प्रधानमन्त्री पुष्पकमल दाहालले एनसेल प्रकरणको बारेमा कोट्याउँदा देशको अवस्था झन् असहज बन्ने बताएका छन् । विराटनगरमा पत्रकारसँगको कुराकानीमा उनले एनसेल प्रकरणमा दुबईबाट फर्किनेबित्तिकै आफूले प्रस्ट पारिसकेको बताएका हुन् ।
कांग्रेस नेता एवं सांसद शेखर काेइरालाले देश कमजाेर बनाउन देशीविदेशी शक्ति लागेकाे बताएका छन् । नेपाली कांग्रेस सुनसरीले बिहीबार इनरूवामा आयाेजना गरेकाे कार्यक्रममा काेइरालाले देश र कांग्रेस विकट अवस्थाबाट गुज्रिइरहेको बताएका हुन् ।
कोशी सरकारले दूध उत्पादक किसानको समस्या समाधानका लागि दुग्धजन्य पदार्थ निर्यातका लागि ४ करोड अनुदान वितरण गर्ने तयारी गरेको छ । विराटनगर दुग्ध वितरण आयोजनाले दुग्धजन्य पदार्थ बिक्री नभएको भन्दै कोशी प्रदेशका दूध उत्पादक किसानको ६ महिनादेखिको २५ करोड भुक्तानी नदिएपछि प्रदेश सरकारले निर्यातका लागि अनुदान दिन लागेको हो ।
कोशी प्रदेशसभा सचिवालयले सभामुख चयनको तयारी थालेको छ । उपसभामुख सिर्जना दनुवारले प्रदेशसभामा प्रतिनिधित्व गर्ने दलका नेताहरुसँग सभामुख चयनका लागि छलफल सुरु गरेको बताइन् । आउँदो पुस ४ गते बस्ने प्रदेशसभा बैठकबाट सभामुख चयन प्रक्रिया सुरु गर्ने तयारीमा प्रदेशसभा सचिवालय जुटेको हो ।
कोशी प्रदेशमा नेपाल सशस्त्र प्रहरी बल र भारतीय सशस्त्र सीमा बलले संयूक्त रुपमा नेपाल–भारत सीमास्थित सीमा स्तम्भ मर्मत तथा रंगरोगन कार्य सुरु गरेका छन् । नेपाल–भारत सीमास्थित १८६७ सीमा स्तम्भमध्ये ८२७ वटा मर्मत तथा रंगरोगन सुरु गरिएको हो ।
विराटनगरको सातघुम्तीस्थित कबाडी गोदाममा बुधबारको आगलागीमा घाइते भएकामध्ये थप एक जनाको मृत्यु भएको छ । योसँगै उक्त आगलागीबाट मृत्यु हुनेको संख्या तीन पुगेको छ ।
विराटनगरको सातघुम्तीमा रहेको एक कबाडी गोदाममा बुधबार दिउँसो आगलागीमा घाइते भएका चार जनालाई नेपाली सेनाको स्काइ ट्रक' मार्फत थप उपचारका लागि काठमाडौं कीर्तिपुर वर्न सेन्टर लगिएको छ । उक्त आगलागीमा २ जनाको मृत्यु भइसकेको छ भने दुई जना गम्भीर घाइते छन् ।
