नगर प्रमुख र अधिकृतलाई अवहेलना मुद्दा- प्रदेश २ - कान्तिपुर समाचार

नगर प्रमुख र अधिकृतलाई अवहेलना मुद्दा

कान्तिपुर संवाददाता

धनुषा — धनुषाको हंसपुर नगरपालिकाका प्रमुख रामज्ञान मण्डल र प्रमुख प्रशासकीय अधिकृत रामलोचन मण्डललाई उच्च अदालत जनकपुरले आदेश पालना नगरेको भन्दै अदालतमा उपस्थित हुन आदेश दिएको छ ।

नगरपालिकामा सरुवा भएका प्रमुख प्रशासकीय अधिकृत केशवकुमार अधिकारीलाई हाजिर गर्नबाट रोक लगाएको भन्दै उनीहरूविरुद्ध अवहेलना मुद्दा परेको हो ।

अधिकारीलाई संघीय मामिला तथा सामान्य प्रशासन मन्त्रालयले साउन २८ गते हंसपुरमा खटाएको थियो । अदालतले भदौ ९ गते अधिकारीलाई हाजिर गर्नबाट रोक लगाउने कार्य नगर्नू–नगराउनू भन्दै नगरपालिकाको नाममा अन्तरिम आदेश जारी गरेको थियो ।

तर नगर प्रमुख र प्रमुख प्रशासकीय अधिकृतले अधिकारीलाई हाजिर हुन नदिई अदालतको आदेश अवेहलना गरेको ठहर गर्दै भदौ २३ गते न्यायाधीश हरिप्रसाद वाग्ले र रमेश ढकालको संयुक्त इजलासले उनीहरूलाई उपस्थित हुन आदेश दिएको हो । अवहेलना मुद्दाबारे आफ्नो व्यहोरा र प्रमाणसहित ७ दिनभित्र बयानका लागि उपस्थित हुन उच्च अदालतले आदेश दिएको छ ।

अदालतले अन्तरिम आदेश जारी गरे पनि अधिकारीलाई उपस्थित नगराउनु नगरपालिकाले लिखित रूपमा नै ठाडै अदालतको आदेशलाई चुनौती दिएको देखिएको उच्च अदालतले ठहर गरेको छ । मन्त्रालयको निर्णयअनुसार सरुवा भएर आए पनि हाजिर हुन नदिएपछि नगरपालिकालाई विपक्षी बनाएर अधिकारीले उच्च अदालतमा रिट निवेदन दायर गरेका थिए ।

प्रकाशित : भाद्र ३०, २०७८ १०:५६
प्रतिक्रिया
पठाउनुहोस्

दार्चुलाका विद्यालय खुले

कान्तिपुर संवाददाता

दार्चुला — कोरोनाका कारण बन्द रहेका दार्चुलाका विद्यालय सञ्चालन हुन थालेका छन् । जिल्लाका केही स्थानीय तहबाहेक अधिकांश ठाउँका विद्यालयमा पढाइ सुरु भएका छन् । जिल्लामा भदौ २० गते दुहु गाउँपालिकाका विद्यालयमा पर्ढा सुरु भएको हो । 

अहिले महाकाली नगरपालिका, अपी हिमाल, मालिकार्जुन, लेकम, गाउँपालिका र शैल्यशिखर नगरपालिकाले विद्यालय सञ्चालनमा ल्याई पढाइ सुरु गरिएको नेपाल शिक्षक महासंघका जिल्ला अध्यक्ष राजेशसिंह सामन्तले बताए । व्यासलगायत केही स्थानीय तहका विद्यालय सञ्चालनमा आउन बाँकी छन् । केही स्थानीय तहमा विद्यालयमा भौतिक रुपमा पढाई सुरु गर्न निर्णय भइसकेको र सञ्चालनमा आउन बाँकी रहेको उनको भनाइ छ ।

भदौ २० गते बसेको जिल्ला कोभिड–१९ संकट व्यवस्थापन समितिको बैठकले स्वास्थ्य मापदण्डको अनिवार्य पालना गरी विद्यालय सञ्चालन गर्न सकिने निर्णय गरेको थियो । विद्यालय सञ्चालन गर्दा सरकारद्वारा जारी स्मार्ट लकडाउनभित्र रहेर सञ्चालन गर्न पाइने जनाइएको थियो । त्यस निर्णयलाई टेकेर अहिले जिल्लाका सबै स्थानीय तहहरूले विद्यालय संचालनमा ल्याउने निर्णय गरिसकेका छन् । महाकाली नगरपालिका कार्यपालिकाको निर्णयको आधारमा स्वास्थ्य मापदण्डको पूर्ण पालना गरेर विद्यालय सञ्चालनमा ल्याइएको राष्ट्रिय मावि दत्तुका प्रधानाध्यापक समेत रहेका शिक्षक महासंघका अध्यक्ष सामन्तले बताए । उनले भन,े ‘विद्यार्थीको भौतिक दुरी, मास्क र सेनिटाइजरको अनिवार्य प्रयोग गर्न विद्यार्थीहरूलाई भन्दै आएका छौं ।’ अभिभावकहरूलाई आफ्ना बालबालिकालाई मास्क लगाएर विद्यालय पठाउन अनुरोध गरिएको उनको भनाइ छ ।

पछिल्लो समय कोरोना संक्रमणको दर कम हुँदै गएपछि समितिले विद्यालय सञ्चालन गर्न स्थानीय तहलाई जिम्मेवारी तोकेको थियो । शैक्षिक गतिविधिलाई सहज बनाउन यस्तो निर्णय गरिएको जिल्ला कोभिड–१९ संकट व्यवस्थापन समितिका अध्यक्ष एवं प्रमुख जिल्ला अधिकारी सिद्धराज जोशीले बताए ।

प्रकाशित : भाद्र ३०, २०७८ १०:३६
पूरा पढ्नुहोस्
प्रतिक्रिया
पठाउनुहोस्
×