य गेट छिर्नेबित्तिकै दुवै कुनातिर काठको थुप्रो देखिन्छ । यी काठ वन कार्यालयले विभिन्न समयमा बरामद गरेको हो । वर्षौंदेखि थुपारिएका काठ कुहिँदै गएका छन् । वन कार्यालयले समयमै लिलाम गर्न नसक्दा करोडौं राजस्व आउने काठ कामै नलाग्ने भएका हुन् ।
![](https://assets-cdn.ekantipur.com/uploads/source/ads/reward-900x100-pxl-2462024072414.gif)
![लिलामी नहुँदा कुहिँदै काठ](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2021/miscellaneous/kathkuhiyo10712454ka-14122021043827-1000x0.jpg&w=1001&h=0)
![](https://assets-cdn.ekantipur.com/uploads/source/ads/sathi-deposit-900-100-1262024124333.gif)
डिभिजन वनका तत्कालीन प्रमुख अर्जुन केसीको पालामा धन्सार वनक्षेत्रमा ढलापडा संकलनको नाममा ठेकेदारले नियम विपरीत सालको गोलीया टुक्र्याएर दाउरा बनाउन लाग्दा बरामद गरिएको थियो । त्यसरी बरामद गरिएको झन्डै ४ हजार क्यूफिट काठ कुहिएको छ । उक्त काठको मुद्दा चलेपछि सशस्त्र वन रक्षकको कम्पाउन्डमा राखिएको थियो । मुद्दाको छिनोफानो नहुँदा खुला स्थानमा राखिएको काठ संरक्षण अभावमा कुहिन थालेको हो । ठेकेदारले काचो सालको रुख काटेर अनियमितता गरेको पाइएको थियो ।
त्यस्तै बलरीको जंगलबाट एक सय वटा टायरगाडा सहित बरामद गरेको सालको गोलिया पनि कुहिएको छ । टायरगाडा र गोलिया एकै साथ कुहिएको हो । डिभिजन वनका निमित्त प्रमुख अमरदेव यादबले समयमै मुद्दाको छिनोफानो नहुँदा काठ लिलाम गर्न नसकिएको बताए । ‘धेरै जसो काठहरू बेबारिसे फेला पर्छन् । तस्कर फरार भएपछि मुद्दाको छिनोफानो गर्न गाह्रो हुन्छ,’ उनले भने, ‘यही कारण करौडाको काठ कुहीएको हो । अब यसको लगत तयार गर्दै छौ ।’ डिभिजन वनअन्तर्गत अहिले ८ वटा सबडिभिजनहरू छन् । सबै कार्यालयको कम्पाउन्डमा हेर्ने हो भने ठुलो परिमाणका साल, कुकाठ लगायतका गोलियाहरू कुहिएर कामै नलाग्ने भएका छन् । २०६२ सालयता झण्डै १० हजार क्युफिट काठ कुहिएको वन कार्यालयको भनाइ छ ।
बरामद काठ र सवारीहरू समयमा बिक्री गरेको भए राज्यले करोडौं राजस्व पाउने वनकै कर्मचारीहरू बताउँछन् । वनले चोरी तस्करीबाट बरामद काठ र सवारी २ लाख रुपैयाँभन्दा कम भएमा आफैले मुद्दा चलाउन सक्छ । तर मुद्दाको फैसला संघअन्तर्गतका प्रमुखले गर्ने अधिकार रहेकाले जटिल भएको वनको विकास फाटका अधिकृत मधु सिंहले बताए ।
‘वनका कर्मचारी प्रदेशको मातहतमा गए,’ उनले भने, ‘पछिल्लो समय यो कारणले पनि मुद्दाको छिनोफानो हुन सकेको छैन ।’ विभिन्न पोस्टमा चोरी निकासी र तस्करबाट बरामद काठको मुद्दा प्रशासनसित राय लिएर किनारा लगाउनु पर्ने वनका कर्मचारीहरू बताउँछन् ।
![](https://assets-cdn.ekantipur.com/uploads/source/ads/900-x-100-0172024023126.gif)