फाल्गुनन्द गाउँपालिकाका पहिरो पीडितलाई राहत वितरण

रेडक्रसले वितरण गरेका सामग्रीमा प्रतिपरिवार दुई थानका दरले कम्बल, एक सेट भाँडाकुडा, ५० केजी चामल र लत्ताकपडा लगायत छन् ।

यहाँका ९१ परिवारलाई प्रारम्भिक राहत स्वरुप उक्त सामग्री उपलब्ध गराइएको रेडक्रस पाँचथरका सभापति कृष्ण बाँस्कोटाले बताए । यसअघि फाल्गुन्द गाउँपालिकाले मृतकका परिवारलाई २५ हजारका दरले रकमसँगै विस्थापित परिवारलाई ५० किलोका दरले चामलसहित दाल, नुन र तेल उपलब्ध गराएको थियो ।

पीडितहरूलाई रेडक्रसका पदाधिकारीसँगै प्रमुख जिल्ला अधिकारी, गाउँपालिका प्रमुख, उपप्रमुख र प्रमुख प्रशासकीय अधिकृतको उपस्थितिमा राहत वितरण गरिएको हो ।

कात्तिक १ देखि ३ गतेसम्म परेको बेमौसमी झरीले फाल्गुनन्दका ९१ परिवार विस्थापित हुनुका साथै २ जनाको ज्यान गएको थियो । झरीपछि गएको पहिरोमा परी पाँचथरमा मात्रै ३१ जनाको ज्यान गएको छ भने ३ जना बेपत्ता छन् ।

जिल्लाभर पहिरोले क्षति पुर्‍याएको विवरण भने हालसम्म संकलन हुन सकेको छैन । क्षतिको विवरण संकलन गर्ने जिम्मेवारी सम्बन्धित पालिकालाई दिइएको प्रमुख जिल्ला अधिकारी पुण्यप्रसाद ढकालले बताए ।