सप्तरीमा ६ महिनामा तीन सीडीओ फेरिए- प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

सप्तरीमा ६ महिनामा तीन सीडीओ फेरिए

कान्तिपुर संवाददाता

राजविराज — सप्तरीमा ६ महिनामा तीन जना प्रमुख जिल्ला अधिकारी फेरिएका छन् । जिल्लाको वस्तुस्थिति बुझ्नै नपाउँदै प्रजिअ फेरिँदा शान्ति सुरक्षाको अवस्था फितलो छ । प्रशासन र अन्य सरकारी निकायबीच समन्वयमा अन्योल देखिएको छ । प्रशासनका काम पनि प्रभावित भएका छन् ।

सप्तरीमा ९ महिनाको कार्यकाल सकाएर २०७७ जेठ २० मा प्रजिअ सुनिल खनालको सरुवा भएको थियो । त्यसपछि आएका प्रजिअहरूको केही महिनाकै अवधिमा सरुवा भएको हो । खनालपछि २०७७ साल चैत १ गते प्रजिअमा फणिन्द्रमणि पोखरेल आए । उनको साढे ३ महिनामै सरुवा भयो । २०७८ असार १३ गते गृह मन्त्रालयमा सरुवा भएका पोखरेल अहिले मन्त्रालयका प्रवक्ता छन् ।

पोखरेलपछि २०७८ असार १४ मा नयाँ प्रजिअका रूपमा जयनारायण आचार्य आए । जिल्लाको अवस्था राम्ररी बुझ्न नपाउँदै उनको पनि गृह मन्त्रालयमै सरुवा भयो । आचार्य भदौ २१ गते सरुवा भएर गएका छन् । आचार्यपछि भदौ २३ देखि नयाँ प्रजिअ जनार्दन गौतम आएका छन् ।

निजामती सेवा ऐन र नियमावली विपरीत सप्तरीमा प्रजिअको सरुवा भइरहेको निजामती कर्मचारीहरूको आधिकारिक ट्रेड युनियन सप्तरीका अध्यक्ष अजयकुमार झाले बताए । ‘ऐन नियमावलीविपरीत अहिले सप्तरीमा प्रजिअको सरुवा भइरहेको छ,’ अध्यक्ष झाले भने, ‘आएका प्रजिअहरू काम थाल्छन् । कामले गति नलिँदै सरुवा हुन्छन् । यसले समग्र जिल्लाको सेवाप्रवाहदेखि शान्ति सुरक्षासम्ममा असर पर्छ ।’ उनले प्रजिअ टिक्न सके सरकारी सेवाप्रवाहलाई चुस्तदुरुस्त हुने बताए ।

प्रजिअहरूले नै राजनीतिक नेतृत्वसमक्ष लबिइङ गरेर सरुवाको माग गर्दा जिल्लामा प्रजिअहरू नटिकेको कर्मचारीहरू बताउँछन् । नागरिक सञ्जाल सप्तरीका अध्यक्ष सुखराम यादवले प्रजिअ नटिक्दा सेवाग्राहीको काममा ढिलाइ भएको बताए । ‘प्रजिअको सरुवाको लहर हेर्दा सरकारले नै निजामती ऐन नियमको खिल्ली उडाएको देखिन्छ,’ उनले भने । लगातार प्रजिअको सरुवाले जिल्ला प्रसासन कार्यालयको कामकाज मात्र होइन, समग्र जिल्लाकै सुशासनमा समस्या सिर्जना भइरहेको यादवको भनाइ छ ।

प्रकाशित : आश्विन ४, २०७८ १२:३०
प्रतिक्रिया
पठाउनुहोस्

बर्दिवासमा २३ करोडमा सांस्कृतिक भवन बन्दै

कान्तिपुर संवाददाता

महोत्तरी — महोत्तरीको बर्दिवास नगरपालिकाले २३ करोड लागतमा ४ वटा प्रशासनिक ब्लक भएको सांस्कृतिक भवन बनाउने भएको छ । भवनको पूर्वशिक्षामन्त्री गिरिराजमणि पोखरेलले शिलान्यास गरेका छन् । टेन्डर प्रक्रियाबाट ठेक्का समेत लागिसकेको भवन निर्माणको काम तत्कालै सुरु गरिने भवन निर्माण कम्पनीले जनाएको छ । 

चार वटा भवनमध्ये पहिलो भवन ६ महिनाभित्रै बनाइसक्ने निर्माण कम्पनी एमएस पाइनस ओम नीलकण्ठेश्वरका प्रमुख कृष्ण खत्रीले बताए । ९ करोड ३७ लाखमा लिएको ठेक्काअन्तर्गत नगरपालिकाको ४ वटा प्रशासनिक भवन २४ महिनाभित्र सक्ने सम्झौता भएको निर्माण कम्पनीले जनाएको छ ।

रामजानकी गुठी र बर्दिवासका स्थानीय व्यक्तिले दान गरेको झन्डै २ बिघा जग्गाभित्र प्रशासनिक भवन बनाउन लागिएको नगरपालिकाका प्रमुख विदुरकुमार कार्कीले जानकारी दिए । प्रविधिमैत्री मात्रै नभएर जनजाती, मधेसी र आर्यखसको समेत संस्कृति झल्किने कलात्मक सांस्कृतिक भवन बनाउन लागिएको उनको भनाइ छ ।

महोत्तरीबाट प्रतिनिधिसभा सदस्य तथा पूर्वशिक्षामन्त्री पोखरेलले विकास, स्वास्थ्य, सुरक्षा र शैक्षिक हबका कारण बर्दिवास छिट्टै उपमहानगरपालिका बन्ने बताए । त्यसैले ५० वर्षपछिको बर्दिवासको समेत परिकल्पना गर्दै प्रशासनिक भवन बनाउन उनले आग्रह गरे ।

प्रकाशित : आश्विन ४, २०७८ १२:२९
पूरा पढ्नुहोस्
प्रतिक्रिया
पठाउनुहोस्
×