काठमाडौँ — गाडी व्यवसायीहरुले आफ्ना सोरुमहरूमा कालो ब्यानर टाँगेर विरोध जनाएका छन् । बैंकहरुको उच्च ब्याजदर, राष्ट्र बैंकले ल्याएको चालु पुँजी कर्जासम्बन्धी मार्गदर्शन, सवारीसाधन आयात गर्दा पहिले नै नगद (मार्जिन) जम्मा गर्नुपर्ने व्यवस्था लगायतका विषयमा विरोध जनाउँदै व्यवसायीले आफ्ना सोरुमहरुमा कालो ब्यानर झुन्ड्याएका हुन् ।

सरकारले सवारीसाधनको आयातमा लगाएको बन्देज भने पुसदेखि लागू हुनेगरी खुल्ला भएको छ । यसअघि व्यवसायीले सवारीसाधनको आयात खुल्ला गर्नुपर्ने भन्दै सडकमै विरोध प्रदर्शन गरेका थिए । हाल बैंकको ब्याज उच्च हुँदा सवारीसाधन किन्नेहरु घटेको र व्यवसायमा असर परेको व्यवसायीको गुनासो छ । त्यस्तै चालु पुँजी कर्जासम्बन्धी राष्ट्र बैंकको व्यवस्थाले बैंकबाट ऋण लिने व्यवसायीलाई असहज हुने र लगानीयोग्य रकमको अभावले व्यवसायमा असर परेको व्यवसायीको भनाइ छ ।

राजस्वमा २१ प्रतशित योगदान दिने अटोबाइल्स क्षेत्रलाई सरकारले उपेक्षा गरेको नाडाका अध्यक्ष ध्रुव थापा बताउँछन् । बैंकहरुले गाडी खरद गर्दा दिने ऋणको सीमा कम भएको भन्दै व्यवसायीले विरोध जनाएका छन् । हाल निजी सवारीसाधन खरिदका लागि बैंकहरूले कुल मूल्यको ५० प्रतिशत मात्रै कर्जा प्रवाह गर्न पाउने व्यवस्था छ । गाडी किन्न चाहनेले बाँकी ५० प्रतिशत रकम नगद जुटाउनुपर्छ ।