केराबारीमा सर्पदंश उपचार केन्द्र स्थापना- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

केराबारीमा सर्पदंश उपचार केन्द्र स्थापना

कान्तिपुर संवाददाता

सुनसरी — मोरङको केराबारी गाउँपालिकामा स्थापित सर्पदंश उपचार केन्द्र बुधबारदेखि सञ्चालनमा आएको छ । वडा ६ याङ्शिलामा सर्पदंशको उपचार सेवा केन्द्र सञ्चालन गर्न ४१ लाख रुपैयाँभन्दा बढीको भवन निर्माण गरिएको निर्माण समितिका संयोजक प्रकाश श्रेष्ठले बताए । 


नेपाल सरकारको स्वास्थ्य सेवा विभागबाट अनुमति लिएर केराबारीको याङ्शिलास्थित कालोपानीमा सर्पदंश उपचार केन्द्र सुरु भएको हो । धरानको बीपी कोइराला स्वास्थ्य विज्ञान प्रतिष्ठानले पनि सर्पदंशको उपचार सेवा दिने भए पनि औषधि उपचारमा महँगो शुल्क लाग्ने गरेको छ ।

केन्द्रले नि:शुल्क उपचार सेवा दिने छ । केराबारीमा उपचार केन्द्र सञ्चालनमा आएपछि उतरी मोरङको पहाडी क्षेत्र र छिमेकी धरान उपमहानगरपालिकाका बिरामी लाभान्वित हुने छन् । केन्द्रमा आकस्मिक कक्ष, अन्तरंग सेवा, वैठक कक्ष, ड्युटी रुम र स्टोर रुम रहेका छन् । आकस्मिक कक्षमा ३ वटा बेड राखिएको छ ।

गाउँपालिकाले सरकारी ऐलानी पर्ती जग्गा सर्पदंशका उपचार सेवाका लागि ५ कट्ठा जग्गा उपलब्ध गराएपछि १ नम्बर प्रदेश सरकारको सामाजिक विकास मन्त्रालयबाट २२ लाख रुपैयाँ, केराबारी गाउँपालिकाबाट १७ लाख रुपैयाँ, धरान उपमहानगरपालिकाबाट २ लाख रुपैयाँ र विभिन्न संघसंस्थाको सहयोगमा भवननिर्माण गरिएको निर्माण समितिका संयोजक श्रेष्ठले बताए ।

प्रकाशित : मंसिर ८, २०७८ १८:५३
प्रतिक्रिया
पठाउनुहोस्

‘जनगणनामा छुट्नु भयो कि ! ११७८ नम्बरमा डायल गर्नुस्’

कान्तिपुर संवाददाता

काठमाडौँ — केन्द्रीय तथ्यांक विभागले जनगणनामा कसैको नाम छुटेमा नजिकको जनगणना कार्यालय, वडा कार्यालय वा जिल्ला प्रशासन कार्यालयमा सम्पर्क गर्न आग्रह गरेको छ ।

जारी १२औं राष्ट्रिय जनगणनाको अन्तिम दिन बिहीबार (मंसिर ९ गते) सकिनै लाग्दा विभागले कसैलाई नछुट्न आह्वान गरेको हो । ‘जनगणनाको अन्तिम दिनसम्म कोही छुट्नु भयो भने ११७८ नम्बर सम्झिनुहोस्,’ विभागका निर्देशक ढुण्डिराज लामिछानेले भने, ‘कोही छुट्नु भएको छ भने नजिकको जनगणना कार्यालय, वडा कार्यालय, जिल्ला प्रशासन कार्यालयमा सम्पर्क गर्नुहोस् ।’

उक्त नम्बरमा सम्पर्क गर्दा पैसा नलाग्नेसमेत निर्देशक लामिछानेले बताए । यस्तै अनलाइन पहुँच भएकाले आयोगको वेबसाइटमा गुनासो फाराम भरेर जनगणना गराउन सकिने उनले जनाए ।

कात्तिक २५ गतेबाट सुरु भएको जनगणनामा करिब ४० हजार गणक र ८ हजार ५ सय सुपरिवेक्षक कर्मचारी खटिएका छन् । विभागका अनुसार देशभर ७० लाख घरपरिवार र ३ करोडभन्दा बढी जनसंख्या छ ।

प्रकाशित : मंसिर ८, २०७८ १८:५०
पूरा पढ्नुहोस्
प्रतिक्रिया
पठाउनुहोस्
×