उत्तरदायित्वबाट टाढिएको नेतृत्व

मुलुकको समग्र विकास, जनहितबारे उनीहरूले चासो दिएका छैनन् । कांग्रेस मुलुकको समग्र बेथिति, विसंगतिको निराकरण गर्ने हिम्मत राखेर खडा हुनुपर्ने थियो, त्यसभित्र विचार र शक्तिमा अरू दललाई ह्याकुलाले मिच्नुपर्ने क्षमता हुनुपर्ने थियो, तर गतिविधि त्यसको विपरीत छ ।

यतिबेला साना–ठूला गरी तीन दर्जनभन्दा बढी बचत तथा ऋण सहकारी संस्थामा सर्वसाधारणले जम्मा गरेको ठूलो रकम हिनामिना भएको समाचार आइरहेका छन् । सहकारीको बेथितिबाट २५ प्रतिशत जनता प्रभावित भई अर्थतन्त्रको तेस्रो खम्बा गर्लम्मै ढल्ने अवस्थामा छ । जनतामारा लुटेराहरूले ठगेको सम्पत्ति विदेशमा लगेर लुकाउने अवस्था सिर्जना हुँदा पनि सरकार र प्रतिपक्षी दल गम्भीर देखिँदैनन् ।

ठगीको लामो शृंखला टुलुटुलु हेर्दै आएको, समस्या समाधान गर्न कुनै चासो नदेखाएको कांग्रेस गृहमन्त्री रवि लामिछानेविरुद्ध किन यति उग्र भएको भन्ने सबाल पनि खडा भएको छ । वस्तुतः सानाठूला दल एवं केन्द्रदेखि गाउँसम्मका सरकार सहकारीको ठगी, लुटपाट हेरेर थाकेका छैनन्, उल्टै तमासे बनिरहेका छन् ।

दुःखजिलो गरेर कमाएको आफ्नै रकम अपराधीहरूले लुटेर मोज गरिरहँदा, पीडितमाझ रुवाबासी मच्चिँदा समेत नेतृत्वमा दयामाया, करुणा र उत्तरदायित्वको भाव देखिँदैन । २०४८ सालको सहकारी ऐनमा व्यक्तिका साथै कम्पनी, एनजीओ लगायतलाई सहकारीमा समावेश गर्न सकिने प्रावधान हटाउनुका साथै लुटेराहरूलाई तुरुन्त धरपकड गरेर कारबाही नगरेसम्म देशभर कोलाहाल मच्चिरहनेछ ।
– भुवनेश्वर शर्मा, चन्द्रागिरि–२, काठमाडौं