मुख्यमन्त्री राईले आज विश्वासको मत लिँदै- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

मुख्यमन्त्री राईले आज विश्वासको मत लिँदै

देवनारायण साह

मोरङ — प्रदेश १ का मुख्यमन्त्री राजेन्द्र राईले बुधबार प्रदेशसभामा विश्वासको मत लिने भएका छन् । सभामुख प्रदीपकुमार भण्डारीले आज बिहान साढे ११ बजे बोलाइएको प्रदेशसभा बैठकमा मुख्यमन्त्री राईले विश्वासको मत लिँदै छन् । 

प्रमुख प्रतिपक्षी दल एमाले अनुपस्थित भएपछि प्रदेश १ सभाको मंगलबारको बैठक स्थगित हुँदा मुख्यमन्त्री राईले विश्वासको मत लिन सकेका थिएन ।

विश्वासको मत लिनका लागि सत्तारुढ गठबन्धन दलले आफ्ना प्रदेश सांसदहरुलाई विराटनगरस्थित बिग होटल, रतना र इस्टर्न स्टार होटलमा राखेर हिृवप जारी गरेका छन् ।

कांग्रेस, माओवादी केन्द्र, एकीकृत समाजवादी, जनता समाजवादी पार्टी र संघीय लोकतान्त्रिक राष्ट्रिय मञ्चको पाँच दलीय गठबन्धनको समर्थनमा राई कार्तिक १६ गते मुख्यमन्त्री नियुक्त भएका हुन् । पाँच दलीय गठबन्धनको ५० जना सांसद रहेकाले मुख्यमन्त्री राईलाई विश्वासको मत प्राप्त गर्न कठिनाइ नहुने अवस्था देखिएको छ ।

मुख्यमन्त्री राईलाई विश्वासको मत प्राप्त गर्न ४६ सांसद आवश्यक छ । ९२ सदस्यीय प्रदेशसभामा एमालेका सभामुखसहित ४१, कांग्रेसका २१, माओवादी केन्द्रका १५, एकीकृत समाजवादीका १०, जनता समाजवादी पार्टीका ३, संघीय लोकतान्त्रिक राष्ट्रिय मञ्च र राप्रपाको १/१ जना प्रदेश सांसद छन् ।

एमालेका ४१ मध्ये एक जना प्रदेश सांसद गुलेफुन खातुन उच्च अदालत विराटनगरले किर्ते कागजात मुद्दामा दोषी ठहर गरेदेखि फरार छन् ।

मुख्यमन्त्री राईले प्रदेशसभाबाट विश्वासको मतका लागि प्रदेशसभा सचिवलाई आइतबार सूचना दिएका छन् । संविधानको धारा १६८ (४) मा धारा १६८ को उपधारा (२) बमोजिम नियुक्त मुख्यमन्त्रीले ३० दिनभित्र प्रदेशसभाबाट विश्वासको मत प्राप्त गर्नुपर्ने व्यवस्था छ ।

संविधानको धारा १६८ (३) मा उपधारा (२) बमोजिम नियुक्त मुख्यमन्त्रीले उपधारा (४) बमोजिम विश्वासको मत प्राप्त गर्न नसकेमा प्रदेश प्रमुखले प्रदेशसभा सबैभन्दा बढी सदस्यहरु भएको दलको नेतालाई मुख्यमन्त्री नियुक्त गर्नुपर्ने व्यवस्था छ ।

प्रकाशित : मंसिर १, २०७८ ०९:४५
प्रतिक्रिया
पठाउनुहोस्

प्रदेश २ का चार मन्त्रालय सचिवविहीन

सन्तोष सिंह

धनुषा — प्रदेश २ का चार मन्त्रालयमा महिनौंदेखि सचिव नहुँदा प्रदेश सरकारको काम प्रभावित बनेको छ । मुख्यमन्त्री तथा मन्त्रिपरिषद्को कार्यालयसहित चार मन्त्रालयमा सचिव छैनन् । सचिवकै अभावमा मन्त्रिपरिषद्को बैठक लामो समयदेखि बस्न सकेको छैन ।

