कोरोना रोकथामका लागि प्रदेश २ मा बढाइयो सतर्कता
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
जनकपुर — कारोना संक्रमण फैलिन नदिन प्रदेश–२ स्थित स्वास्थ्य निर्देशनालयले मातहतका स्वास्थ्य संस्थाहरुलाई निर्देशन जारी गरेको छ । गत आइतबार पर्सामा कोरोना संक्रमित फेला परेपछि कोरोनाको दोस्रो चरण आउन सक्ने अनुमान गरी यस्तो निर्देशन जारी गरिएको हो ।
![](https://assets-cdn.ekantipur.com/uploads/source/ads/ekantipur-1-1282024082932.gif)
![कोरोना रोकथामका लागि प्रदेश २ मा बढाइयो सतर्कता](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2020/miscellaneous/corona-1-2932020040859-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
प्रादेशिक स्वास्थ्य निर्देशक विजयकुमार झाका अनुसार चैत ९ गते प्रदेश भित्रका सरोकारवालाहरुको बैठक बसी मातहतका अस्पताल र हेल्थ पोष्टहरुलाई जनस्वास्थ्यका विधिहरु अपनाउन तथा आआफ्ना स्वास्थ्य संस्थामा तयारी अवस्थामा रहन निर्देशन जारी गरिएको हो ।
‘होलीमा सामूहिक जमघट बढ्छ । पर्व मनाउन भारतबाट पनि धेरै जना फर्किन्छन् । यस्तोमा संक्रमण बढ्न सक्छ । प्रथम चरणमा जनस्वास्थ्यका विधिहरु अपनाउन निर्देशन दिएका हौं’ झा कान्तिपुरसँग भने ।
होलीपछि मुख्यमन्त्रीको अध्यक्षतामा रहेको प्रदेशस्तरीय कोरोना नियन्त्रण तथा निर्देशन समिति बैठक बस्ने जानकारी पनि निर्देशक झाले दिए । उनका अनुसार प्रदेश सरकारले प्रत्येक पालिकामा न्युनतम ५ शय्याको अस्थायी कोरोना अस्पताल निर्माण गर्न बजेट पठाइसकेको छ । सामान्य लक्षण भएका संक्रमितहरुलाई सम्बन्धित पालिकामै उपचार गर्ने रणनीति प्रदेश सरकारको छ । तर अधिकांश पालिकाले भने हालसम्म अस्थायी कोरोना अस्पताल निर्माण गरेका छैनन् ।
प्रदेश–२ का अधिकांश जिल्लामा जिल्लास्तरीय कोरोना नियन्त्रण समन्वय समितिको बैठक बसी क्वारेन्टीन र आइसोलेसन व्यवस्थापन विषयमा छलफल भएको जानकारी पनि उनले दिए ।
कोरोना जाँच गर्न प्रदेश २ का आठवटै जिल्ला अस्पतालमा आरटी पीसीआर मेसिन जडान भइसकेकोले स्वाब संकलन गर्ने समस्या नहुने उनले बताए । प्रदेश–२ मा हालसम्म १७ हजार २ सय २९ जना संक्रमित भएका छन् । तीमध्ये २ सय ९ जनाको मृत्यु भएको छ । चैत महिनामा २६ वटा संक्रमित फेला परेको उनले जानकारी दिए ।
![](https://assets-cdn.ekantipur.com/uploads/source/ads/900-x-100-1-0282024055738.gif)