१४ वर्षपछिको कुम्भकर्ण आरोहण असफल- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

१४ वर्षपछिको कुम्भकर्ण आरोहण असफल

आनन्द गौतम

ताप्लेजुङ — एउटा कुम खसेको जस्तो तर शिर उच्च देखिने फरक आकृतिको कुम्भकर्ण हिमाल आरोहणको यो वर्षको प्रयास असफल भएको छ । ७ हजार ७ सय ११ मिटर उचाइको यो हिमाल १४ वर्षपछि आरोहण प्रयास गरिएको हो ।


यस वर्ष चार जना अमेरिकी नागरिक आरोहणका लागि आएका थिए । काठमाडौंको ग्रान्ड हिमालयन ट्रेक्स एन्ड एक्सपिडिसनबाट आएकाहरूले दुई पटकसम्म शिखरमा पुग्ने प्रयास गरे पनि मौसमले साथ नदिएको कम्पनीका प्रबन्धक ओङमु शेर्पाले वताइन् । पर्यटन विभागको तथ्यांकअनुसार यसअघि सन् २००७ मा दुई जना रसियन नागरिकले आरोहण गरेका थिए । विभागका सूचना अधिकारी मोहन जीसीले भने, ‘त्यसपछि आरोहण भएको देखिँदैन ।’

पहिलो आरोहण भने सन् १९६२ मा फ्रान्सका नागरिकले गरेको पाइन्छ । नेपालको १५ औं र बिवश्वको ३२ औं अग्लो यो हिमाल हेर्दा आकर्षक देखिए पनि आरोहणका लागि निकै अप्ठेरो रहेको शेर्पाहरू बताउँछन् । डोरी टाङ्नकै लागि कठिन भएको उनीहरूको बुझाइ छ । यस सिजनमा गएका आरोही पहिलो पटक ७ हजार मिटरसम्म पुगेको र मौसमका कारण फर्किएर फेरी प्रयास गर्दा पनि सफल नभएको ओङ्मु बताउँछिन् । आरोही पहिलो पटकको तुलनामा दोस्रो पटक ७ हजार २ सय मिटरसम्म पुगेका थिए । ५ सय ११ मिटर चढ्न बाँकी रहँदा कुहिरो, हावाका कारण उनीहरू फर्किएका हुन् ।

आरोहणका लागि सरकारबाट अनुमती लिएर गएका आरोहण टोलीलाई किराँत धर्मावलम्बीले केही दिन रोकेका थिए । आफूहरूको धार्मिक स्थल भएकाले आरोहण गर्न नमिल्ने भन्दै रोकेको ओङ्मुले बताइन् । छलफलपछि उनीहरूले अवरोध नगर्ने जनाए । त्यसपछि क्याम्प साइड बनाउने, डोरी टाङ्ने काम सुरु भएको थियो । यो हिमाललाई किराँत धर्मावलम्बीले आफूहरूको पवित्र धार्मिकस्थल मान्छन् ।

राष्ट्रिय विभूति महागुरु फाल्गुनन्दले तपस्या गरेको र पवित्र भूमि भएकाले दर्शनका लागि यहाँ बर्सेनि सयौं किराँत धर्मावलम्बी जाने गरेका छन् । ताप्लेजुङ, पाँचथर, इलाम, झापा, मोरङलगायत देशका विभिन्न स्थान र हङकङ, बेलायत लगायतका देशमा रहेका किराँत धर्मावलम्बी पूजाका लागि आउने गरेका छन् । अधिकांश हिँडेरै जान्छन् भने कतिपयले हेलिकोप्टर चार्टर गरेर जाने गरेका छन् । विशेष गरी किराँत धर्मगुरु आत्मानन्द लिङदेनको प्रवचनबाट प्रभावित भएकाहरू प्रत्येक वर्ष जाने गरेका छन् ।

पहिला इलामको लारुम्बाबाटै पैदल जाने तीर्थयात्री अहिले फक्ताङलुङ गाउँपालिकाको तापेथोकसम्म गाडीमा गएर त्यसपछि पैदल जाने गरेका छन् । यो हिमाल फक्ताङलुङ गाउँपालिका–६ लेलेपको खम्बाछेन छेउमा पर्छ । किराँतीहरूले नामकरण गरेको आधारमा गाउँपालिकाको नाम पनि रहेको छ ।

