बिहे घरमा डकैती, ४ जना घाइते- प्रदेश १ - कान्तिपुर समाचार

बिहे घरमा डकैती, ४ जना घाइते

देवनारायण साह

मोरङ — केराबारी गाउँपालिका ७ नर्कटेस्थित एक बिहे घरमा गुण्डागर्दी गरेर एक समूहले शनिबार बिहान ३/४ बजेतिर डकैती गरेको छ । स्थानीय भागीमान लिम्बूको घरबाट डाँकाहरुले ६ लाख मूल्य बराबरको नगद तथा गरगहना लुटेर लगेको प्रहरीले जनाएको छ ।

डाँकाहरुले प्रहार गरेको घरेलु हतियारले बेहुलीका बुवालगायत चार जना घाइते भएका छन् । बेहुलीका भागीमान, दिदी सविना लिम्बू राई, कान्छा मामा केराबारी ९ का भगत याक्खा र जन्ती आएका भोजपुरका रमेश राई डाँकाले प्रहार गरेको घरेलु हतियारले घाइते भएका छन् । उनीहरुको न्यूरो अस्पताल विराटनगरमा उपचार भइरहेको प्रहरी उपरीक्षक सन्तोष खड्काले बताए ।

घाइतेमध्ये भागीमान र भगतको अवस्था गम्भीर छ । उनीहरुको टाउको, खुट्टा, हात, अनुहारलगायत शरीरका विभिन्न भागमा गहिरो चोट लागेको उपचारमा संलग्न चिकित्सकले बताए । खुकुरी प्रहार गरिएका भागीमानको टाउकोमा १३ वटा टाँका लगाइएको छ । भगतको दायाँतर्फको करङबाट भालाले प्रहार गरेकाले फोक्सोमा चोट देखिएको चिकित्सकको भनाइ छ ।

लिम्बूकी छोरी सम्झनाको विवाह सकिएर सबै जना सुतेपछि १०/१५ जनाको समूहमा आएका डाँकाहरुले आक्रमण गरी डकैती गरेको जिल्ला प्रहरी मोरङले जनाएको छ । बिहे सम्पन्न भएपछि साउण्ड सिस्टम बन्द गरेर घरका सबै जना सुतिसकेको अवस्थामा मादक पदार्थ सेवन गरी राति १० बजे आएका युवाहरुको समूहले साउण्ड बजाएर नाच्न पाउनुपर्ने भन्दै विवाद गरेका थिए । ‘स्थानीयले उनीहरुलाई सम्झाईबुझाई गरी फर्काइ दिएको तर त्यसको १ घण्टापछि पुन: आएर होहल्ला गर्न थालेपछि इलाका प्रहरी केराबारीका प्रहरी टोली घटनास्थल पुगेपछि उनीहरु भागेका थिए,’ उनले भने, ‘राति ३ बजेतिर त्यही समूहले घरेलु हतियारसहित ढुंगामुढा गर्दै बिहे घरमा आक्रमण गरेर लुटपाट मच्चाएको छ ।’

प्रहरी टोली आएको सुनेपछि डाँकाहरु भागेका थिए । उनीहरुले बिहेमा बेहुलीको नाममा जम्मा भएको दुई लाख ३५ हजार ५ सय ४० रुपैयाँ नगद र बेहुलीले लगाएका सुनचाँदीका गहना, बेहुलीले अर्को ठाउँमा राखेको ५ तोला सुन र चाँदीका गहनालगायत करिब ६ लाख मूल्य बराबरको धनसम्पत्ति लुटेर लगेको खड्काले बताए ।

डकैती गर्ने समूहमा केराबारीका मुस्कान चेम्जोङ लिम्बू, निशान चेम्जोङ लिम्बू, विश्वास लिम्बू, भाइराजा लिम्बूलगायत संलग्नहरुको खोजी कार्य भइरहेको उनले बताए ।

प्रकाशित : फाल्गुन १५, २०७७ १९:५५
प्रतिक्रिया
पठाउनुहोस्

साताका ७ तस्बिर

कान्तिपुर संवाददाता

काठमाडौँ — यो साता हामीलाई उत्कृष्ट लागेका ७ तस्बिरहरु ।सर्वोच्च अदालतले प्रतिनिधिसभा विघटनको निर्णय बदर गरेको खुसियालीमा मंगलबार माइतीघरमा दिपावली गरेर खुसियाली मनाउँदै । तस्बिर :हेमन्त श्रेष्ठ

प्रतिनिधिसभा पुन:स्थापनाको खुसियालीमा नेकपाको दाहाल–नेपाल समूहले काठमाडौंमा बुधबार निकालेको विजय जुलुसमा आफ्नो अनुहारमा नेकपाको चिन्ह पोतेर जुलुसमा सहभागी एक महिला । तस्बिर: अंगद ढकाल

नेपाल सरकारले भारतको सेरम इन्स्टिच्युट अफ इन्डियाबाट उत्पादित कोभिड–१९ विरुद्धको १० लाख डोज ‘कोभिशिल्ड’ खोप आइतबार एयर इन्डिया दिल्लीको विमानबाट काठमाडौंको त्रिभुवन अन्तर्राष्ट्रिय विमानस्थलमा अवतरणपछि । तस्बिर : अंगद ढकाल

कमलपोखरी पुन:निर्माणका क्रममा कंक्रिटको प्रयोगको विरोधमा शुक्रबार नागरिक समाजले गरेको आन्दोलनमा प्रहरी हस्तक्षेप गर्दै । तस्बिर : संजोग मानन्धर

मकवानपुरस्थित इन्द्र सरोवर घुम्न आएका आन्तरिक पर्यटकहरु डुगांमा चडेर तस्बिर खिच्दै । कोरोना संक्रमणका कारण गरिएको निषेधाज्ञापछि विस्तारै आन्तरिक पर्यटकहरु बढिरहेको स्थानीयहरु बताउछन् । तस्बिर :दिपेन्द्र रोक्का

मूलपानी नजिकै रहेको मनोहराखोलामा सामान बोकेको मोटरसाइकल खोलाबाट तर्दै । सो क्षेत्र आसपास पुल नहुँदा सर्वसाधरणहरु यसरी नै आवतजावत गर्न बाध्य छन् । तस्बिर : दिपक केसी

थानकोट भिमफेदी जोड्ने सुरुङ मार्गको काम गर्दै कामदारहरु । तस्बिर: इलिट जोशी


प्रकाशित : फाल्गुन १५, २०७७ १९:३६
पूरा पढ्नुहोस्
प्रतिक्रिया
पठाउनुहोस्
×