ठोरीमा फस्टाउँदै केरा खेती- प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

ठोरीमा फस्टाउँदै केरा खेती

धान खेतमै केरा लगाउने तयारी, बजारको समस्या नभएकोले किसान ढुक्क
शंकर आचार्य

पर्सा — ठोरी गाउँपालिकाका किसान गत वर्षदेखि व्यावसायिक केरा खेतीतर्फ आकर्षित भएका छन् । यहाँका दुई किसानले मात्र हाल २१ बिघामा व्यावसायिक केरा खेती गरेका छन् । ४० वर्षीय किसान सूर्यबहादुर फिवाले ठोरी–५ सुवर्णपुरमा १७ बिघा जग्गा भाडामा लिई गत वर्षदेखि केरा खेती गरेका छन् ।

चितवनमा डेढ दशकदेखि केरा खेती गर्दै आएका फिवाले आफ्नै गाउँमा भने गत वर्षदेखि केरा खेती थालेका हुन् । चितवनजस्तै हावापानी र माटो भएकाले आफूले यहाँ पनि सम्भव देखेर एकैसाथ ठूलो परिमाणमा केरा खेती गरेको उनले बताए ।

‘मलाई चितवनमा १५ वर्षदेखि केरा खेती गरेको अनुभव छ, यहाँ पनि चितवनकै जस्तै हावापानी र माटो भएकाले केरा खेती सम्भव छ जस्तो लाग्यो,’ उनले भने, ‘जग्गा भाडामा लिएर एकैसाथ १७ बिघामा खेती सुरु गरे र सफल पनि भयो ।’

जीतपुर, हेटौंडादेखि काठमाडौंसम्म केरा सहजै बिक्री भइरहेकाले आफूलाई बजारको समस्या नरहेको उनले बताए । पहिलो वर्ष केरा खेतीमा रोगव्याधि नलागे पनि यस वर्ष धेरै पानी परेर केही क्षति पुगेको उनको भनाइ छ । ठोरी–४ विजयबस्तीमा पनि गत वर्षदेखि बुद्धलक्ष्मी श्रेष्ठले ४ बिघामा व्यावसायिक केरा खेती सुरु गरेकी छन् । निजी जग्गामै खेती गरेकाले उनले सुरुमा १ लाख ५० हजार रुपैयाँ मात्र लगानी गर्नुपरेको बताइन् । १ वर्षयता लगानी उठाइसकेकी श्रेष्ठले उत्पादित केरा हेटौंडाका व्यापारीले खरिद गर्ने गरेकाले बजारको समस्या नरहेको जानकारी दिइन् ।

१५ देखि २० दिनमा केरा काट्ने गरेको बताउँदै उनले यसरी काट्दा एक गाडी संकलन हुने बताइन् । एक पिकअप भ्यान केरा बिक्री हुँदा पनि ३२ देखि ४३ हजार रुपैयाँ कमाइ हुने गरेको छ । यसबाहेक स्थानीयस्तरमा ठोरी बजारका व्यापारीले पनि केरा खरिद गर्ने गरेको उनले बताइन् । फिवा र श्रेष्ठको अनुसरण गर्दै यस भेगका थुप्रै किसानले थोरबहुत केरा खेती सुरु गरेका छन् ।

कतिपयले माछा पोखरी डिलमा पनि ठूलो परिमाणमा केरा लगाएका छन् । थप केही किसानले धान फल्ने खेतमा पूर्णकालीन केरा खेती गर्ने तयारीमा रहेको स्थानीय रन्जित कार्कीले बताए । ‘धान खेतीभन्दा केरा खेतीबाटै लाभ हुने र यो नगदे बाली सावित हुने धेरै किसानको बुझाइ छ,’ उनले भने, ‘वीरगन्ज–ठोरी हुलाकी सडक निर्माणसँगै केरा खरिद गर्न आउने व्यापारीहरूलाई यहाँसम्म आउन सहज भएकाले किसानले उत्पादन गरेको केरालाई बजारको समस्या छैन, त्यस कारण पनि किसान निर्धक्क भएर केरा खेतीमा हात हाल्ने मनस्थिति बनाउँदै छन् ।’

