![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
धरान — निषेधाज्ञा खुकुलो भएसँगै सुनसरीको धरानमा कोरोना संक्रमितको संख्या र मृत्युदर बढेको छ । निषेधाज्ञा जारी गर्नुअघि धरानमा एक सय जनाको पीसीआर जाँच गर्दा ७० देखि ८० जनासम्मलाई कोरोना संक्रमण भएको र दैनिक २ देखि ३ जनाको मृत्यु हुने गरेको थियो ।
![](https://assets-cdn.ekantipur.com/uploads/source/ads/ekantipur-1-1282024082932.gif)
![निषेधाज्ञा खुकुलिएसँगै संक्रमण बढ्यो](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2020/miscellaneous/clock-tower-dharan-24112017083657-1000x0-2512020051426-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
धरान उपमहानगर स्वास्थ्य शाखा प्रमुख उमेश मेहताले भने, ‘निषेधाज्ञा खुकुलो भएसँगै संक्रमितको संख्या र मृत्युदर बढ्न थालेको छ ।’ उनका अनुसार धरानमा मृत्युदर करिब ३ प्रतिशत रहेको छ भने संक्रमण दर पनि बढेको छ । कोरोनाको दोस्रो लहरमा धरानमा ७८ जनाले ज्यान गुमाइसकेका छन् । उनका अनुसार लामो समयको निषेधाज्ञापछि पछिल्लो एक सातायता मात्र कोरोना संक्रमणबाट धरानमा १६ जनाले ज्यान गुमाएका छन् भने करिब ४ सय जना नयाँ संक्रमित थपिएका छन् ।
धरानका अधिकांश टोलैपिच्छे संक्रमितहरू छन् । संक्रमणबाट गम्भीर भएकाहरूमात्र अन्तिम समयमा अस्पताल जाने वा सम्पर्कमा आउने गरेका छन् । उनका अनुसार धरानमा दोस्रो महामारीमा २ हजार ७ सय जना निको भएका छन् । हालसम्म संक्रमितको संख्या ३ हजार २ सय जना पुगेका छन् ।
बीपी कोइराला स्वास्थ्य विज्ञान प्रतिष्ठानका संक्रामक रोग विशेषज्ञ चिकित्सकहरूले पनि सर्वसाधारणको लापरबाहीले तेस्रो लहर आउन सक्ने र त्यसले झन् बढी मानवीय क्षति पुर्याउनेमा सचेत गराउँदै आएका छन् । प्रतिष्ठानको माइक्रो बायोलोजी विभागकी पूर्वविभागीय प्रमुख प्रा.डा. बसुधा खनालले भनिन्, ‘तथ्यांकले संक्रमणको दर कम भएको देखाएको छैन । लकडाउन अवधिमा पनि र लकडाउन खुकुलो भएपछि सावधानी नअपनाउँदा संक्रमणको दर र मृत्युदरमा कमी नदेखिएको हुन सक्छ ।’
![](https://assets-cdn.ekantipur.com/uploads/source/ads/900-x-100-1-0282024055738.gif)