फेरि गाँज्यो कोरोनाले, तेस्रो लहरको जोखिम- प्रदेश १ - कान्तिपुर समाचार

फेरि गाँज्यो कोरोनाले, तेस्रो लहरको जोखिम

भारतसँगको खुला आवागमनलाई तत्काल रोकेर व्यवस्थित गर्न विज्ञको सुझाव 
दैनिक संक्रमण बढिरहे पनि सर्वसाधारणले स्वास्थ्य सुरक्षा मापदण्ड अपनाइरहेका छैनन्
देवनारायण साह

विराटनगर — निषेधाज्ञा खुकुलो बनाएपछि प्रदेश १ मा पछिल्लो समय कोरोना संक्रमणको दर बढ्न थालेको छ । यस प्रदेशमा शनिबार २७ दशमलव ६८ प्रतिशत रहेको संक्रमण दर आइतबार बढेर २८ दशमलव ६१ पुगेको छ । 

विराटनगर-१७ स्थित अस्थायी प्रहरी पोस्ट मटेरुवा अगाडिबाटै निर्बाध भारत आवतजावत गर्नेको लर्को । तस्बिर : देवनारायण साह/कान्तिपुर

आइतबार १ हजार ५ सय ८५ जनाको पीसीआर परीक्षण गरिएकामा ४ सय ५७ र एन्टिजेन परीक्षण गरिएका ७ सय ६७ जनामध्ये २ सय १६ गरी कुल ६ सय ७३ जनामा कोरोना संक्रमण पुष्टि भएको छ । ९ संक्रमितको मृत्यु भएको सामाजिक विकास मन्त्रालयले जनाएको छ । यस्तै, प्रदेश १ मा शनिबार १ हजार ६ सय ६१ जनाको पीसीआर परीक्षण गरिएकामा तीन सय ३८ र २ हजार २ सय ८१ जनाको एन्टिजेन परीक्षण गरिएकामध्ये ७ सय ५३ गरी कुल १ हजार ९१ जनामा कोरोना संक्रमण पुष्टि भएको थियो । शनिबार नै ८ जना संक्रमितको मृत्यु भएको मन्त्रालयले जनाएको हो ।

प्रदेशमा शुक्रबार २४ दशमलव ३० प्रतिशतमा संक्रमण पुष्टि भएको थियो । ३ हजार चार सय ८६ जनाको कोरोना परीक्षण गर्दा आठ सय ४७ जनामा संक्रमण पुष्टि भएको थियो भने कोरोना संक्रमणले ८ जनाको मृत्यु भएको मन्त्रालयले जनाएको छ । बिहीबार २ हजार ६ सय ४ जनाको कोरोना परीक्षण गर्दा २९ दशमलव ८८ प्रतिशत अर्थात् सात सय ७८, बुधबार ३ हजार ८७ जनाको परीक्षण गर्दा ३० दशमलव ३९ प्रतिशत अर्थात् नौ सय ३८ र मंगलबार ३ हजार ६ सय ६० को परीक्षण गर्दा ३० दशमलव १९ प्रतिशत अर्थात् १ हजार एक सय ५ जनामा संक्रमण पुष्टि भएको मन्त्रालयले जनाएको छ ।

झापामा एक सय ७५, मोरङमा एक सय ८०, सुनसरीमा एक सय २१, इलाममा ११, उदयपुरमा ३२, संखुवासभामा १२, तेह्रथुममा २०, धनकुटामा १६, खोटाङमा १४, ताप्लेजुङमा ६, पाँचथरमा ३६, भोजपुरमा २५, ओखलढुंगामा १३ र प्रदेश १ बाहिरका ११ जनामा आइतबार संक्रमण पुष्टि भएको मन्त्रालयले जनाएको छ । प्रदेशमा हालसम्ममा पीसीआर परीक्षणमा ८१ हजार ३ सय ९३ र एन्टिजेन परीक्षणमा २६ हजार ६ सय ८ जनामा संक्रमण पुष्टि भएको मन्त्रालयले जनाएको छ । पीसीआर परीक्षणमा संक्रमण पुष्टि भएकामध्ये हाल ६ हजार दुई सय ६६ जना सक्रिय संक्रमित छन् । जसमा विभिन्न अस्पतालमा पाँच सय २६ र आइसोलेसन केन्द्रमा दुई सय ४५ जना उपचाररत रहेको मन्त्रालयले जनाएको छ ।

