मोरङमा जेठ २४ गतेसम्म निषेधाज्ञा थप
मोरङ — कोरोना संक्रमणको दर बढ्ने क्रम नरोकिएकाले जिल्ला प्रशासन कार्यालय मोरङले जिल्लामा जेठ २४ गतेसम्मका लागि निषेधाज्ञा थप गरेको छ ।
मोरङका प्रमुख जिल्ला अधिकारी कोषहरि निरौलाले आइतबार पाँचौपटक समयावधि थप गरेर निषेधाज्ञा लम्ब्याएको हो । पछिल्लो पटक जेठ १८ गतेमध्यरातिसम्म लगाएको निषेधाज्ञा थपेर जेठ २४ गते मध्यरातिसम्म पुर्याएको छ ।
मोरङ प्रशासनले सरकारले हालै जारी गरेको कोभिड १९ संकट व्यवस्थापन अध्यादेश २०७८ बमोजिम प्रशासनले निषेधाज्ञा थप कडाइ गर्ने जनाएको छ । निषेधाज्ञा उलंघन गर्ने, अवरोध गर्नेलाई अध्यादेशमा भएको व्यवस्था अनुसार कारबाही गर्न सुरक्षाकर्मीलाई निर्देशन दिइसकिएको प्रजिअ निरौलाले बताए ।
अध्यादेशमा कोरोना नियन्त्रण, रोकथाम र निदानमा अवरोध गर्नेलाई १ वर्ष कैद वा ५ लाख जरिवाना वा दुवै सजाय गर्ने प्रजिअलाई अधिकार दिइएको छ ।
कोभिड १९ महामारीको दोस्रो लहर सुरु भएपछि मोरङ प्रशासनले पहिलो पटक वैशाख १८ गते राति १२ बजेदेखि निषेधाज्ञा लगाएको थियो ।
प्रकाशित : जेष्ठ १६, २०७८ १९:३३