वडाध्यक्षदेखि प्रधानमन्त्रीसम्मको सम्पत्ति छानबिन गराएरै छाड्छु : मन्त्री गुरुङ
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
पाल्पा — कानुन, न्याय तथा संसदीय मामिलामन्त्री धनराज गुरुङले भ्रष्टाचारमा संलग्न कोही कसैलाई छुट नहुने बताएका छन् । आफू कानुनमन्त्री भएकै समयमा मुलुकमा सुशासन कायम गराउने र कुनै पनि मान्छेलाई भ्रष्टाचारबाट उन्मुक्ति नदिने बताए ।
![](https://assets-cdn.ekantipur.com/uploads/source/ads/900x100-1172024092759.gif)
![वडाध्यक्षदेखि प्रधानमन्त्रीसम्मको सम्पत्ति छानबिन गराएरै छाड्छु : मन्त्री गुरुङ](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2024/third-party/dhan-raj-gurung-3-0232024011218-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
पाल्पाको तानसेनमा शनिबारदेखि सुरु तानसेन महोत्सव उद्घाटन गर्दै मन्त्री गुरुङले मुलुकमा सुशासन र आर्थिक पारदर्शिता कायम गर्न वडाध्यक्षदेखि मन्त्री र प्रधानमन्त्री पदमा रहेकासम्मको सम्पत्ति छानबिन गराएरै छाड्ने उनले बताए । मन्त्री गुरुङले मुलुकमा भ्रष्टाचार कायम रहेसम्म आर्थिक सुशासन कायम गर्न नसकिने दाबी गरे । यसका लागि सबैको साथ र सहयोग जरुरी रहेको बताए ।
कोही नेता वा मन्त्री जनताका मालिक नभई सेवक भएकाले पहिला आफै बदलिएर देखाउनुपर्नेमा मन्त्री गुरुङको जोड थियो । ‘ज्वरो आउँदा एउटा नेपालीले सिटामोल खान नपाउने अवस्था छ,’ उनले भने, ‘तर सिंहदरबार छिर्नेहरु किर्ना र उपियाँजस्तै मोटाउने प्रवृत्तिको अन्त्य गर्नुपर्छ ।’
जनताको अघि आफै पारदर्शी भएर देखाउनुपर्ने बेला आएको भन्दै मन्त्री गुरुङले सडकबाट आएकाले सडकमै जान तयार भएको बताए । मन्त्री गुरुङले स्वर्गीय कृष्णप्रसाद भटराईको आफू अनुयायी भएको बताउँदै भने, ‘म झुपडीमा जन्मेको मान्छे हुँ । पुनः सडकमै र झुपडीमै फर्किन तयार छु । म जस्ता नेता पहिला बदलिन जरुरी छ ।’
भ्रष्टाचार भयो भन्ने तर सुशासन कायम गर्न नदिने समस्या रहेको उनले बताए । राजनीति देश र जनताको लागि गर्नुपर्नेमा स्वयंका लागि गरेकाले नेपाली जनतालाई माथि उठाउन नसकिएको उनको भनाइ छ ।
नेताहरुको कर्मले गर्दा जनता दुःखी भएको उनले बताए । मन्त्री गुरुङले जनताका लागि राजनीति गर्ने कि आफैका लागि भन्ने अवस्था अहिले आएको बताए ।
![](https://assets-cdn.ekantipur.com/uploads/source/ads/900-x-100-0172024023126.gif)