लखन्देही खोलाले तटबन्ध भत्कायो - प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

लखन्देही खोलाले तटबन्ध भत्कायो 

ओमप्रकाश ठाकुर

सर्लाही — सर्लाहीको मध्यभाग भएर बग्‍ने लखन्देही खोलाले जिल्लाको तीन स्थानमा बाँध भत्काएको छ । बाँध भत्किएपछि खेतीयोग्य जमिन कटान गर्दै खोला बस्तीतर्फ सोझिने खतरा बढेको छ । नदी कटानले जिल्लाका आधा दर्जन बस्ती उच्च जोखिममा छन् ।

चक्रघट्टा गाउँपालिका–१ शिवनगरस्थित लखन्देही खोलाले बाँध भत्काएर खेतीयोग्य जग्गा कटान गरेको छ । नदी कटानले शिवनगरसहित बिनगरा, मदनपुर र पडरियालगायतका बस्ती उच्च जोखिममा छन् । यस्तै, कौडेना गाउँपालिका–७ सक्रौलको बाँध पनि भत्किएको छ । मलंगवा नगरपालिका–५ भाँड्सरमा पनि लखन्देहीले बाँध भत्काएको प्रमुख जिल्ला अधिकारी रामकुमार महतोले जानकारी दिए ।

खोलाले बाँध भत्काएको स्थानमा प्रजिअसहितको सुरक्षा टोली बिहीबार स्थलगत निरीक्षणमा पुगेका थिए । टोलीमा जनताको तटबन्ध कार्यालय प्रमुखको पनि उपस्थिती रहेको थियो ।

बाँध भत्काएर खोलाले कटान गरिरहेको क्षेत्रमा तत्काल अस्थायी बाँध निर्माणका लागि स्थानीय तह, जलस्रोत र सिचाइँ विभागसँग पनि समन्वय भइरहेको प्रजिअ महतोले बताए । उनले तत्काल बाँध मर्मतको अश्वासन पाएको जानकारी दिए । प्रजिअ महतोले तटबन्ध कार्यालयसँग बजेट नभएपनि बाँध मर्मतका लागि प्रयोग हुने बोरा लगायतको सामग्री रहेकाले स्थानीय तह र प्रहरीको सहयोगमा बाँध भत्किएको स्थानमा मर्मतको कार्य सुरु गरिने जानकारी दिए ।

‘लखन्देहीले जिल्लाको तीन स्थानमा बाँध भत्काएको छ, खोलाले कटान पनि तीव्र गतिमा गरिरहेको छ,’ उनले भने, ‘विभिन्न निकायसँग समन्वय गरेर तत्काल मर्मतको कामअघि बढाउँदै बस्तीलगायत खेतीयोग्य जग्गा कटान हुनबाट जोगाउने प्रयासमा छु ।’

प्रकाशित : श्रावण ७, २०७८ १६:५३
प्रतिक्रिया
पठाउनुहोस्

तालमा डुबेका युवकको शव फेला

ओमप्रकाश ठाकुर

सर्लाही — सर्लाहीको वाग्मती नगरपालिका–१२ स्थित नवनिर्मित तालमा बेपत्ता भएका युवकको शव २६ घण्टापछि फेला परेको छ । हिलोमा गाडिएको अवस्थामा शव फेला परेको प्रहरीले जनाएको छ । शनिबार तालमा माछा मार्न गएका वाग्मती–१ का १८ वर्षीय सुशान्त थापा अपराह्न ४ बजेदेखि बेपत्ता भएका थिए । 

सर्लाहीको वाग्मती–१२ स्थित तालमा बेपत्ता युवकको खोजी गरिँदै । तस्बिर : ओमप्रकाश/कान्तिपुर


बेपत्ता युवक पत्ता लगाउन बाहिरबाट गोताखोरको टोलीसमेत बोलाइएको थियो । टोली नआइपुग्दै कम्प्रेसर मेशिनको सहयोगले युवकको शव फेला पारिएको जिल्लाका प्रहरी उपरीक्षक संतोष सिंह राठौरले जानकारी दिए । ‘निरन्तरको प्रयासमा पनि बेपत्ता युवकको खोजी गर्न समस्या भइरहेको थियो, हिलोमा खोज्ने सुरक्षाकर्मीलाई हम्मेहम्मे नै पर्‍यो,’ उनले भने । युवकको शव पोस्टमार्टम गरी आफन्तलाई जिम्मा लगाइने प्रहरी उपरीक्षक राठौरले बताए ।

युवकका दाजु हस्तबहादुरले ताल सुरक्षित नरहेकै कारण भाइ बेपत्ता भएको आरोप लगाए । अव्यवस्थित ताल भएका कारण यसको क्षतिपूर्ति नगरले बेहोर्नुपर्ने उनको माग छ । ‘ठूलो र गहिरो ताल सुरक्षित हुन जरुरी छ, सुरक्षित नभएकै कारणले यस्तो घटना भयो । भोलिका दिनमा यस्ता घटना नदोहोरिएला भन्न सकिन्न,’ उनले भने, ‘भाइको उद्धारका लागि तत्काल प्रयास पनि हुन सकेन, प्रयास गरेको भए यो घटना हुने थिएन ।’ छोराको खबरले बुबाआमा घरमै अर्धचेत अवस्थामा छन् । वाग्मती नगरपालिका–१ मिलन चोकका गोपालसिंह थापा र टीकाका कान्छा छोरा सुशान्त एसईई दिने तयारीमा थिए ।

नगरपालिकाले पर्यटक भित्र्याउने उद्देश्यले १ सय २१ बिघामा गहिरो ताल खनेको छ । निर्माणाधीन ताल रहेकाले यसको सुरक्षाको प्रबन्ध मिलाउन नसकिएको नगरले जनाएको छ । वैशाखमै ताल खन्ने काम सकिएपछि वाग्मती नदीको पानी हालिएको थियो । झन्डै डेढ महिना पानी हाले पनि एक दिन मुहान थुन्दा रातभरिमै सुकेको थियो । दोस्रोपटक बाढीको समयमा लेदो माटोसहितको पानी पसाउने योजनाअनुरूप तालमा पानी हाले पनि फेरि अधिकांश भाग सुकेको छ ।

नवनिर्मित तालमा अहिले आन्तरिक पर्यटक घुमफिरका लागि पुगिरहेका छन् । पानी कम भएसँगै स्थानीय माछा मार्न पनि आइरहेका छन् । तर अव्यवस्थित तालका कारण यसको तल्लो बस्ती जोखिममा छ । झन्डै दुई साताअघि वर्षाले तालको पानी निस्केर सागरनाथ वनको जग्गा कटान गरेको थियो । निकास नभएर बाटो र पुल पनि बगाएको थियो । स्थानीयको विरोधपछि नगरपालिकाले बाटोको मर्मत गरेको छ ।

प्रकाशित : श्रावण ४, २०७८ ०९:३०
पूरा पढ्नुहोस्
प्रतिक्रिया
पठाउनुहोस्
×