तीन दिनदेखि वेपत्ता युवक मृत अवस्थामा भेटिए- प्रदेश १ - कान्तिपुर समाचार

तीन दिनदेखि वेपत्ता युवक मृत अवस्थामा भेटिए

डिल्लीराम खतिवडा

उदयपुर — उदयपुरको त्रियुगा नगरपालिका – १२ का एक युवकको मृत अवस्थामा शव फेला परेको छ । तीन दिनदेखि हराइरहेका २८ वर्षीय मनोज सदाको शव निमुवा दोभानमा भेटिएको हो ।

स्थानीय दिपनारायण सदाका छोरा मनोज तीन दिनदेखि घरबाटै हराएर वेपत्ता भएका थिए । खोजतलास गर्ने क्रममा बिहीबार त्रियुगा नगरपालिका –२ सनुवाखोलास्थित निमुवा दोभानमा मृत अवस्थामा फेला परेको जिल्ला प्रहरी कार्यालय उदयपुरका निमित्त सूचना अधिकारी प्रहरी निरीक्षक मोहन थापाले जानकारी दिए ।

शवलाई कानुनी प्रक्रिया पूरा गरी पोष्टमार्टमका लागि अहिले जिल्ला अस्पताल ल्याइएको छ । घटनाको थप अनुसन्धान भइरहेको प्रहरीले जनाएको छ ।

प्रकाशित : जेष्ठ १२, २०७९ १८:२६
प्रतिक्रिया
पठाउनुहोस्

नेपाल-भारत जोड्ने दुई झोलुंगे पुल सञ्चालनमा

मनोज बडू

दार्चुला — महाकालीमा नेपाल–भारत जोड्ने दुई झोलुंगे पुल सञ्चालनमा आएका छन् । व्यास गाउँपालिका–६ बडूगाउँ र मालिकार्जुन गाउँपालिका–६ बाकुमा निर्माण सम्पन्न भएका दुई पुल बिहीबार उद्घाटन गरिएको हो ।

सरकारको तुइन विस्थापन कार्यक्रम अन्तर्गत महाकाली नदीमा निर्माण गरिएका दुई वटा झोलुंगे पुल सञ्चालनमा आएसँगै स्थानीयको वारिपारिको यात्रा सहज हुने अपेक्षा गरिएको छ ।

नागरिकको सहजताका लागि निर्माण सम्पन्न दुवै पुलहरू नेपाल र भारतका अधिकारीहरुको उपस्थितिमा उद्घाटन गरिएको हो । एकै योजनामा निर्माण सम्पन्न सीमा पुल सञ्चालनमा ल्याउन यसअघि नै निर्णय भइसकेको हुनाले त्यसै कार्यक्रम अनुसार पुलहरु सञ्चालनमा ल्याइएको प्रमुख जिल्ला अधिकारी दिर्घराज उपाध्यायले बताए ।

महाकाली नदीमाथि तुइन र ट्युब विस्थापन गर्ने भनेर स्थानीय पूर्वाधार विकास तथा कृषि सडक विभागअन्तर्गत सस्पेन्सन ब्रीज डिभिजनले चार स्थानमा झोलुंगे पुल निर्माणको ठेक्का पाएको थियो ।

जसअन्तर्गत बडूगाउँ र बाकुमा गत फागुनमै झोलुंगे पुल निर्माण सम्पन्न भएका थिए । बाकुमा पुल बाहेक अन्य संरचना निर्माणमा लामो समय लागेको हुनाले संचालनमा ढिलाइ भएको जनाइएको छ ।

त्यस्तै व्यास गाउँपालिका–४ मडगाउँमा पनि नेपाल–भारत जोड्ने झोलुंगे पुल माघ तेस्रो साता निर्माण सम्पन्न भइसकेको छ । तर अन्य भौतिक संरचना निर्माण कार्य भइरहेका छन् । यस्तै व्यास गाउँपालिका–२ मालमा पुल निर्माणाधीन छ ।

दार्चुलाका प्रमुख जिल्ला अधिकारी दीर्घराज उपाध्याय, भारतको पिथौरागढ जिल्ला अधिकारी आशिष चौहान, महाकाली नगरपालिकाका प्रमुख नरसिंह चैसीर, मालिकार्जुन गाउँपालिका अध्यक्ष हिरासिंह धामी, व्यास गाउँपालिका अध्यक्ष मंगलसिंह धामी, सुरक्षाकर्मी अधिकारीको उपस्थितिमा पुल सञ्चालनमा ल्याएको छ ।

प्रकाशित : जेष्ठ १२, २०७९ १८:२१
पूरा पढ्नुहोस्
प्रतिक्रिया
पठाउनुहोस्
×