प्रदेश सरकार गिराउने कसरत सुरु

एकीकृत समाजवादीमा संगठित भएका प्रदेश सांसदमा राजेन्द्रकुमारसहित राजन राई, पदमकुमारी गुरुङ, गणेशकुमार काम्बाङ, खिनु लङ्बा लिम्बू, सुनीताकुमारी चौधरी, सरिता थापा, कृष्णकुमारी राई, सावित्रीकुमारी रेग्मी र उपेन्द्र घिमिरे छन् ।

एकीकृत समाजवादीमा संगठित भएका अधिकांश सांसद विराटनगरको एक होटलमा बसेर एमालेका सांसदलाई आफूतिर तान्न जोडबल लगाइरहेका छन् । सांसदलाई होटलमै राख्नुपर्ने अवस्था बारेमा राखेको जिज्ञासामा राजेन्द्रकुमारले अहिलेको अवस्थामा कुनै प्रदेश सांसदलाई होटलमा बन्द गरेर पार्टीमा आबद्ध गराउनु असम्भव भएको बताए ।

सकेसम्म बढी प्रदेश सांसदहरूको संख्या पुर्‍याएर मंगलबार निर्वाचन आयोगको प्रदेश १ कार्यालयमा सनाखत गर्ने तयारीका लागि छलफलमा जुटेको राईले बताए । ‘राजनीतिक आस्था र विचार परिवर्तन गर्ने जस्ता कठिन विषयमा निर्णय लिनुपर्ने भएकाले केही सांसदहरू अझै छलफलमै हुनुहुन्छ,’ उनले भने, ‘एमालेमै रहनुभएका केही सांसदले मंगलबारसम्ममा निर्णय गरेर एकीकृत समाजवादीमा आएर निर्वाचन आयोगमा सनाखत गर्न जानुहुन्छ भन्ने विश्वास छ, संगठित रूपमा हामी प्रयत्न गरिरहेका छौं ।’

एमालेबाट को–को प्रदेश सांसद एकीकृत समाजवादीमा आउने भन्नेबारेमा उनले खुलाउन चाहेनन् । तर एमालेका प्रदेश सांसद राजकुमार ओझालगायत केही सांसद आउने चर्चा छ । ओझाले भने आफू एमालेमै रहने बताए । निर्वाचन आयोगमा सनाखत गरेर सबै कानुनी प्रक्रिया पूरा गरेपछि कांग्रेस, माओवादी, नेकपा (एकीकृत समाजवादी), जसपा, संघीय लोकतान्त्रिक राष्ट्रिय मञ्च र राप्रपाको गठबन्धनको सरकार बनाउने प्रक्रिया सुरु गर्ने राजेन्द्रकुमारको भनाइ छ ।

‘निर्वाचन आयोगले जति छिटो प्रक्रिया पूरा गरेर प्रदेशसभा सचिवालयलाई पत्र पठाइदिन्छ त्यति चाँडो गठबन्धनको सरकार निर्माण प्रक्रिया सुरु हुन्छ,’ उनले भने, ‘कानुनी प्रक्रिया पूरा भएपछि मुख्यमन्त्री आचार्यसँग औपचारिक रूपमा छलफल गरेर प्रदेशसभाबाट विश्वासको मत लिन आग्रह गर्छौं तर विश्वासको मत लिन समय लम्ब्याउन खोजे आफ्नोअनुसार प्रक्रियामा जान्छौं ।’

बिहीबार मुख्यमन्त्रीमा शपथ लिएका आचार्यले शुक्रबार दुई सदस्यीय मन्त्रिपरिषद् विस्तार गरेका थिए । उनले एकीकृत समाजवादीमा संगठित भएका प्रदेश सांसद खिनु लङ्बा लिम्बू र सावित्रीकुमारी रेग्मीलाई मन्त्री बनाएर एमालेमा तान्ने गरेको प्रयास असफल भएको छ । उनी एकीकृतका प्रदेश सांसदलाई तान्ने प्रयत्नमा छन् । मंगलबारसम्ममा एकीकृत समाजवादीमा संगठित भएका सांसदहरूलाई मुख्यमन्त्री आचार्यले एमालेमा फर्काउन नसके प्रदेशसभामा बहुमत सिद्ध गर्न कठिन हुने निश्चित छ ।

‘पार्टी विभाजनपछि लोकतन्त्र र स्थायित्वका पक्षधर दलको साथमा एमालेभित्रै पनि बहुमत कायम राख्ने प्रयासमा छौं,’ मुख्यमन्त्री आचार्यले भने, ‘संवैधानिक व्यवस्थाअनुसार प्रदेशसभाबाट विश्वासको मत लिन्छु ।’ ९२ सदस्यीय प्रदेशसभामा एमालेका ५१, कांग्रेसका २१, माओवादी केन्द्रका १५, जनता समाजवादीका ३, संघीय लोकतान्त्रिक राष्ट्रिय मञ्च र राप्रपाका १/१ जना सांसद छन् ।