एन्टिजेन परीक्षणमा संक्रमण देखिएकाको उपचारको अवस्थाबारे मन्त्रालयले तथ्यांक सार्वजनिक गरेको छैन । यस प्रदेशमा आइतबार तीन सय ५२ जना संक्रमणमुक्त भएका छन् भने ५ महिला र ४ पुरुषको कोरोना संक्रमणले मृत्यु भएको मन्त्रालयले जनाएको छ । पछिल्लो समय दैनिक संक्रमण बढिरहे पनि सर्वसाधारणले स्वास्थ्य सुरक्षा मापदण्ड अपनाइरहेको भने देखिँदैन । कोरोना संक्रमण पुनः तीव्र गतिमा बढ्ने देखिएकाले सचेतता अपनाउनुको विकल्प नभएको चिकित्सकहरूको भनाइ छ । कोरोनाको तेस्रो लहरले संक्रमितको संख्या बढिरहेको भारतसँग पूर्व र पश्चिममा सिमाना जोडिएको यस प्रदेशस्थित सीमा नाकाहरूमा सर्वसाधारणले निस्फिक्री भारततर्फ आउजाउ गरिरहेकाले संक्रमणको जोखिम उच्च रहेको छ ।

यस प्रदेशमा संक्रमण बढिरहेका जिल्लाहरूमा जिल्ला प्रशासन कार्यालयहरूले विभिन्न सर्तसहितको निषेधाज्ञा साउन १५ गतेसम्मका लागि जारी गरेको छ । प्रदेशको राजधानी मोरङ जिल्ला प्रशासनले बिहान ५ बजेदेखि साँझ बजेसम्म मात्रै पूर्ण रूमा स्वास्थ्य सुरक्षा मापदण्ड अपनाएर बजार पसल सञ्चालन गर्न पाउने गरी साउन १४ मध्य रातिसम्मका लागि निषेधाज्ञा जारी गरेको छ । मोरङका प्रमुख जिल्ला अधिकारी कोषहरि निरौलाले संक्रमण बढिरहेकाले गुद्री बजार, साप्ताहिक हटिया, पार्टी प्यालेस, जिमखाना, खेलकुद गतिविधि, धार्मिक, सांस्कृतिक, मेला, सामूहिक भेला, सभा, गोष्ठी, शैक्षिक संस्था, विवाह, व्रतबन्ध र सीमानाका बन्द रहने व्यवस्था गरेको बताए ।

प्रजिअ निरौलाले सीमानाका बन्द रहने व्यवस्था गरे पनि सुरक्षाकर्मीहरूले तस्करीको लाइन चलाउन सहायक तथा चोर नाकाहरू खुला गरेकाले भारततर्फ आउने जानेको घुइँचो लाग्ने गरेको छ । विज्ञहरूले तेस्रो लहर कोरोनाको दोस्रो लहरभन्दा पनि खतरनाक हुने र बालबालिकाहरू बढी जोखिममा पर्ने भएकाले पूर्वतयारी गर्न सुझाव दिँदै आएका छन् ।

कोसी अस्पतालका प्रवक्ता डा. लक्ष्मीनारायण यादवले निषेधाज्ञा खुलेसँगै संक्रमणमा वृद्धि भइरहेकाले स्वास्थ्य सुरक्षा मापदण्ड पूर्णरूपमा पालना गर्नुको विकल्प नभएको बताए । उनले भारतमा कोरोनाको तेस्रो लहरका संक्रमित बढिरहेकाले नेपालमा पनि यसको जोखिम उच्च रहेको हुँदा सबैलाई सचेतता अपनाउन आग्रह गरे । उनले भारतबाट भइरहेको खुला अवागमनलाई तत्काल रोकेर व्यवस्थित अवागमन गराउनतिर सबैको ध्यानाकर्षण हुनु जरुरी रहेको बताए ।

सामाजिक विकास मन्त्री उषाकला राईले कोरोनाको तेस्रो लहर फैलिने जोखिम भएकाले सीमानाकामा भइरहेको आउजाउ तत्काल रोक्न सीसीएमसीको बैठकमा प्रस्ताव राख्ने र मुख्यमन्त्रीसँग पनि कुरा गर्ने बताइन् ।

