दोषी जोगाउन खोजेको पीडित परिवारको आरोप- प्रदेश १ - कान्तिपुर समाचार

दोषी जोगाउन खोजेको पीडित परिवारको आरोप

कान्तिपुर संवाददाता

मोरङ — उर्लाबारी–५ का ३१ वर्षीय प्रवीण बाँस्तोलाको हत्या घटनामा सत्यतथ्य लुकाएर दोषीलाई उन्मुक्ति दिने षड्यन्त्र गरेको भन्दै मृतकका परिवारजनले मंगलबार विराटनगरमा प्रदर्शन गरेका छन् ।

उनीहरूले सरकारी वकिलको कार्यालय, जिल्ला प्रशासन र जिल्ला प्रहरीमा न्याय प्राप्तिका लागि सहयोग गर्न आग्रह गरे । मृतककी बहिनी सदीक्षा बाँस्तोलाको नेतृत्वमा आएका आफन्त र स्थानीयले इलाका प्रहरी उर्लाबारीविरुद्ध नाराबाजी गरेका थिए ।

इप्रकाका प्रहरी निरीक्षक उद्धव पोखरेललाई निलम्बन गरी छानबिन गर्न पीडित परिवारको माग छ । मृतककी बहिनी सदीक्षाले जिल्ला न्यायाधिवक्ता मनोजकुमार आचार्यलाई न्याय प्राप्त हुने गरी मुद्दा दर्ता गराइदिन आग्रह गरिन् ।

आचार्यले प्रहरीले अनुसन्धान गरी फाइल बुझाएको, शव परीक्षण र फरेन्सिक प्रतिवेदन पनि आइसकेकाले चाँडै जिल्ला अदालतमा मुद्दा दर्ता गर्ने तयारीमा जुटेको बताए । उनले सरकारवादी मुद्दा भएकाले आफूहरूले काम गर्ने तर मुद्दा विवादित भइसकेकाले व्यक्तिगत रूपमा पनि वकिल राख्न सुझाव दिए । मृतकका आफन्तले प्रमुख जिल्ला अधिकारी कोषहरि निरौलालाई पनि न्याय प्राप्तिमा सघाइदिन आग्रह गरेका छन् ।

बाँस्तोलाको शव पुस ५ गते स्थानीय गोदावरी अस्पताल ल्याएपछि मात्रै खबर पाएको परिवारको भनाइ छ । उर्लाबारी–४ स्थित रमेश गिरीको घरमा डेरा गरी बस्दै आएका रिकेश शिवा भन्ने मेहरमान दर्जीले प्रवीणलाई पुस ४ गते फोन गरेर बोलाएका थिए । रिकेश, दीपेश पौडेल, राजेश रणपहेलीसँगै प्रवीणले उर्लाबारी पूर्वपट्टिको बस स्टेन्डनजिक सौरवी होटलमा रक्सी खाएर सबै जना रिकेशको डेरामा सुत्न गएका थिए । घटनाको भोलिपल्टै पक्राउ गरेका रिकेश, दीपेश र राजेश रिहा भइसकेका छन् ।

आइतबार इलाका प्रहरीमा बुझ्न जाँदा अनुसन्धान गरिएको फाइलमा मृतकको नभएर अर्केको फोटो भेटाएपछि परिवारजन आक्रोशित भएका थिए । प्रहरीले अनुसन्धानपछि फाइल सरकारी वकिलको कार्यालयमा बुझाएको तर त्यहाँबाट मुद्दा चल्न नसक्ने भन्दै फाइल फिर्ता गरिदिएको थियो । उक्त घटनामा जिल्ला प्रहरी मोरङले प्रहरी नायब उपरीक्षक मानबहादुर राईको नेतृत्वमा छानबिन टोली गठन गरी अनुसन्धान गरिरहेको छ ।

प्रकाशित : फाल्गुन ११, २०७७ २०:०७
प्रतिक्रिया
पठाउनुहोस्

प्रतिनिधिसभा पुन:स्थापना गर्ने फैसला ऐतिहासिक : दाहाल

कान्तिपुर संवाददाता

काठमाडौँ — नेकपा अध्यक्ष पुष्पकमल दाहालले प्रतिनिधिसभा पुन:स्थापना गर्ने फैसला ऐतिहासिक भएको बताएका छन् ।

सर्वोच्च अदालतले प्रतिनिधिसभा विघटन गर्ने सरकारको निर्णय बदर गरेपछि मंगलबार साँझ चितवनमा आयोजित कार्यक्रममा दाहालले आफूलाई गौरवको अनुभूति भएको र यो ऐतिहासिक फैसला रहेको बताएका हुन् । उनले यसअघि तोकिएका विरोध कार्यक्रमलाई देशभर विजय जुलुसका रुपमा मनाउन पार्टी पंक्तीलाई अपील गरे । 'अब हाम्रो विरोध प्रदर्शन विजय र्‍यालीमा परिणत भयो । हामी यहाँ प्रवेश गर्नेवित्तिकै बडो गौरवको फैसला आयो, यो ऐतिहासिक छ । म पार्टीको तर्फबाट देशभरि भएका साथीहरुलाई विजय र्‍याली गर्न विशेष अपील गर्छु ।'

उनले संसद् पुन:स्थापना सबैको जित भएको उल्लेख गर्दै विभिन्न राजनीतिक दल, पार्टीका नेता, कार्यकर्ता, नागरिक समाज, बुद्धिजीवी लगायत आन्दोलनमा उत्रिएका सबै जनालाई बधाई र धन्यवाद दिए ।दाहालले संवैधानिक इजलासका प्रधानन्यायाधीश, न्यायधीशहरुको आजको फैसला ऐतिहासिक र सहासिक भन्दै उनीहरुलाई पनि बधाइ दिए ।

अब राजनीतिक दलहरुबीच सहमति र समझदारी गरी अगाडि बढ्ने भन्दै दाहालले यो आफूहरुको लडाइँ कुर्सीको होइन, संविधान ट्याकमा ल्याउने भने जसरी फैसला आएको बताए ।

उनले नेकपा केपी ओली समूहमा लागेकाहरुलाई आफू नेतृत्वको पार्टीमा फर्कन समेत अपीले गरे ।

यस्तै अर्का अध्यक्ष माधवकुमार नेपालले आफूहरु विजयोत्सवमा रहेको भन्दै ओली युगको अन्त्य भएको बताए । 'निरंकुश बन्ने प्रवृत्तिले पराजय बन्न पर्‍यो । सत्यको जित भयो । न्यायको जित भयो । नेपाली जनताको जित भयो । हामी खुसी छौं,' उनले भने, 'यसका लागि सबभन्दा पहिले न्यायका पक्षमा दृढताका साथ संघर्षका मैदानमा उत्रिने बहादुर नेपाली जनतालाई हार्दिक हार्दिक क्रान्तिकारी लालसलाम टक्र्याउन चाहन्छु ।'

संविधानको सर्वोच्चतालाई कायम राख्न, विधिको शासनको पक्षमा दृढताका साथ उभिने, प्रतिनिधिसभा विघटनको विरोधमा उत्रने सबै पक्षलाई उनले धन्यवाद दिए । यो फैसला ऐतिहासिक र संविधानलाई लिकमा ल्याउने भएको नेपालको भनाइ थियो ।


प्रकाशित : फाल्गुन ११, २०७७ १९:४८
पूरा पढ्नुहोस्
प्रतिक्रिया
पठाउनुहोस्
×