मुख्यमन्त्री तथा मन्त्रिपरिषद्को कार्यालय र अन्य मन्त्रालयको आर्थिक र प्रशासनिक गतिविधि २ महिनादेखि ठप्प छ । मुख्यमन्त्री कार्यालयबाट मन्त्रालयहरूसँग समन्वय र मन्त्रालयबाट हुने विकासका काम रोकिएको छ । प्रदेशको आन्तरिक मामिला तथा सञ्चार मन्त्रालयमा सचिव नभएको दुई महिना भयो । मन्त्रालयका तत्कालीन सचिव वीरेन्द्र यादवको भदौमा सरुवा भएको थियो । उनको स्थानमा अर्का सचिव आएका छैनन् । सचिव नहुँदा मन्त्रालयको आर्थिक र प्रशासनिक काम अगाडि बढ्न सकेको छैन ।

सचिव नभएपछि मन्त्रालयका उपसचिव अवध कुशवाहाले निमित सचिवको जिम्मेवारी पाए । तर, मन्त्री भरतप्रसाद साहसँग उनको खटपट भएका कारण कात्तिक १ गतेदेखि बिदामा बसेका छन् । ‘सचिव नहुँदा निमित्त भएर मैले केही दिन चलाए,’ कुशवाहाले भने, ‘मन्त्रीज्यूले तपाईंसँग काम गर्न सक्दिन भनेकाले म बिदामा बसें ।’ कुशवाहाको सोमबार अख्तियार दुरुपयोग अनुसन्धान आयोगमा सरुवा भएको छ । मन्त्रालयमा सचिव र उपसचिवको दरबन्दी रिक्त छ । उद्योग, पर्यटन, वन तथा वातावरण मन्त्रालय पनि दुई महिनादेखि सचिवविहीन छ, जसका कारण मन्त्रालयको दैनिक गतिविधि सञ्चालन हुन सकेको छैन । मुख्यमन्त्रीले आफ्नै मातहतमा राखेको वाणिज्य तथा आपूर्ति र कानुन, न्याय तथा प्रदेशसभा मामिला मन्त्रालयमा पनि सचिव छैनन् । मुख्यमन्त्रीसँग रहेको यी दुई मन्त्रालयको कार्यालय र कर्मचारीसमेत व्यवस्थापन भएको छैन । मुख्यमन्त्री तथा मन्त्रिपरिषद् कार्यालयमा ३ जना सचिव हुनुपर्नेमा अहिले एक जनाको भरमा मात्र चल्दै छ । प्रदेश २ का प्रमुख सचिव हरिप्रसाद मैनालीले मन्त्रालयको नेतृत्व गर्ने सचिव पठाउन संघीय मन्त्रालयमा पटकपटक आग्रह गरेको बताए । ‘सचिव नहुँदा मन्त्रालयको प्रशासनिक गतिविधि रोकिएको छ,’ प्रमुख सचिव मैनालीले भने, ‘खाली मन्त्रालयमा सचिव पठाउन अनुरोध गरेका छौं ।’

प्रदेश सरकारका मन्त्रालयहरू सचिवविहीन भएको गुनासो लिएर मुख्यमन्त्री लालबाबु राउत सोमबार राजधानी काठमाडौं पुगेका छन् । उनले सोमबार नै सामान्य प्रशासन मन्त्रीसँग भेट्न खोजे पनि मन्त्री बाहिर रहेकाले भेटघाट हुन नसकेको जनाए । ‘धेरैजसो मन्त्रालयमा सचिव छैनन् । सरुवा भएपछि अर्को पठाइदिनुपर्ने हो नि,’ मुख्यमन्त्री राउतले भने, ‘सचिव नहुँदा धेरै महत्त्वपूर्ण कामहरू रोकिएको छ । मन्त्रिपरिषद्कै बैठक बस्न सकेको छैन ।’ मुख्यमन्त्री राउतले सचिव–कर्मचारीको अभाव प्रदेश २ सरकार गठन भएदेखि नै झेलिरहेको बताए ।

सचिव नहुँदा तल्लो तहका कर्मचारीसमेत मन्त्रालयमा हाजिर गरी घर फर्किने गरेका छन् । मन्त्रालयमा कर्मचारी नबस्दा प्रदेश सरकारको मुख्यालय मधेस भवनको परिसरमा रहेका मन्त्रालयहरू सुनसान छ । समयमै सचिव नपठाउँदा मन्त्रालयहरूको बजेट खर्चसमेत प्रभावित भएको छ ।

प्रकाशित : मंसिर १, २०७८ ०९:४०
पूरा पढ्नुहोस्
प्रतिक्रिया
पठाउनुहोस्
×