चैते रोपाइँको चटारो
पाँचथर — पाँचथरका किसानलाई यतिखेर चैते धान रोप्ने चटारो छ । यो बेला रोपिने धान असार अन्तिममा पाक्छ । मध्य बर्खामा पाकेको धान साउनदेखि सुरु हुने सबै खालका चाडपर्व मनाउन प्रयोग गर्न सकिने भएकाले महत्व साथ रोपिने किसानहरु बताउँछन् ।
रोपाइँका लागि खेतमा निस्केका पुरुष कोही मल छर्न कोही जोत्न, कोही हिलोआली गर्न, कोही दाँते लगाएर गह्रा सम्माउन, कोही फ्याउरी लगाएर हिलो माटो मिलाउने व्यस्त भेटिन्छन् । महिलालाई बीऊ काढ्न र गह्रासम्म बीऊका मुठा पुर्याउन अनि तयार पारिएको माटोमा छुपुछुपु धान रोप्न भ्याइनभ्याइ छ ।
पाँचथरको फिदिम नगरपालिका फिदिम-२ को होक्मा खोला नजिकैको फाँटमा गोरु नारेर हिलोमाटो तयार गरिरहेका कृष्ण तामाङले चैते धान रोप्ने किसानलाई स्थानीय, प्रदेश र संघीय सरकारसँगै कृषि ज्ञान केन्द्रजस्ता सरोकारवाला निकायले वास्ता नगरेको गुनासो गरे । पाँचथरको फिदिम नगरपालिकासँगै हिलिहाङ मिक्लाजुङ, तुम्वेवा र कुम्मायकका फाँटमा चैते धान रोपिन्छ । पाँचथरसँगै कोशी प्रदेशका तराई र हिमाली जिल्लामा समेत यो धान रोपिन्छ ।