प्रकाशित : आश्विन ८, २०७८ ११:५८
प्रतिक्रिया
पठाउनुहोस्

प्रदेश २ का मन्त्री शर्मा भन्छन्- 'आफ्नै कामबाट पनि सन्तुष्ट छैन'

शंकर आचार्य

पर्सा — प्रदेश २ सरकारका खानेपानी तथा उर्जामन्त्री ओमप्रकाश शर्माले आफ्नो सरकारको क्रियाकलापबाट असन्तुष्ट रहेको बताएका छन् । बिहीबार वीरगन्जमा आयोजित अन्तरक्रिया कार्यक्रममा मन्त्री शर्माले असन्तुष्टि पोखेका हुन् । ‘हामीले जनतालाई धेरै आशा, विश्वास, सपना देखाएका थियौं,’ उनले भने, ‘झण्डै साढे तीन वर्ष भयो हामी संसद्‌मा गएको, न म आफ्नै कामले सन्तुष्ट छु, न सरकारको क्रियाकलापले ।’

मन्त्री शर्माले बाराको अमलेखगन्जमा रहेको खानेपानीको समस्या समाधान गर्न पथलैयादेखि अमलेखगन्जसम्म पाइपलाइनमा पानी लान प्रयास जारी रहेको बताए । ‘मोतिहारीबाट इन्धन अमलेखगन्जसम्म लग्न सकिन्छ भने १० किमि टाढा रहेको पथलैयाबाट पानी किन अमलेखगन्ज लग्न सकिँदैन,’ उनले भने, ‘यसको लागि डीपीआर तयार गर्ने काम भइरहेको छ, अमलेखगन्जवासीको समस्या हल गर्ने हरसम्भव प्रयास जारी छ ।’

संघीय सरकारले प्रदेश २ सरकारलाई २० मेगावाट बिजुली उत्पादन गर्न बजेट दिने घोषणा गरेको लामो समय बित्दा पनि बजेट नपाएको उनले गुनासो गरे । ‘हामीले प्रदेशका विभिन्न स्थानमा सौर्य उर्जाबाट बिजुली उत्पादन गर्न ठाउँको चयन पनि गरिसकेका छौं,’ उनले भने, ‘विद्युत् प्राधिकरणको नियमावलीले प्रदेश सरकारलाई रोकेर राखेको छ ।’

मन्त्री शर्माले चुरे दोहन नरोकिए मधेसमात्रै नभई देशै नरहने चेतवानीसमेत दिए । ‘चुरे नरहे मधेसमात्र होइन’, उनले भने, ‘देशकै अन्न भण्डार मधेस तहस-नहस भएरै देशै रहने छैन ।’ उनले प्रदेशका सबै विद्यालय र एफएमहरुलाई नि:शुल्क बिजुली उपलब्ध गराउने आफ्नो प्रयास जारी रहेको समेत बताए ।

प्रदेश २ सरकारका निवर्तमान भौतिक पूर्वाधारमन्त्री तथा प्रदेशसभा सांसद जीतेन्द्र सोनलले चुरे संरक्षण केन्द्रीय सरकारको दोहोरो मापदण्ड रहेसम्म सम्भव नरहेको बताए । ‘संघीय सरकार एकातिर चुरे जोगाउ भन्छ, अर्कोतिर चुरेमा बिजुली बत्ती, खानेपानी, मेसिनरी उपकरण लगाएर सडक तथा अन्य भौतिक विकासको काम गर्छ ।’



प्रकाशित : आश्विन ७, २०७८ २०:५६
पूरा पढ्नुहोस्
प्रतिक्रिया
पठाउनुहोस्
×