अझै सकिएन गौरवको सडक आयोजना- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

अझै सकिएन गौरवको सडक आयोजना

कोरोना महामारी र स्रोतको अभावले काम गर्न कठिनाइ भएको गुनासो
देवनारायण साह

मोरङ — प्रदेश १ सरकारको एक मात्र गौरवको आयोजना विराटचोक–पुष्पलालचोक ४ लेन सडक आयोजना अझै पूरा हुन सकेको छैन । २२ किलोमिटर लामो उक्त सडक आयोजना गत आर्थिक वर्षको असार मसान्तसम्ममा सक्नुपर्ने थियो । मुख्यमन्त्री शेरधन राईले उक्त आयोजना समयमै पूरा गर्ने उद्घोष गरेका थिए ।

प्रदेश १ सरकारको निर्माणाधीन आयोजना विराटचोक–घिनाघाट सडक । तस्बिर : देवनारायण/कान्तिपुर

भौतिक पूर्वाधार विकास कार्यालय विराटनगरले दुई वर्षभित्र निर्माण पूरा गर्ने गरी तीनवटा प्याकेजमा कुल १ अर्ब ७६ करोड १ लाख रुपैयाँमा ठेक्का लगाएको थियो । विराटचोकदेखि नेताचोकसम्म १० किलो मिटर सडक निर्माणका लागि ६८ करोड ६६ लाख र नेताचोकदेखि मिलनचोकसम्मको १० किलोमिटर सडक निर्माणका लागि ६९ करोडमा श्रेष्ठ/रमण/एपेक्स जेभीले ठेक्का लिएको छ ।

हालसम्ममा विराटचोकदेखि नेताचोकसम्मको भौतिक प्रगति ६० र आर्थिक प्रगति ४७ दशमलव ३१ प्रतिशत भएको भौतिक पूर्वाधार विकास कार्यालय विराटनगरका प्रमुख राजनराज रेड्डीले बताए । उनले नेताचोकदेखि मिलनचोकसम्ममा भौतिक प्रगति ८० र आर्थिक प्रगति ८३ दशमलव ६८ प्रतिशत भएको बताए । दुवै सडक खण्डको काम गत आर्थिक वर्षको अन्त्यसम्ममा सम्पन्न गरिसक्नुपर्ने सम्झौतामा उल्लेख थियो ।

यस्तै, मिलनचोकदेखि पुष्पलालचोकसम्म २ किलोमिटर सडक र केसलिया खोलामा पुल निर्माणका लागि लामा/बानियाँ जेभी कन्स्ट्रक्सनलाई ३८ करोड ३५ लाख रुपैयाँमा निर्माणका लागि ठेक्का दिएको छ तर त्यसको ३० प्रतिशत भौतिक र २५.५६ प्रतिशत आर्थिक प्रगति भएको रेड्डीले बताए । लामा/बानियाँ जेभीको काम गर्ने समय अझै एक वर्ष बाँकी छ । रेड्डीले विराटचोक–नेताचोक र नेताचोक–मिलनचोकको दुवै प्याकेजको सडक निर्माणका लागि पुस मसान्तसम्म ६ महिना म्याद थप गरिएको बताए ।

‘गत वर्ष नै पहिलो र दोस्रो प्याकेजको काम सम्पन्न गर्ने योजना भएको तर कोरोना महामारी र स्रोतको अभावले काम गर्न सुरुमा कठिनाइ भएकाले समयमा पूरा गर्न सकेनौं,’ उनले भने, ‘अहिले म्याद थप गरिएको ६ महिनाभित्र काम सम्पन्न गरेर पहिलो र दोस्रो प्याकेजको सडकको वैशाख १ गते उद्घाटन गर्ने योजनाका साथ काम अघि बढाएका छौं ।’ विराटचोक–नेताचोक सडक खण्डको आयोजना प्रमुख युवराज विष्टले गत वर्ष प्रदेश सरकारले समयमा बजेटको सुनिश्चितता गर्न नसकेकाले काम सम्पन्न गर्न समस्या भएको बताए । उनले यस वर्ष पुस मसान्तसम्ममा जसरी पनि सडक निर्माण सम्पन्न गरेर हस्तान्तरण गर्ने लक्ष्यका साथ काम अघि बढाएको बताए ।