‘तेस्रो चरणको कोरोना संक्रमणमा बालबालिकाहरू जोखिममा पर्ने विज्ञहरूको भनाइलाई गम्भीरतापूर्वक लिएर तयारी थालेका छौं,’ उनले भनिन्, ‘प्रदेश मातहतका अस्पतालहरूलाई कोरोनाको तेस्रो लहरका लागि तयारी अवस्थामा रहन निर्देशन दिनुका साथै आवश्यक छलफल गर्दै आएको छु ।’ स्थानीय तहहरूसँग पनि तेस्रो लहरका लागि आवश्यक तयारी गर्न लागिपरेको मन्त्री राईले बताइन् ।

प्रकाशित : श्रावण ११, २०७८ १२:४९
प्रतिक्रिया
पठाउनुहोस्

आत्मालोचना गरेर आए महन्थ ठाकुरलाई पार्टीमा ठाउँ दिन्छौँ : उपेन्द्र यादव

'१-२ दिनमै सरकारमा जान्छौं'
कान्तिपुर संवाददाता

काठमाडौँ — जनता समाजवादी पार्टी(जसपा) का संघीय परिषद् अध्यक्ष उपेन्द्र यादवले अर्का अध्यक्ष महन्थ ठाकुरले आत्मालोचना गरेर आए पार्टीमा ठाउँ दिइने बताएका छन् ।

तस्बिर : जयसिंह महरा

सोमबार निर्वाचन आयोगले जसपा विवादबारे निर्णय सुनाउन लागेका बेला यादवले सार्वजनिक रुपमा आत्मालोचना गरे ठाकुर पक्षलाई ठाउँ दिइने बताएका हुन् । सोमबार निर्वाचन आयोगले बहुमतका आधारमा पार्टीको आधिकारिकता कसलाई दिने भन्नेबारे निर्णय गर्ने बताइएको छ । अहिले आयोगमा सनाखतको काम भइरहेको पनि यादवले बताएका छन् ।

जसपाको केन्द्रीय कार्याकारिणी समिति सदस्यहरू निर्वाचन आयोगमा सामूहिक तस्बिर खिचाउँदै । तस्बिर अंगद ढकाल/कान्तिपुर

५१ सदस्यीय केन्द्रीय कार्यकारिणी समितिमा अहिलेसम्म आफ्नो पक्षमा २४ जनाले हस्ताक्षर गरिसकेको पनि उनले बताए । कारागारमा रहेका रेशम चौधरीलाई पनि सनाखतका लागि ल्याउने व्यवस्था गरिएको उनको भनाइ छ ।

तस्बिर सौजन्य : महेश चौरसिया

यादवपक्षमा केन्द्रीय कार्यकारिणी समितिका ३५ जना रहेको दाबी गरिएको छ । तीमध्ये १८ जना प्रतिनिधिसभा र २ जना राष्ट्रिय सभाका सांसद छन् । अमृतादेवी अग्रहरि, राजकिशाेर यादव, मनिश सुमन, गाेविन्द चाैधरी र रेशमलाल चाैधरी आज उपेन्द्र यादव पक्षमा आएको दाबी गरिएको छ ।

तस्बिर सौजन्य : महेश चौरसिया

कांग्रेस सभापति शेरबहादुर देउवालाई प्रधानमन्त्री बनाउन सघाएको जसपाको यादव पक्ष निर्वाचन आयोगबाट आधिकारिकता विवाद टुंगो लागेपछि सरकारमा जाने तयारीमा छ । १-२ दिनै सरकारमा जाने पनि यादवले बताए ।

यादव पक्षलाई पर्खंदा देउवाले मन्त्रिपरिषद् विस्तार गरेका छैनन् । आयोगले दल दर्ताका बखत सनाखत गरेका ५१ सदस्यलाई सोमबार 'हेड काउन्ट' गर्न बोलाइएको थियो ।

प्रकाशित : श्रावण ११, २०७८ १२:३५
पूरा पढ्नुहोस्
प्रतिक्रिया
पठाउनुहोस्
×