तराईका ५ जिल्लामा जसपा ठाकुर समूहको भेला - प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

तराईका ५ जिल्लामा जसपा ठाकुर समूहको भेला 

लक्ष्मी साह

बारा — निर्वाचन आयोगबाट जनता समाज पार्टीको आधिकारिकता गुमाएका महन्थ ठाकुर समूहले जनमत जुटाउन तराईका पाँच जिल्लामा शुक्रबार भेला गरेको छ । प्रदेश २ को बारा, महोत्तरी, सिराहा, सप्तरी र पश्चिमको दाङ जिल्लामा भेला आयोजना गरिएको हो । कलैयामा आयोजित भेलामा महन्थ ठाकुर, लक्ष्मणलाल कर्ण, जितेन्द्र सोनललगायत ठाकुर पक्षीय नेता, कार्यकर्ताको बाक्लो उपस्थिति रह्यो ।

नेता जितेन्द्र सोनलकाअनुसार सम्पूर्ण लोकतन्त्रवादी, पहिचानवादी, मधेसवादी शक्तिहरुलाई संगठित गरेर चुनावमा सहभागी हुने रणनीतिका साथ अघि बढ्न अगुवा भेलाको अभियान सुरु गरिएको छ ।

‘हाम्रो आधिकारिताबारे सर्वोच्चमा मुद्दा जारी छ, फैसला नभएसम्म हामी पनि जसपा नै हौं,’ सोनलले बाराको कलैयामा भएको भेलामा भने, ‘सांगठनिक, संघर्ष र चुनावी मोर्चा गरेर अगाडि बढ्दै छौं ।’ देशमा चुनावी माहौल बन्दै गएकोले हामी मोर्चाबन्दी गर्न खोजिरहेको उनले बताए ।

भेलामा लक्ष्मणलाल कर्णले जसपा आधिकारिताका लागि हाम्रो कानुनी लडाइँ जारी रहेकोले कार्यकर्तालाई विचलित नहुन आग्रह गरे ।

प्रकाशित : श्रावण २२, २०७८ १७:१४
प्रतिक्रिया
पठाउनुहोस्

अमलेखगन्जवासीलाई खोलाकै पानीको भर

लक्ष्मी साह

अमलेखगन्ज, बारा — चुरेको फेदमै छ अमलेखगन्ज गाउँ, जहाँ करिब १० हजार जनाको बसोबास छ । तर उनीहरू वर्षौंदेखि खोलाकै पानी पिउन बाध्य छन् । हाल मोदन र बिजौरी खोलाका ५ स्थानबाट ल्याइएको पानी गाउँभरि वितरण गरिएको छ । वितरण गर्दा प्रशोधन नगरी खोलाबाट आएको धमिलै पानी घरघरमा पुग्ने गर्छ ।

जितपुर सिमरा उपमहानगरपालिका–२१ र २२ को यो गाउँका २० परिवारमा त यही खोलाको पानीसमेत पुगेको छैन । उनीहरू भने पर्सा राष्ट्रिय निकुञ्जबाट बग्ने खोलाको पानीबाटै गुजारा धानिरहेका छन् ।

साबिक अमलेखगन्ज गाविसका तत्कालीन अध्यक्ष ५५ वर्षीय भरत घलेका अनुसार राणा प्रधानमन्त्री देवशमशेरको पालामा यहाँ २४ लाख लिटर पानी अटाउने ट्यांकी निर्माण गरिएको थियो । सवा सय वर्ष भइसक्दा पनि पानीका लागि अहिले पनि यही ट्यांकीकै भर हो । ‘भारतको मोतिहारीबाट रक्सौल हुँदै जमिनमुनि पाइप राखेर ६९ किमि पर अमलेखगन्जमा इन्धन आयो । तर ७ किमि दक्षिणमा पर्ने छिमेकी गाउँ पथलैयाबाट पिउने पानी पाइपबाट ल्याउन सकिएको छैन,’ घलेले भने ।

बर्खा र पहिरोले खोलाको पाइप बगाउने समस्याले कहिलेकाहीँ वितरण भइरहेको पानीसमेत नआउँदा हाहाकार हुने गरेको उनले बताए । ‘अब डिप बोरिङको विकल्प छैन, यो तालले हाम्रा पनाति खलकले पनि जमिनमुनिको पानी पिउलान् भन्ने आश छैन,’ उनले भने, ‘तुइन हटाउन, ठुल्लठूला भवन र पूर्वाधार बनाउने सरकारले अमलेखगन्जमा डिप बोरिङ गाडेर बाँच्ने आधार पानीको व्यवस्था गर्न गरेन ।’

अमलेखगन्जस्थित सैनिक शिक्षालय, नेपाल आयल निगम प्रदेश २ को प्रादेशिक कार्यालयमा समेत यही पानी पुग्छ । निगमको प्रादेशिक कार्यालय प्रमुख प्रदीप यादवले भने, ‘खर्च र काम गर्ने योजना ल्याउन सके हजारौं अमलेखगन्जवासीले बोरिङको पानी पिउन सक्छन् ।’

मोदन खोलाको पानी आपूर्ति हुँदै आएको सैनिक शिक्षालयमा पनि पिउने पानीको बिजोग छ । स्थानीय मुन्नेकाजी मगरका अनुसार सैनिक शिक्षालयका अधिकारीहरूले बोरिङ गाड्न गाउँलेलाई गुहार्दै आएका छन् । ‘सरकारले अमलेखगन्जवासीलाई बोरिङको पानी पिउने सपना कहिले पूरा गर्छ, ठेगान छैन,’ उनले भने, ‘अमलेखगन्ज, गाउँबाट उपमहानगर भएर आफैं स्थानीय सरकार भइसक्यो तर यहाँ पानी आएन ।’

केही वर्षयता आर्थिक रूपमा सम्पन्न परिवारले अन्तैबाट ट्यांकर र जारको पानी ल्याएर प्रयोग गर्दै आएका छन् । अमलेखगन्जकै स्थानीयसमेत रहेकी प्रदेश २ की प्रदेशसभा सदस्य सीता गुरुङले पथलैयाबाट पानी ल्याउने योजना प्रदेश सरकारबाट पारित गराउने प्रयास भइरहेको बताइन् । ‘डिप बोरिङका लागि प्रयास गरे पनि सम्भव भएन,’ उनले भनिन्, ‘पानीको सतह धेरै गहिरो भएकाले बोरिङ गाड्न सम्भव भएन । १ सय ५० फिटसम्म पानी भेटिएन ।’

खानेपानी तथा सरसफाइ कार्यालय बाराका प्रमुख जकी अहमदले भौगर्भिक तथा जलवायुसम्बन्धी विज्ञबाट पानीको सम्भाव्यता अध्ययन भइरेहको दाबी गरे । ‘तर पूरा भइसकेको छैन । यहाँ सफल नभए पथलैयाबाट पाइप तानेर पानी लैजाने प्रदेश सरकारको योजना छ,’ उनले भने, ‘यो योजनाको टुंगो अबको २ महिनाभित्र लाग्छ ।’

प्रकाशित : श्रावण २२, २०७८ १२:१९
पूरा पढ्नुहोस्
प्रतिक्रिया
पठाउनुहोस्
×