चार सयको बीउ, एक लाखको साग- प्रदेश १ - कान्तिपुर समाचार

चार सयको बीउ, एक लाखको साग

कान्तिपुर संवाददाता

धनकुटा — ६ रोपनी क्षेत्रफल भएको टाहार बारीमा रायोको साग भरिएको छ । छथर जोरपाटी गाउँपालिका–६ मझुवाकी नेत्रकुमारी विष्टलाई सागको मुठा बाँध्दै डोकोमा राखेर बिक्रीको तयारी गर्न भ्याइनभ्याइ छ । उनले महिना दिनमा १ लाख रुपैयाँको साग बेचिसकिन् । ४ सयको बीउबाट उनले यति आम्दानी हात पारेकी हुन् ।

धनकुटाको छथर जोरपाटी गाउँपालिकाको मझुवाका किसान तरकारी बारीमा । तस्बिर : रमेशचन्द्र अधिकारी/कान्तिपुर

माघ दोस्रो सातादेखि बेच्न थालेकी विष्टले सुरुमा मुठाको २ रुपैयाँका दरले नै १ हजार ८ सय मुठा साग बेचेको सुनाइन् । सोचेभन्दा उल्लेख्य उत्पादन भएकाले कम मूल्यमा बेच्नुपरेको उनको भनाइ छ ।

‘अन्य तरकारीको दाँजोमा रायोको सागबाट बर्सेनि राम्रै आम्दानी हुन्छ,’ उनले भनिन्, ‘असिनाले क्षति नपुगेको भए आम्दानी अझ बढ्थ्यो ।’ सुरुमा २ रुपैयाँ मुठा बेचे पनि पछिल्लो महिनामा प्रतिमुठा ६ रुपैयाँमा बिक्री गरेको विष्ट बताउँछिन् । उनी जस्तै छिमेकी दुर्गाबहादुर थापाले पनि १ लाख रुपैयाँभन्दा बढीको साग बेचे ।

दुई सातापहिले असिनाले साग बालीमा सामान्य क्षति पुर्‍याए पनि अत्यधिक माग बढेकाले मनग्गे आम्दानी भएको उनको भनाइ छ । किसान दलबहादुर थापाले पनि ५० हजारभन्दा बढीको साग बेचेको बताए । मझुवा गाउँबाट यस वर्ष हालसम्म कम्तीमा १० लाखको रायोको साग बिक्री भइसकेको किसानले जानकारी दिए ।

छथर जोरपाटी गाउँपालिका–१ स्थित फलाटे गाउँबाटै यस वर्ष २५ लाख रुपैयाँको साग बिक्री भएको छ । २५ घर रहेको उक्त गाउँका प्रायः बासिन्दा तरकारी खेतीमा निर्भर छन् ।

सागबाट मात्रै औसत प्रतिघर १ लाखभन्दा बढी आम्दानी हुने गरेको स्थानीय युवराज कार्कीले बताए । कार्कीले तीन रोपनी क्षेत्रफलमा रायोको साग लगाएका छन् । यसबाट डेढ लाख रुपैयाँभन्दा बढी आम्दानी गरिसकेको उनले जानकारी दिए ।

प्रकाशित : चैत्र १६, २०७७ १४:०९
प्रतिक्रिया
पठाउनुहोस्

संविधानसभा सदस्य लक्ष्मीदेवी भण्डारीको निधन

कान्तिपुर संवाददाता

काठमाडौँ — संविधानसभा सदस्य लक्ष्मीदेवी भण्डारीको निधन भएको छ । कांग्रेस मुख्य सचिव कृष्णप्रसाद पौडेलका अनुसार भण्डारीको सोमबार बिहान ललितपुरको मेडिसिटी अस्पतालमा उपचारका क्रममा ७१ वर्षको उमेरमा निधन भएको हो ।

धनुषा जिल्ला जनकपुर उपमहानगरपालिका निवासी स्वर्गीय भण्डारी २०७० को संविधानसभा निर्वाचनमा समानुपातिक निर्वाचन प्रणालीअन्तर्गत नेपाली कांग्रेसको तर्फबाट संविधानसभा सदस्यमा निर्वाचित भएकी थिइन् ।

भण्डारीको निधनबाट एक अग्रज व्यक्तित्वलाई गुमाएको कांग्रेसले जनाएको छ । भण्डारीको निधनप्रति नेपाली कांग्रेसका सभापति शेरबहादुर देउवाले गहिरो दुःख व्यक्त गरेका छन् ।

संविधानसभा सदस्य लक्ष्मीदेवी भण्डारीले नेपालको लोकतान्त्रिक आन्दोलनहरुमा निर्वाह गरेको भूमिकाको स्मरण गर्दै सभापति देउवाले उनमा भावपूर्ण श्रद्धाञ्जली अर्पण गरेका छन् ।

प्रकाशित : चैत्र १६, २०७७ १३:५३
पूरा पढ्नुहोस्
प्रतिक्रिया
पठाउनुहोस्
×