कोरोना संक्रमण र मृत्युदर अझै चिन्ताजनक- प्रदेश १ - कान्तिपुर समाचार

कोरोना संक्रमण र मृत्युदर अझै चिन्ताजनक

यस्तै खुकुलो अवस्था भइरहे स्थिति भयावह हुन सक्ने 
जितेन्द्र साह

विराटनगर — प्रदेश १ मा कोरोना संक्रमण दरको अवस्था अझै चिन्ताजनक अवस्थामा देखिएको छ । दैनिक संक्रमण दर औसत ३५ प्रतिशत र मृत्यु दर १५ रहेको सामाजिक विकास मन्त्रालयले जनाएको छ ।

विराटनगरस्थित मालपोत कार्यालयमा सेवाग्राहीको भीड ।

‘संक्रमण दर स्थिर रहेकाले अहिले तत्काल केही भनिहाल्ने अवस्था छैन,’ मन्त्रालयको कोभिड–१९ निगरानी, तथ्यांक संकलन तथा अनुगमन समितिको सचिवालयका संयोजक डा. रवीन्द्र निरौलाले भने । उनका अनुसार निषेधाज्ञामा खुकुलोसँगै चहलपहल बढेको हुनाले चिन्ता बढाएको छ ।

अहिले पनि जनरल बेड, भेन्टिलेटर र आइसोलेसनमा उल्लेख्य संख्यामा संक्रमित छन् । प्रदेशमा शनिबारसम्म जनरल बेड, आईसीयू, भेन्टिलेटर र आइसोलेसन केन्द्रहरूमा गरी ७ सय ९१ जना भर्ना रहेको मन्त्रालयले जनाएको छ । प्रदेशभर शनिबारसम्म ४ हजार ७ सय ९ जना होम आइसोलेसनमा छन् । ‘विचाराधीन अवस्थामै छौं, विश्लेषण गरिरहेका छौं,’ डा. निरौलाले भने । मन्त्रालयका अनुसार शनिबारसम्म प्रदेशमा २ हजार ९ सय ५२ पुरुष र २ हजार ५ सय १५ महिला गरी ५ हजार ४ सय ६७ सक्रिय संक्रमित छन् ।

गत वर्षको पहिलो चरणको कोरोना कहरदेखि यस वर्षको २६ असारसम्म यो प्रदेशभर ७५ हजार २ सय ७ जनामा संक्रमण पुष्टि भइसकेको मन्त्रालयले जनाएको छ । उक्त अवधिमा ९ सय ५६ पुरुष र ४ सय ६ महिला गरी १ हजार ३ सय ६२ संक्रमितको मृत्यु भइसकेको मन्त्रालयले जनाएको छ । संक्रमण दर २० प्रतिशतमुनि नझर्नुले स्थिति भयावह रहेको संकेत गरेको प्रदेश १ जनस्वास्थ्य प्रयोगशालाका निर्देशक जयवेन्द्र यादवले बताए । ‘कुनै दिन थोरै बढ्नु र कुनै दिन थोरै घट्नुको कुनै अर्थ छैन,’ उनले भने । यादवका अनुसार दोस्रो चरणको सुरुवातको तुलनामा घटेको देखिए पनि स्थिति नियन्त्रणमा आइसकेको देखिन्न । कोभिड–१९ निर्मूल नै भइसके जस्तै बजार, सवारीसाधन र सरकारी कार्यालयमा अव्यवस्थित भीड देखिएकामा निर्देशक यादवले चिन्ता व्यक्त गरे ।

कोरोना भाइरस संक्रमणलाई फैलिन नदिन जिल्ला प्रशासन कार्यालयले स्वास्थ्य एवं सुरक्षाका स्पष्ट मापदण्ड तोके पनि सर्वत्र अटेरी र लापरबाही देखिएको विराटनगर–१२ का समाजसेवी देवराज दाहालले बताए । ‘कोरोना नियन्त्रणमा सबैभन्दा ठूलो भूमिका निर्वाह गर्नुपर्ने नागरिक नै मापदण्डको पालना गरिरहेका छैनन्,’ उनले भने, ‘यही स्थिति रहेमा संक्रमण पुनः बढेर १० दिनमै सबथोक बन्द गर्नुपर्ने अवस्था आउन सक्छ ।’

कोरोना संक्रमणलाई नियन्त्रण गर्ने यो राम्रो मौका भएको डा. सरोज विशालले बताए । संक्रमणको उतारचढावका बारेमा अध्ययन गरिरहेका उनले सकारात्मक सोचको आवश्यकता भएको बताए ।‘अहिले पुनः बढे पनि सामान्य र लक्षण नभएका संक्रमित बढी छन्, अस्पताल भर्ना हुने खालका कम छन्,’ उनले भने, ‘यति बेला स्थानीय निकायसँगको संयोजनमा जनस्तरमा काम गर्न सक्यौं भने यसअघिको जस्तो खराब स्थितिको सामना गर्नु पर्दैन ।’