प्रकाशित : मंसिर ४, २०७८ १२:३०
प्रतिक्रिया
पठाउनुहोस्

मकवानपुरमा देउवा पक्षको ‘क्लिन स्विप’

सुवास विडारी

मकवानपुर — नेपाली कांग्रेसको १४ औं महाधिवेशन अन्तर्गत मकवानपुरमा सम्पन्न प्रदेशसभास्तरीय निर्वाचनमा प्रधानमन्त्री एवं पार्टी सभापति शेरबहादुर देउवा पक्षले ‘क्लिन स्विप’ गरेको छ ।

कांग्रेस केन्द्रीय सदस्य महालक्ष्मी उपाध्याय डीना तथा कांग्रेस वाग्मती प्रदेश संसदीय दलका नेता इन्द्रबहादुर बानियाँको समर्थन रहेको उम्मेदवारले संस्थापन इतरलाई पराजित गर्दै चारवटै क्षेत्रमा जीत हात पारेको हो । निर्वाचनबाट प्रत्येक क्षेत्रमा कार्यसमितिसहित २५ जना प्रदेश प्रतिनिधि पनि छनोट गरेको छ । जिल्लाको ४ क्षेत्रमध्ये तीन स्थानमा प्यानलसहित निर्वाचन प्रक्रिया भएको थियो । निर्वाचन प्रक्रियाबाट ३ सभापति चयन हुँदा एकजना निर्विरोध सभापति चयन भए ।

मकवानपुर प्रतिनिधिसभा–१ को प्रदेशसभा ‘क’ मा सुशान्तकुमार श्रेष्ठ निर्विरोध चयन भएका थिए । उपसभापतिमा कमलाकुमारी वाइवा र गोपालबहादुर न्यासुर, सचिवमा भूमिनन्द गौतम र शंकर पराजुली तथा सहसचिवमा दीपक ढकाल र अमर सोराइली निर्विरोध चयन भएका हुन् ।

मकवानपुर प्रतिनिधिसभा–१ ‘ख’ मा राजेश बानियाँको प्यानल नै विजयी भएका हो । सभापतिमा बानियाँले १७७ मत ल्याएर विजयी भए भने प्रतिस्पर्धी रमेशध्वज कार्कीले ८३ मत ल्याए । उपसभापतिमा विनोद शर्माले १६० र शुक्रराज जोशीले १५६ मत ल्याएर विजयी भए । सचिवमा गोकर्ण सुवेदीले १८० र प्रदिप कडेँलले १९२ मत ल्याएर विजयी भए । सहसचिवमा केदारप्रसाद ढोडारीले १८८ र सानो कान्छा दोङले १९६ मत ल्याएर विजयी भए ।

मकवानपुर प्रतिनिधिसभा–२ को ‘क’ को सभापतिमा खड्गबहादुर गोपाली निर्वाचित भएका छन् । गोपालीले सभापतिका अर्का प्रतिस्पर्धी सुजन गोपालीलाई पराजित गर्दै निर्वाचित भएका हुन् । उपसभापतिमा इश्वरी शाही ठकुरी र रञ्जन कठायत विजयी भएका छन् । सचिवमा नरहरी गोपाली र राजेशबाबु सापकोटा विजयी हुँदा सहसचिवमा रामशरण गोपाली र समिता रसाइली विजयी भएको पार्टी प्रवक्ता प्रदीप कोइरालाले जानकारी दिए ।

मकवानपुर प्रतिनिधिसभा–२ को ‘ख’ सभापतिमा रञ्जन कालाखेती निर्वाचित भएका छन् । उनले आफ्नो प्रतिस्पर्धी रामकृष्ण प्रजालाई पछि पार्दै सभापतिमा निर्वाचित भएका हुन् । मत परिणाम अनुसार कालाखेतीले २९२ मत पाउँदा प्रजाले २२३ मत पाएका थिए । उपसभापतिमा भुवन नेगी र रामकुमार वाल्पा थिङ विजयी भएका छन् । सचिवमा नवराज पौडेल र कृष्ण योञ्जन विजयी हुँदा सहसचिवमा गोपिलाल थिङ र शालिकराम अधिकारी विजयी भएका हुन् ।

प्रकाशित : मंसिर ४, २०७८ १२:२७
पूरा पढ्नुहोस्
प्रतिक्रिया
पठाउनुहोस्
×