तीन वटै प्याकेजमा विद्युत् पोल सार्ने काम अन्तिम चरणमा पुगेको छ भने पहिलो र दोस्रो प्याकेजमा नाला निर्माणको काम सकिएको प्रमुख रेड्डीले बताए । पहिलो प्याकेजमा सब बेस राखेर कालोपत्र गर्ने र दोस्रो प्याकेजमा पहिलो लेयर कालोपत्र सकेर अब दोस्रो लेयर कालोपत्र गर्न मात्रै बाँकी रहेकाले यस वर्ष काम सक्न कुनै समस्या नहुने उनले बताए । मिलनचोक–पुष्पलालचोकसम्मको तेस्रो प्याकेजमा सडक निर्माणको काम चालु आर्थिक वर्षमा सक्ने र कुनै प्राविधिक कठिनाइ नआए पुलको कामसमेत पूरा गर्ने लक्ष्यका साथ काम अघि बढाएको उनले बताए ।

बजेट अभावमा समयमा काम पूरा हुन नसकेको उक्त आयोजनाको कुल १ अर्ब ७६ करोड १ लाखमध्ये हालसम्ममा १ अर्ब ३३ लाख रुपैयाँ मात्रै भुक्तानी भएको छ । चालु आर्थिक वर्षमा काम पूरा गर्न ७५ करोड ६८ लाख बजेट आवश्यक भएको तर प्रदेश सरकारले २० करोड रुपैयाँ मात्रै बजेट विनियोजन गरेको भौतिक पूर्वाधार विकास कार्यालयको तथ्यांकले जनाएको छ । त्यसैले यस वर्ष पनि बजेट अभावमा काम पूरा नहुने आशंका बढेको हो । भौतिक पूर्वाधार विकास कार्यालयका प्रमुख रेड्डीले तत्काल सरकारले २० करोड बजेट विनियोजन गरे पनि संघीय सरकारबाट ससर्त अनुदान थप भएर आउने भएकाले काम पूरा गर्न बजेट अभाव नहुने दाबी गरे ।

प्रदेश १ को भौतिक पूर्वाधार विकास मन्त्रालयका प्रवक्ता रमेशप्रसाद पौडेलले अहिले २० करोड मात्रै बजेट विनियोजन गरिए पनि काम सम्पन्न भएपछि बजेट अभाव हुन नदिने प्रदेश सरकारको नीति रहेको बताए । उनले प्रदेशमा खर्च हुन नसक्ने बजेट र आर्थिक वर्षको अन्त्यमा संघीय सरकारबाट ससर्त अनुदान थप ल्याएर बजेट अभाव हुन नदिने परिकल्पना गरिएको बताए ।

प्रकाशित : श्रावण १४, २०७८ १०:४५
प्रतिक्रिया
पठाउनुहोस्

सुन पसलमा लुटपाट गर्न खोज्‍ने ६ जना एसएमजीसहित पक्राउ

एसमजीमा लाग्‍ने ६२ राउन्ड गोली र २ वटा अटोमेटिक पेस्तोल पनि बरामद 
देवनारायण साह

मोरङ — सुन्दरहरैंचा नगरपालिका १० त्रिवेणी चोकस्थित शिव पञ्चायन ज्वेलर्समा हतियार देखाइ लुटपाट गर्न खोजेको आरोपमा प्रहरीले ६ जनालाई सर्ट मेसिन गन(एसएमजी)सहित बुधबार पक्राउ गरेको छ ।

प्रहरीले उनीहरुको साथबाट एसएमजी र त्यसमा लाग्ने म्याग्जिन र ६२ राउण्ड गोली, कटुवा पेस्तोल र थ्री नट थ्री राइफलमा प्रयोग हुने ३ राउण्ड गोली र अटोमेटिक पेस्तोल, त्यसमा लाग्ने म्याग्जिन र २ राउण्ड गोली बरामद गरेको छ ।

