बोक्सी घटनाविरुद्ध अभियान- मधेस - कान्तिपुर समाचार

बोक्सी घटनाविरुद्ध अभियान

कान्तिपुर संवाददाता

महोत्तरी — बोक्सीको आरोपमा महोत्तरीमा कुटपिट बढ्न थालेपछि ‘मान्छे बोक्सी हुन्न कहिल्यै’ अभियान सञ्चालन गरिएको छ । राष्ट्रिय जागरण प्रतिष्ठानले कात्तिक २९ गतेदेखि १२ दिनसम्म यो अभियान सञ्चालन गरेको हो ।

यस क्रममा बोक्सी प्रथाविरुद्ध बनाइएको चलचित्र ‘अग्निदहन’ प्रदर्शन, बोक्सीको आरोपसम्बन्धी कसुर तथा सजाय सम्बन्धमा बनेको ऐनबारे जनचेतना फैलाउने गीतसंगीत देखाइएको छ । महोत्तरीमा ११ वटा र सिरहामा एउटा गरी १२ वटा जनचेतनामुलक कार्यक्रम गरिएको प्रतिष्ठानका अध्यक्ष कोविद शरण उपाध्यायले बताए । प्रतिष्ठानले महोत्तरीमा बोक्सीको आरोपमा घटना भएका स्थानमा मात्रै यो पहिलो चरणको कार्यक्रम गरेको जनाएको छ ।

चलचित्र, गीत र ऐनकानुन सबै मैथिली भाषामै तयारी गरी स्थानीयलाई जानकारी गराइएको अध्यक्ष उपाध्यायले बताए । ‘अभियानले मानिसमा बोक्सी हुन्छ भन्ने भ्रम चिरिएको महसुस गरेको छु,’ उपाध्यायले भने, ‘बोक्सी भनेको मनको डर र अन्धविश्वास पो रहेछ भनी प्रतिक्रिया धेरैको आएको छ ।’ उनले बोक्सीको आरोपमा कुटपिटका घटना न्यूनीकरणमा प्रदेश २ सरकार र स्थानीय तहको सहयोग अपरिहार्य हुने बताए ।

महोत्तरीमा दुई महिनायता मात्रै बोक्सीको आरोपमा आधा दर्जन कुटपिट र अमानवीय व्यवहार गरिएको घटना भएको छ । जिल्लाका प्रहरी प्रवक्ता डीएसपी प्रकाश विष्टका अनुसार आर्थिक वर्ष २०७७/७८ मा यहाँ बोक्सीको आरोपमा ४ वटा कुटपिटका घटना भएका थिए ।

कथित बोक्सीको आरोपमा बढिरहेका घटनाविरुद्ध अभियानले महोत्तरीमा चेतना फैलाउने काम गरेको स्थानीयले बताएका छन् । जलेश्वर–४ सुगास्थित सुकदेव माविमा चलेको बोक्सीविरुद्धको अभियानमा ‘बोक्सी हुन्छ’ भन्ने भ्रम हटाएको सुकदेव माविका प्रधानाध्यापक कृष्णचन्द्र चौधरीले बताए । कार्यक्रममा सहभागी करिब ५ सय जना व्यक्तिले अब बोक्सी आरोपमा कुनै पनि घटना नगर्ने प्रतिबद्धतासमेत जनाए । प्रदेश २ की सांसद शारदा थापाले समाजमा कुरीतिको रूपमा रहेको बोक्सी प्रथा उन्मूलन गर्न चेतनामूलक अभियानलाई निरन्तरता दिनुपर्ने बताइन् । अभियानका क्रममा प्रदर्शन गरिएको बोक्सीविरुद्धको चलचित्र ‘अग्निदहन’ ले २०७५ मा विशेष चलचित्र अवार्ड पाएको थियो ।

प्रकाशित : मंसिर १२, २०७८ ११:१५
प्रतिक्रिया
पठाउनुहोस्

जिल्ला अधिवेशन नसकिए पनि प्रदेशमा रोकिँदैनः कांग्रेस निर्वाचन समिति

कान्तिपुर संवाददाता

काठमाडौँ — नेपाली कांग्रेसको १४ औँ महाधिवेशनअन्तर्गत जिल्ला तहको अधिवेशन अहिले भइरहेको छ । जवकि प्रदेश अधिवेशनका लागि अब ४ दिन मात्रै बाँकी छ । जिल्ला अधिवेशन नसकिए प्रदेश महाधिवेशन हुने कि नहुने भनेर नेता कार्यकर्तामा अन्योल भइरहेका बेला केन्द्रीय निर्वाचन समितिले जिल्ला अधिवेशनका कारण प्रदेश अधिवेशन नरोकिने स्पष्ट पारेको छ ।

शनिबार बसेको समितिको बैठकले तोकिएकै मितिमा प्रदेश अधिवेशन पूरा गर्ने गरी तयारी अघि बढाएको हो । समितिका सदस्य गोपालकृष्ण घिमिरेले जिल्ला अधिवेशन नसकिए पनि प्रदेश महाधिवेशन नरोकिने बताए ।

‘हाम्रो प्राथमिकता जिल्ला अधिवेशन होइन । प्रदेश र केन्द्रीय महाधिवेशन हो । त्यसैले जिल्ला अधिवेशन नसकिए पनि प्रदेश अधिवेशन रोकिँदैन,’ उनले भने ।

संवैधानिक व्यवस्थाका कारण कांग्रेस मंसिर मसान्तभित्र आफ्नो प्रदेश र केन्द्रीय कार्यसमितिका पदाधिकारीको चुनाव गरेर त्यसको विवरण निर्वाचन आयोगमा बुझाइसक्नुपर्छ । निर्वाचन समितिले मसान्तभित्रै पदाधिकारीको मतपरिणाम आइसक्ने गरी निर्वाचन कार्यक्रमको तयारी अघि बढाएको छ ।

‘हामीसँग समय कम छ, त्यसैले अब त उपाय नै छैन । महाधिवेशन त गर्नैपर्ने अवस्था छ,’ घिमिरेले भने । उनले मंसिर २१ गते नै मनोनयन दर्ता भएर निर्वाचनको प्रक्रिया अघि बढाइने बताए ।

कांग्रेसको केन्द्रीय महाधिवेशन मंसिर २४ देखि २६ गतेसम्म गर्ने कार्यतालिका छ । २४ गते उद्घाटन भएपछि २५ गते नै मतदान गर्ने गरी तयारी भइरहेको समितिले जनाएको छ । केन्द्रीय महाधिवेशनअघि १६ र १७ गते प्रदेश महाधिवेशन हुदैछ । हालसम्म ३५ बढी जिल्लामा अधिवेशन भएको छ ।

प्रकाशित : मंसिर १२, २०७८ ११:१३
पूरा पढ्नुहोस्
प्रतिक्रिया
पठाउनुहोस्
×