धरानमा १२ वर्षपछि बाक्लो हुस्सु- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

धरानमा १२ वर्षपछि बाक्लो हुस्सु

मंगलबार यहाँको न्यूनतम तापक्रम १४.४ डिग्री सेल्सियस र भिजिबिलिटी ५० मिटरभन्दा कम थियो
कान्तिपुर संवाददाता

सुनसरी — धरानमा मंगलबार बिहानदेखि लागेको बाक्लो हुस्सुले चिसो बढाएको छ । जसका कारण जनजीवन प्रभावित बनेको छ । हुस्सुले ‘भिजिबिलिटी’ ५० मिटरभन्दा पनि कम थियो । तीनतिर पहाडले घेरिएको र एकातिर तराईको चारकोसे जंगलसँग जोडिएको धरान भौगोलिक बनावटअनुसार हुस्सु वा भुइँकुहिरो अत्यन्तै कम लाग्ने क्षेत्र मानिन्छ ।

विगतका हिउँदमा बिहान केहीबेर पातलो हुस्सु लागे पनि दिनमा घाम लाग्ने गरेको थियो । धरानस्थित जल तथा मौसम विज्ञान कार्यालयका अनुसार २०६५ सालको पुसमा दुई सातासम्म यहाँ बाक्लो हुस्सु लागेको थियो । ‘यतिबेला तराईमा शीतलहर चल्नु सामान्य हो । तर लामो समयपछि धरानमा पानीको वाष्फीकरणसहितको बाक्लो हुस्सु लाग्नुमा पश्चिमी न्यून चापीय प्रणालीको असर मुख्य कारण हो,’ कार्यालयका सहायक मौसमविद् अखिलेश चौरसियाले भने । उनका अनुसार मंगलबार धरानको न्यूनतम तापक्रम १४.४ डिग्री सेल्सियस थियो ।

नेपाल उड्डयन प्राधिकरण, धरान उपमहानगरपालिका र एक निजी संस्थाले पटक–पटक गरेको पर्यावरण र वातावरणीय भौगोलिक सर्वेको प्रतिवेदनमा यहाँ हुस्सु नलाग्ने, यदि लागिहाले भिजिबिलिटीसहितको पातलो मात्र लाग्ने उल्लेख थियो । चौरसियाले भने, ‘धरानको भूगोल तराईसँग मिल्दोजुल्दो भएकाले तराईको शीतलहर उत्तरतर्फ सर्दै जाँदा हुस्सुको रूप लिएको हो । तर यो शीतलहर भने होइन । शीतलहर तराईको मौसमी गतिविधि हो । धरानमा शीतलहर चल्दैन, हुस्सुको रूप मात्र लिएको देखिन्छ ।’

जलवायु तथा मौसम विज्ञानअनुसार सामान्यतया भू–सतहको माथि रहेको आद्र्र हावा अत्यधिक चिसो भएपछि जलकणको समूहमा परिणत भई धुन्धको रूपमा बसिरहेको हुन्छ । त्यसैलाई कुहिरो वा हुस्सु लागेको भनिन्छ । बादलको निर्माण प्राय: तातो हावामाथि गई चिसो हुने कारणले हुन्छ । चौरसियाले भने, ‘तर यिनीहरूको निर्माण धरातलीय सतहको नजिक विकिरण परिचालन तथा तातो र चिसो हावाको सम्मिश्रणबाट हुने गर्छ । धरानमा देखिएको हुस्सु एक किसिमको बादल नै हो । जुन सामान्य बादलभन्दा विपरीत धरातलसँग जोडिएर भिजिबिलिटी कम गराउँछ ।’

जलकणसहितको हुस्सु दिनभर वा केही हप्तासम्म आकाशलाई ढाकेर बसेमा सूर्यको किरण जमिनसम्म आउन छेकिने र यस्तोमा जलकणको व्यास सय माइग्रेनभन्दा कम हुने बताए ।

प्रकाशित : पुस २८, २०७७ १९:४५
प्रतिक्रिया
पठाउनुहोस्

घूस रकमसहित हवल्दार अख्तियारको नियन्त्रणमा

सम्झना रसाइली

तनहुँ — तनहुँमा एक प्रहरी हवल्दारलाई घूस रकमसहित अख्तियारको टोलीले नियन्त्रणमा लिएको छ ।

नियन्त्रणमा रहेका व्यक्ति छुटाइदिने भन्दै घूस लिएको अवस्थामा इलाका प्रहरी कार्यालय बेलचौताराको महिला तथा बालबालिका सेवा केन्द्रमा कार्यरत प्रहरी हवल्दार शान्ति भण्डारीलाई अख्तियार दुरुपयोग अनुसन्धान आयोग पोखराको टोलीले मंगलबार नियन्त्रणमा लिएको हो ।

प्रहरी हवल्दार भण्डारीले विभिन्न बहाना बनाई सेवाग्राहीसँग १० हजार रुपैयाँ घूस मागिरहेको सूचनाका आधारमा टोलीले नियन्त्रणमा लिएको आयोगका सूचना अधिकारी मेघनाथ रिजालले जानकारी गराएका छन् । पक्राउ परेका भण्डारीमाथि थप अनुसन्धान भइरहेको उनले बताए ।

प्रकाशित : पुस २८, २०७७ १९:१२
पूरा पढ्नुहोस्
प्रतिक्रिया
पठाउनुहोस्
×