डा. विशालले संक्रमितबाट हेरचाह गर्नेमाहुँदै परिवारका अन्य सदस्यमा र समुदायमा फैलिने प्रवृत्ति देखिएको बताए । सरोकारवाला स्थानीय निकायका जनप्रतिनिधि एवं स्वास्थ्यकर्मीलाई अभिमुखीकरण गर्दै जनचेतनाको पक्षमा जोड दिन सक्यौं भने यो भाइरस विस्तार हुन नपाउने उनले बताए ।

प्रकाशित : असार २८, २०७८ १२:२८
प्रतिक्रिया
पठाउनुहोस्

संक्रमितलाई चिकित्सक भेट्नै हम्मे

जितेन्द्र साह

विराटनगर — कोरोना संक्रमण उत्कर्षमा पुगिरहेका बेला कोभिड अस्पताल र आइसोलेसन सेन्टर भरिभराउ थिए । तर आफैं संक्रमित भए परिवार पनि जोखिममा पर्ने डरले कतिपय चिकित्सक कोभिड बिरामीको सम्पर्कमा गइहाल्न हच्किन्थे ।

नियमित उपचार गर्दै आएका बिरामीको समेत चिकित्सकले फोन उठाउँदैनथे । एकातिर कोभिड अस्पतालमा संक्रमितको उपचारमा खटिएका चिकित्सकलाई भ्याइनभ्याई थियो भने अर्कोतिर अन्य चिकित्सकले संक्रमितप्रति चासो नदिँदा होम आइसोलेसनमा रहेका बिरामीले तनाव बेहोर्नुपर्‍यो ।

‘सुरुको १० दिन त डाक्टर खोज्दै बित्यो,’ विराटनगर–१ का एक ४० वर्षीय पुरुषले भने, ‘मैले चिनेजानेको डाक्टरले समेत भेटेर कुरा सुन्न मानिरहेका थिएनन, अनेक बहाना गरेर टार्थे । एक चिकित्सकले त दुई दिनसम्म फोन/म्यासेजको जवाफ नै दिएनन् ।’ जाँचेर स्वास्थ्य अवस्थाबारे प्रस्ट पारिदिऊन् भनेर चिकित्सक खोज्दै भौंतारिएको उनले बताए ।

कतैबाट सहयोग नपाएपछि विराटनगर–२ का एक संक्रमित पुरुष पोजिटिभ रिपोर्ट बोकेर चिकित्सक खोज्दै हस्पिटल चोक पुगेको बताए । ‘डाक्टरसँग औषधि लेखेर ल्याइदिने कोही नभएपछि कोठाबाट निस्कें । निकै सोधपुछ गरेपछि एक चिकित्सकबारे स्थानीय औषधि व्यवसायीले जानकारी दिए ।’ ती चिकित्सकको सल्लाहअनुसार केही दिनको औषधि सेवन एवं खानपिन पछि सन्चो भयो ।

विराटनगर–६ का ६ सदस्यीय परिवारका तीन जना संक्रमित भए । तर संक्रमित भएको तीन दिनसम्म कसलाई, कहाँ सम्पर्क गर्ने र के गर्नेबारेमा उनीहरूलाई थाहा थिएन । ‘चिनेजानेकाले फोनमा दिएको सल्लाहअनुरूप सिटामोल र गेडागुडीको झोल खाँदै केही दिन घरमा बस्यौं, सन्चो भएर हिँडडुल गर्ने स्थिति भएपछि मात्र एक चिकित्सकलाई भेट्न पायौं,’ परिवारका एक सदस्यले भने ।

कोरोना भाइरसको कहर उत्कर्षमा पुगेका बेला उपचारबाट वञ्चित भइरहेका दर्जनौं बिरामीलाई गत वर्ष र यसपालि चिकित्सकसँग भेटाएको सामाजिक कार्यकर्ता सञ्जीव चापागाईंले बताए । ‘खतरामुक्त मानिने १० दिनको अवधिपछि मात्र चिकित्सकले संक्रमित हेर्न मान्छन्, अस्पतालको ओपीडी र फिभर क्लिनिकमा भेटिएका चिकित्सकले दुई मिनेट समय पनि दिंदैनन्,’उनले भने ।

होम आइसोलेसनमा बसेकालाई पनि अस्पतालमा भर्ना भएकालाई जत्तिकै चिकित्सकीय परामर्शको आवश्यकता हुन सक्ने कोसी अस्पतालका फिजिसियन डा. डेनप्रसाद आचार्यले बताए । ‘होम आइसोलेसनमा बसेका सबैको स्वास्थ्य अवस्था सामान्य हुन्न, कतिपय सिकिस्त भए पनि स्वास्थ्य संस्थामा भर्ना नपाएर घरमा बसेका हुन्छन्, उनीहरूलाई पनि निरन्तर चिकित्सकीय परामर्शको आवश्यकता हुन्छ,’ उनले भने, ‘कुनै औषधिले काम नगरेमा वा खराबी गरेमा रोक्नुपर्ने वा तुरुन्तै अर्को दिनुपर्ने हुन्छ ।’

प्रकाशित : असार २१, २०७८ १२:०४
पूरा पढ्नुहोस्
प्रतिक्रिया
पठाउनुहोस्
×