उदयपुरका थप चार संक्रमितको मृत्यु- प्रदेश १ - कान्तिपुर समाचार

उदयपुरका थप चार संक्रमितको मृत्यु

डिल्लीराम खतिवडा

उदयपुर — उदयपुरमा पछिल्लो २४ घण्टामा व्यापारीसहित चार जना कोरोना संक्रमितको मृत्यु भएको छ । शनिबार राति एक र आइतबार बिहान तीन जनाको मृत्यु भएको हो । मृत्यु हुनेमा ४०, ६३, ५६ र ६० वर्षीय पुरुष छन् । यससँगै उदयपुरमा मृत्यु हुनेको संख्या ११ पुगेको छ । 

कोरोनाबाट त्रियुगा नगरपालिका–३ घर भई गाईघाट बजारमा व्यापार गर्दै आएका एक व्यक्तिको शनिबार राति मृत्यु भएको प्रमुख जिल्ला अधिकारी तुलसीराम सेढाईले बताए । संक्रमण देखिएपछि उनलाई परिवारले पाँच दिनअघि झापाको बिर्तामोडस्थित बी एन्ड सी अस्पतालमा भर्ना गरेको थियो ।

त्यसै गरी कोरोनाबाट संक्रमित भएका त्रियुगा नगरपालिका–१० का ६३ वर्षीय पुरुषको उदयपुर कोभिड–१९ अस्पताल, बेल्टारमा मृत्यु भएको छ । शनिबार दिउँसोसम्म सामान्य अवस्थामा रहेका उनको संक्रमणबाट आत्तिएर हृदयघात भई मृत्यु भएको चौदण्डीगढी नगरपालिकाको स्वास्थ्य शाखाका तेजबहादुुर पोखरेलले बताए ।

त्यसै गरी ज्वरो र रुघाखोकी लागेपछि उपचारका लागि विराटनगरस्थित नोबेल अस्पताल भर्ना भएका चौदण्डीगढी नगरपालिका–५ का ५६ वर्षीय पुरुषको पनि मृत्यु भएको छ । कोरोना परीक्षण गर्दा पोजिटिभ देखिएपछि उनलाई वार्डमा भर्ना गरिएको थियो । यस्तै विराटनगरस्थित ग्रिनक्रस अस्पतालमा त्रियुगा नगरपालिका १२ का ५१ वर्षीय पुरुषको मृत्यु भएको छ । दमका बिरामी उनलाई स्वास्थ्यमा समस्या आएपछि तीन दिनअघि विराटनगरको गोल्डेन अस्पताल पुर्‍याइएकोमा कोरोना पुष्टि भएको थियो । त्यहाँबाट परिवारले ग्रिनक्रसमा लगेको थियो ।


प्रकाशित : जेष्ठ २, २०७८ १०:३४
प्रतिक्रिया
पठाउनुहोस्

बाँकेमा कोरोनाबाट थप ८ जनाको मृत्यु

रूपा गहतराज

नेपालगन्ज — बाँकेमा कोरोना संक्रमणबाट थप ८ जनाको मृत्यु भएको छ । योसंगै जिल्लामा कोरोनाबाट दुई सय ३५ जनाको मृत्यु भएको छ । बाहिरी जिल्लाबाट उपचार गराउन आउँदा एक सय ८३ जनाको मृत्यु भइसकेको  छ ।

बाँकेका कोरोना फोकल पर्सन तेज वलीका अनुसार मृतकमध्ये बाँके र बर्दियाका ३/३ जना र रोल्पा र कैलालीका एक/एकजना रहेका छन् । नेपालगन्ज उपमहानगरपालिका-१९ का ६० वर्षीय पुरुषको भेरी अस्पतालमा मृत्यु भएको छ । वैशाख २८ गते पीसीआर गरिएका उनलाई जेठ १ गते भर्ना गरिएको थियो ।

भेरी अस्पतालमै कोहलपुर नगरपालिका-१५ का ६७ वर्षीय पुरुषको मृत्यु भएको छ । वैशाख ३१ गते पीसीआर गरिएका उनलाई त्यही दिन भर्ना गरिएको थियो । राप्तिसोनारी गाउँपालिका २ बाँकेकी ५२ वर्षीय महिलाको मेडिकल कलेज कोहलपुरमा मृत्यु भएको छ । जेठ १ गते एन्टिजेन परीक्षण गरिएको उनलाई त्यही दिन कोहलपुरमा भर्ना गरीएको थियो ।

बर्दिया मधुवन नगरपालिका-९ का ७१ वर्षीय पुरुषको भेरीमा मृत्यु भएको छ । वैशाख २५ गते पीसीआर गरिएका उनलाई २९ गते भर्ना गरिएको थियो । बर्दिया बढैयाताल गाउँपालिका-१ का ५० वर्षीय पुरुषको भेरी अस्पतालमै मृत्यु भएको छ । वैशाख २७ गते पीसीआर गरिएका उनलाई ३० गते भर्ना गरिएको थियो । यसैगरी बर्दिया बढैयाताल गाउँपालिका-२ का ८७ वर्षीय पुरुषको भेरीमा मृत्यु भएको छ । वैशाख २८ गते पीसीआर गरिएका उनलाई त्यही दिन भर्ना गरिएको थियो ।

यस्तै, कैलाली गौरीगंगा गाउँपालिका-४ का ५२ वर्षीय पुरुषको मेडिकल कलेज कोहलपुरमा मृत्यु भएको छ । वैशाख १६ गते कैलालीमा पीसीआर गरिएका उनलाई २३ गते भर्ना गरिएको थियो ।

रोल्पा रुम्टीगढीका ३५ वर्षीय पुरुषको भेरीमा मृत्यु भएको छ । वैशाख २५ गते दाङमा पीसीआर गरिएका उनलाई २९ गते भेरीमा भर्ना गरिएको थियो ।

प्रकाशित : जेष्ठ २, २०७८ ०९:४७
पूरा पढ्नुहोस्
प्रतिक्रिया
पठाउनुहोस्
×