ट्र्याक्टरको ठक्कर मोटरसाइकल चालकको मृत्यु- प्रदेश १ - कान्तिपुर समाचार

ट्र्याक्टरको ठक्कर मोटरसाइकल चालकको मृत्यु

कान्तिपुर संवाददाता

मोरङ — कटहरी गाउँपालिका ४ स्थित रंगेली सडकमा बिहीबार ट्र्याक्टरले दिएको ठक्करले मोटरसाइकल चालकको मृत्यु भएको छ । 

दुर्घटनामा धनपालथान गाउँपालिका ७ का ६० वर्षीय मुस्तफी मियाँको मृत्यु भएको प्रहरीले जनाएको छ ।

को२त ६१२७ नम्बरको ट्र्याक्टरले को३प ३३०९ नम्बरको मोटरसाइकललाई ठक्कर दिँदा घाइते भएका मोटरसाइकल चालक मियाँको विराटनगरस्थित न्यूरो अस्पतालमा उपचारको क्रममा मृत्यु भएको जिल्ला प्रहरी मोरङका प्रहरी नायब उपरीक्षक मानबहादुर राईले जानकारी दिए ।

ट्र्याक्टर र चालकलाई नियन्त्रणमा लिइएको राईले बताए ।


प्रकाशित : चैत्र १२, २०७७ १७:३८
प्रतिक्रिया
पठाउनुहोस्

ब्युँतियो माओवादी केन्द्र निकट विद्यार्थी संगठन

कान्तिपुर संवाददाता

काठमाडौँ — नेकपा (माओवादी केन्द्र) निकट विद्यार्थी संगठन अनेरास्ववियू (क्रान्तिकारी) ब्युँताइएको छ । बिहीबारको पदाधिकारी बैठकले रञ्जित तामाङ नेतृत्वको अनेरास्ववियू (क्रान्तिकारी) लाई पुनर्जीवित गर्ने निर्णय गरेको उपाध्यक्ष सुरेन्द्र बस्नेतले जानकारी दिए ।

फागुन २३ गतेको सर्वोच्च अदालतको निर्णयपछि तीन वर्षअघि एकता भएको माओवादी केन्द्र र एमाले फेरि अलग भएका हुन् । माउ पार्टी छुट्टिएपछि विद्यार्थी संगठनहरु पनि अलग भएका हुन् ।

यसअघि एमाले निकट अनेरास्ववियुसँगको एकतापछि अनेरास्ववियू नाम राखिएको थियो ।

उपाध्यक्ष बस्नेतका अनुसार यही १४ गते काठमाडौंमा बस्ने क्रान्तिकारीको केन्द्रीय कमिटीको विस्तारित बैठकबाट नयाँ परिस्थितिमा संगठनको योजना र कार्यक्रम आउने छन् । क्रान्तिकारीको उपाध्यक्षहरुमा बस्नेत, दिपक देवकोटा, तिलकराज भण्डारी, विजय गौतम, पञ्चा सिंह, दिपेश पुन, इन्द्र भुषाल, रविकिरण यादव छन् ।

त्यस्तै महासचिवमा उत्तम अधिकारी र उपमहासचिवमा जीपी मैनाली र तुकमान महरा रहेका छन् ।

सचिवमा नरेश रेग्मी, पवन कार्की, मदन भट्टराई, सूर्यनारायण शाह, क्षितिज सापकोटा, नारायण खनाल, अम्मरराज शाही, राजकुमार लिम्बू, अच्युत भट्ट, गजेन्द्र देव, प्रविणा अधिकारी, मदन भुल र कोषाध्यक्षको जिम्मेवारीमा केशव रावल छन् ।

प्रकाशित : चैत्र १२, २०७७ १७:३४
पूरा पढ्नुहोस्
प्रतिक्रिया
पठाउनुहोस्
×