मोरङको कर्सियामा रहेको सिटिजन्स बैंकको कार्यालयमा गोली चल्यो, सुरक्षा गार्ड घाइते- प्रदेश १ - कान्तिपुर समाचार

मोरङको कर्सियामा रहेको सिटिजन्स बैंकको कार्यालयमा गोली चल्यो, सुरक्षा गार्ड घाइते

जितेन्द्र साह

विराटनगर — मोरङको धनपालथान गाउँपालिकाको कर्सिया बजारमा रहेको सिटिजन्स बैंकको शाखामा गोली चलेको छ । प्रहरीले बैंक लुट्न आएका लुटेराले गोली चलाइएको आशंका गरेको छ । 

१ नम्बर प्रदेश प्रहरी कार्यालयका प्रमुख डिआइजी अरुणकुमार बिसीका अनुसार गोली लागेर बैंकका सुरक्षा गार्ड घाइते छन् । घटनाबारे थप विवरण आउन बाँकी रहेको उनले बताए । उनले भने, 'लुटपाटको लागि गोली चलाएको हुनसक्छ । अरु प्रहरीले अनुसन्धान थालिसकेको छ ।'

उनले घटनामा संलग्न रहेको आशंकामा तीन जना पक्राउ गरिएको बताए । उनले भने, 'दसैंको अवसर पारेर बैंक लुट्न खोजेको देखिएको छ । प्रहरीले टोली खटाइसकेको छ । खोजतलास र पक्राउ गर्ने काम भइरहेको छ ।'

प्रकाशित : आश्विन २५, २०७८ १७:१२
प्रतिक्रिया
पठाउनुहोस्

घान्द्रुक दुर्घटनामा मृत्यु हुने आठैजनाको सनाखत

कान्तिपुर संवाददाता

काठमाडौँ — घान्द्रुकमा सोमबार जिप दुर्घटनामा परी मृत्यु हुने ८ जनाकै सनाखत भएको छ । मृत्यु हुनेमा जिपका चालक अन्नपूर्ण गाउँपालिकाको नयाँपुलका ४२ वर्षीय खुसीमान क्षेत्री, काठमाडौंको गोंगबुबाट घुम्न गएका ५ पुरुष र २ महिला छन् । 

कास्कीको अन्नपूर्ण गाउँपालिको नयाँपुलबाट घान्द्रुक जाँदै गरेको ग१ज ६९०० नम्बरको भाडाको जिप अन्नपूर्ण–१० कलाभिरमा दिउँसो २ बजेतिर दुर्घटनामा परेको थियो । मृत्यु हुनेमा काठमाडौं महानगरपालिका–३ गोंगबुका १८ वर्षीय जिल्लप घिसिङ, २४ वर्षीया सुजा चौधरी, २० वर्षीया लिजा चौधरी, २० वर्षीय सुमन चौधरी, २२ वर्षीय अच्युतम काफ्ले, १८ वर्षीय आशिष आलेमगर र गोरखा घर भइ गोंगबु बस्ने २७ वर्षीय विनय क्षेत्री छन् । उनीहरू दसैं बिदा मनाउन घान्द्रुक घुम्न जाँदै थिए ।

मृतक ८ जनालाई पश्चिमाञ्चल क्षेत्रीय अस्पताल ल्याउँदै गरेको जिल्ला प्रहरी कार्यालयका प्रमुख एसपी रमेश थापाले बताए ।

चालकसहित ९ जना सवार जिपमा रहेकी २० वर्षीया देविजा घिसिङको भने सकुसल उद्दार भएको छ । उनको अवस्था सामान्य छ । मृतक जिल्लप घिसिङ उनको भाइ हुन् । भीरमा अड्किएको अवस्थामा देविजाको स्थानीयले उद्धार गरेका थिए । जिपको पछाडिको ढोका खुल्दा उनी भीरको बीचको रुखमा अड्किएकी थिइन् ।

अन्नपूर्ण गाउँपालिका–१० का अध्यक्ष कुमारप्रसाद गुरुङका अनुसार बाटो बनाइरहेका मजदुरले जिप दुर्घटना भएको देखेका थिए । घान्द्रुकको हुँदु कटेपछि मुल गाउँ नपुग्दैको कलाभीरमा जिप ब्याक हुँदै खसेको थियो । झण्डै डेढ सय मिटर खसेर तल्लो बाटोमा जिप बजारिएको थियो ।


प्रकाशित : आश्विन २५, २०७८ १७:०४
पूरा पढ्नुहोस्
प्रतिक्रिया
पठाउनुहोस्
×