पक्राउ पर्नेहरुमा संखुवासभाको सभापोखरी गाउँपालिका ४ घर भइ हाल इटहरी उपमहानगरपालिका २० तरहरा बस्ने ३९ वर्षीय प्रकाश भन्ने चन्द्रबहादुर राई, सुनसरीको गढी गाउँपालिका १ बस्ने ४५ वर्षीय डायमण्ड भन्ने प्रमोद चौधरी, संखुवासभाको सभापोखरी ६ बाह्रबीसे घर भइ इटहरी २० तरहरमा डेरा गरी बस्दै आएका ३० वर्षीय चिरञ्जिवी राई, सुन्दरहरैंचा-५ का २२ वर्षीय मिसन राई, भोजपुरको पौवादुम्बा गाउँपालिका-३ घर भइ इटहरी २० तरहरामा डेरा गरी बस्दै आएका ३० वर्षीय नगेन्द्र राई र सुन्दरहरैंचा-७ का ३१ वर्षीय सन्तोष राई छन् ।

यस्तै, उनीहरुले प्रयोग गरेको प्रदेश १–०२–०४४प ५९९५, को २० प १८६, को ८ प ६५८३, को २१ प ६७०३ नम्बरको मोटरसाइकल, को २ ह २७३६ नम्बरको अटो रिक्सा, ६ थान मोबाइल, एमआरपी लेखिएको सञ्चार सेट दुई थान र १६ हजार ५ सय नगद पनि बरामद गरिएको मोरङका एसपी जनार्दन जिसीले पत्रकार सम्मेलनमार्फत जानकारी दिए ।

चन्द्रबहादुर र प्रमोदलाई तरहराबाट र अन्यलाई मोरङको सलकपुरबाट पक्राउ गरिएको उनले बताए । सुन पसल लुटपाटमा गर्न जानेमध्ये एक जना अझै फरार रहेकाले खोजी भइरहेको प्रहरीले जनाएको छ ।

गत साउन १ गते दिउँसो १ बजे चन्द्रबहादुर र प्रमोदले योजनाबद्ध रुपमा थापाको पसलमा लुटपाटको असफल प्रयास गरेका थिए । ‘उनीहरुले सुरुमा बरामद भएको अटो रिक्सा प्रयोग गरेर २/३ दिन अगाडिदेखि पसल तथा त्यसको वरिपरि सुराकी गरेका थिए,’ जिसीले भने, ‘त्यसपछि साउन १ गते ३ वटा मोटरसाइकलमा ६ जना आएर सुन पसलमा लुटपाट गर्न खोजेका थिए ।’

चन्द्रबहादुरले एसएमजी, चौधरीले कटुवा पेस्तोल र पक्राउ पर्न बाँकी रहेका एक जनाले अटोमेटिक पेस्तोल बोकेर पसलभित्र प्रवेश गरेका थिए । अन्य ४ जनाले पसल बाहिर सुरक्षा घेरा बनाएका थिए । लुटपाटका लागि तीनै जना सुन पसलभित्र प्रवेश गरेर सटर लगाएर हतियार देखाएपछि पसल सञ्चालक थापाकी पत्नीले घर बाहिर निस्केर होहल्ला गरेकी थिइन् । त्यसपछि टोलका मानिसहरुले पनि होहल्ला गर्दै जम्मा हुन थालेपछि उनीहरुको लुटपाट योजना असफल भएको थियो । पसलबाट बाहिर निस्कने क्रममा उनीहरुले एसएमजी फायर गर्न खोजेका थिए तर फायर नभएपछि भागेका थिए ।

सुन पसलको सीसीटिभी फुटेजको आधारमा प्रहरीले अनुसन्धान गरेको थियो । उनीहरुविरुद्ध हातहतियार खरखजाना, डाँका, संगठित अपराध र गोली चलाउने प्रयास मुद्दा दर्ता गरेर अनुसन्धान अघि बढाइएको प्रहरीले जनाएको छ ।

प्रकाशित : श्रावण १३, २०७८ १८:२४
पूरा पढ्नुहोस्
प्रतिक्रिया
पठाउनुहोस्
×