प्रदेश १ को प्रदेश सभा बैठक आइतबार बस्दै- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

प्रदेश १ को प्रदेश सभा बैठक आइतबार बस्दै

कान्तिपुर संवाददाता

मोरङ — प्रदेश १ को प्रदेश सभामा देखिएको गतिरोध अन्त्यका लागि आइतबार बस्ने बैठकमा मुख्यमन्त्री शेरधन राईले विशेष समय लिएर बोल्ने तयारी गरेका छन् । विशेष समयमा मुख्यमन्त्री राईलाई बोल्न नदिए प्रदेशसभाको चालु हिउँदे अधिवेशन अन्त्य गर्ने सरकारी तयारी छ ।

प्रदेश सरकारका प्रवक्ता आन्तरिक मामिला तथा योजनामन्त्री हिक्मत कार्कीले सदनमा आइतबार मुख्यमन्त्री राईले विशेष समय लिएर बोल्ने तयारी गरेको बताए । ‘प्रतिपक्षी दलहरूले विशेष समयमा मुख्यमन्त्रीज्यूलाई बोल्न नदिए त्यसपछि सरकारले निर्णय लिन्छ,’ उनले भने, ‘अहिले सदनको गतिरोध अन्त्यका लागि प्रतिपक्षी दलहरूसँग छलफल गरिरहेको र निकास ननिस्किए सरकारले निर्णय लिने छ ।’

सत्तारुढ दल माओवादी केन्द्रका नेता इन्द्रबहादुर आङ्बोले सहमति कायम नगरेसम्म सरकार प्रमुखलाई जबरजस्ती बोल्न नदिने बताए । सदनमा अबरोध कायमै रहने उनको भनाई छ । प्रतिपक्षी दल कांग्रेसका प्रमुख सचेतक केदार कार्कीले सदन अवरोध गर्दै आएका दलहरूसँग सहमति नगरेसम्म मुख्यमन्त्री राईलाई प्रदेशसभा बैठकमा बोल्न नदिने बताए । चालु आर्थिक वर्षमा स्वीकृत योजनाहरूको स्रोतको सुनिश्चितताको माग गर्दै सत्तारुढ दल माओवादी केन्द्रका साथै सबै प्रतिपक्षी दलहरूले चैत २६, २७ र ३० गते बसेको बैठक अवरुद्ध गरेका थिए ।

प्रदेश सरकारले चालु आर्थिक वर्षमा ४० अर्ब ८९ करोड ९९ लाख ४७ हजार रुपैयाँको बजेट ल्याएको थियो । सरकारले बजेट घाटामा सन्तुलन कायम गर्न मन्त्रिपरिषद् निर्णयमार्फत चालु आर्थिक वर्षको असोजमै ५० प्रतिशत बजेट कटौती गरेको छ । निर्वाचन क्षेत्र पूर्वाधार र विशेष निर्वाचन क्षेत्र विकास कार्यक्रमको समेत बजेट कटौति भएपछि प्रदेशसभामा विवाद उत्पन्न भएको हो ।

प्रकाशित : वैशाख ५, २०७८ ०८:३४
प्रतिक्रिया
पठाउनुहोस्

वैशाखभित्रै रेल चलाउने तरखर

कान्तिपुर संवाददाता

जनकपुर — कैयौं पटक तोकिएको साइतमा रेल सञ्चालनमा नल्याउँदा आलोचना खेपिरहेको सरकारले वैशाखभित्रै जयनगर–जनकपुर रेल चलाउने भन्दै तयारी गरिरहेको छ । यसअघिका रेल सेवा सञ्चालनका लागि ट्रेन सेट र रेलवे ट्रयाकमात्रै भएर पुग्दैन, छुट्टै कानुन, कर्मचारी पदपूर्ति र प्राविधिक टिमको बन्दोबस्ती पनि चाहिन्छ । ती तीन व्यवस्थापन बाँकी छँदै रेल सञ्चालनको मिति तोकिएको छ । 

