विराटनगरको बाल सुधार गृहबाट तीन जना फरार- प्रदेश १ - कान्तिपुर समाचार

विराटनगरको बाल सुधार गृहबाट तीन जना फरार

कान्तिपुर संवाददाता

मोरङ — विराटनगरस्थित बाल सुधार गृहबाट तीन जना शुक्रबार राति फरार भएका छन् । संखुवासभा, उदयपुर र ओखलढुंगाका तीनै जना बालविज्याइँकर्ताहरुले बालसुधार गृहको तेस्रो तलाबाट हामफालेर भागेका हुन् । 

मोरङका प्रमुख जिल्ला अधिकारी कोषहरी निरौलाले दुई जना जबरजस्ती करणी र एक जना विस्फोटक पदार्थसम्बन्धी मुद्दामा बालसुधार गृहमा बस्दै आएको अवस्थामा रातिको समयमा हाम फालेर भागेको बताए ।

‘केही समय अगाडि कोरोना संक्रमित भएका २२ जना बालविज्याइँकर्तासँग तेस्रो तलामा बस्दै आएका ४ जनाले हामफालेर भागेका छन्,’ उनले भने, ‘भागेकामध्ये झापा घर भएका १ जना घाइते भएकाले पक्राउ परेको तर ३ जना भाग्न सफल भए ।’ उनीहरुको प्रहरीले खोजी कार्य गरिरहेकोले चाँडै पक्राउ पर्ने प्रजिअ निरौलाको भनाइ छ ।

भाग्दाभाग्दै पक्राउ परेका झापा घर भएका बालकलाई अदालतले जबरजस्ती करणी मुद्दामा १० वर्ष कैद सजाय तोकेको छ । यस्तै, फरार भएका दुई जनामध्ये एक जनालाई जबरजस्ती करणी मुद्दामा ५ वर्ष तोकिएको सजाय २०७९ सालमा भुक्तान भएर छुट्ने समय भएको प्रजिअ निरौलाले बताए । अर्को एक जना १२ वर्ष कैद सजाय भएर बालसुधार गृहमा राखिएको थियो । फरार भएका अर्को एक जना बालक विस्फोटक पदार्थसम्बन्धी मुद्दामा पुर्पक्षका लागि थुनामा राख्न अदालतले आदेश दिएपछि बालसुधार गृहमा राखिएको उनले बताए ।

उनीहरु चारै जना योजना बनाएरै भागेको बालसुधार गृह प्रशासनले जनाएको छ । बालसुधार गृहको सुरक्षामा प्रहरी सहायक निरीक्षकको नेतृत्वमा १० जना प्रहरी खटिएको अवस्थामा उनीहरु हामफालेर भागेको घट्ना शंकास्पद बनेको छ । प्रमुख जिल्ला अधिकारी निरौलाले फरार भएकाहरु प्रहरीसँगको सेटिङमा भागेको नदेखिएको तर अनुसन्धान भइरहेको बताए ।

जिल्ला प्रहरी कार्यालय मोरङका निमित्त प्रमुख प्रहरी नायब उपरीक्षक मञ्जिल मुकारुङले घट्नाको बारेमा बिभिन्न दृष्टिकोणबाट अनुसन्धान भइरहेको र अनुसन्धानपछि सत्यतथ्य बाहिर आउने बताए । ५० जना क्षमताको बालसुधार गृहमा अहिले १ सय ९५ जना बालविज्याइँकर्ता बालक विभिन्न मुद्दामा कैद सजाय पाएर र पुर्पक्षका लागि थुनामा राख्ने आदेशपछि बसिरहेको प्रजिअ निरौलाले बताए ।

प्रकाशित : असार १२, २०७८ १६:०९
प्रतिक्रिया
पठाउनुहोस्

डोटीमा खोलाले बगाउँदा बालिका बेपत्ता

मोहन शाही

डोटी — डोटीमा खोलाले बगाउँदा ५ वर्षीय बालिका बेपत्ता भएकी छिन् । गोठाला गएको बेला जिल्लाको पूर्वीचौकी गाउँपालिका-४ स्थित गण्डीगाडले शनिबार बगाउँदा पूर्वीचौकी गाउँपालिका–४ की मिनु मिजार बेपत्ता भएकी हुन् ।

बालिका बेपत्ता भएको खबर आउनासाथ जिल्ला प्रहरी कार्यालय डोटीबाट प्रहरी नायव निरीक्षक नारायण दत्त बडुको कमान्डमा ४ जनाको प्रहरी टोली घटना स्थलतिर गएको जिल्ला प्रहरी कार्यालय डोटीका सूचना अधिकारी प्रहरी नायव उपरीक्षक इन्द्रबहादुर मल्लले बताए । स्थानीय र प्रहरी टोलीद्वारा बालिकाको खोजी जारी राखिएको प्रहरीले बताएको छ ।

प्रकाशित : असार १२, २०७८ १५:४३
पूरा पढ्नुहोस्
प्रतिक्रिया
पठाउनुहोस्
×