भौतिक पूर्वाधार तथा यातायातमन्त्री वसन्त नेम्वाङले शुक्रबार र शनिबार धनुषा र महोत्तरीका सुरक्षा अधिकारी, राजनीतिकर्मी र स्थानीयसँगको भेटमा ‘वैशाखभित्रै रेल सञ्चालन’ हुने आश्वासन बाँडेका छन् । उनले रेल्वेका प्राविधिक टिमसहित ट्रलीमा चढेर रेल सञ्चालनको तयारी अनुगमनसमेत गरे । जनकपुर प्लेटफर्मबाट ट्रली चढेर मन्त्री नेम्वाङ सुरुमा इनर्वा रेल्वे स्टेसन पुगे । भारतसँग खरिद गरिएको दुई सेट रेल त्रिपाल ओढाएर इनर्वा स्टेसनमै राखिएको छ ।

मन्त्री नेम्वाङले रेलको इन्जिन र यात्रु कोच, रेल्वे स्टेसन, टिकट काउन्टर, लिकको अवस्था र सुरक्षा बन्दोबस्तबारे चासो राखेका थिए । उनलाई नेपाल रेल्वेका इन्जिनियर विनोद ओझाले रेलसम्बन्धी र धनुषा तथा महोत्तरीका सुरक्षा अधिकारीहरूले सुरक्षाबारे बिफ्रिङ गरे । ‘रेल छिटै सञ्चालनमा आउने मन्त्रीज्यूको भनाइ रह्यो,’ धनुषा प्रहरीका प्रमुख एसपी प्रकाश रानाभाटले कान्तिपुरसँग भने, ‘हामीले सुरक्षा प्रबन्धका बारेमा जानकारी गरायौं ।’

दुई वर्षअघि नै जयनगरदेखि जनकपुर हुँदै कुर्थासम्म ३५ किलोमिटर ब्रोडगेज रेल्वे लिक तयार भइसकेको छ । यस्तै, कुर्थादेखि करिब १८ किलोमिटर ब्रोडगेज लिक निर्माण पनि अन्तिम चरणमा छ । महोत्तरीको बिजलपुरादेखि बर्दिवाससम्मको लिक निर्माण भने मुआब्जा विवादले रोकिएको छ । मन्त्री नेम्वाङले शनिबार महोत्तरीका राजनीतिकर्मी र स्थानीय जग्गादातासित मुआब्जा विवादबारे पनि छलफल गरेका छन् ।

भारत सरकारले जयनगरदेखि बर्दिवाससम्म ६९ किलोमिटर ब्रोडगेज निर्माण गर्नेछ । उक्त खण्ड तयार भए जयनगरमा रहेका भारतका ठूलो रेल्वे जक्सनसँग नेपालको पूर्वपश्चिम राजमार्ग पनि जोडिनेछ । भारत सरकारले नेपालका लागि ब्रोडगेज लिक निर्माण गरे पनि रेल भने आफ्नै गुडाउन नेपालले गत साउनमा ८५ करोड रुपैयाँमा खरिद गरेको दुई सेट आधुनिक कोच कानुन, कर्मचारी र प्राविधिकको अभावमा थन्किएको छ । ‘लामो समयदेखि रेल सञ्चालन नहुँदा गलत सन्देश गएको छ । सबै प्रक्रिया टुंगाएर वैशाखभित्रै रेल सञ्चालनमा ल्याइनेछ,’ मन्त्री नेम्वाङको भनाइ उद्धृत गर्दै एमाले धनुषाका नेता शम्भु साहले भने, ‘बढीमा २० दिनभित्रमा रेल चलिसक्छ । त्यहीअनुरूप तयारी भइरहेको छ ।’

प्रकाशित : वैशाख ५, २०७८ ०८:३०
पूरा पढ्नुहोस्
प्रतिक्रिया
पठाउनुहोस्
×