उपत्यकाबाट हराएका २३ मोटरसाइकल फेला, सम्बन्धित धनीलाई बुझाइयो- उपत्यका - कान्तिपुर समाचार

उपत्यकाबाट हराएका २३ मोटरसाइकल फेला, सम्बन्धित धनीलाई बुझाइयो

रासस

काठमाडौँ — ट्राफिक प्रहरीले काठमाडौं उपत्यकाबाट हराएका २३ मोटरसाइकल फेला पारी सम्बन्धित धनीलाई बुझाएको छ । 

महानगरीय ट्राफिक प्रहरी महाशाखाबाट सादा पोशाकमा खटिएको प्रहरी टोलीले उपत्यकाका विभिन्न स्थानबाट विभिन्न समयमा हराएका १५ मोटरसाइकल र आठ स्कुटर फेला पारेर आज सम्बन्धित धनीलाई बुझाएको हो ।

महाशाखाले उपत्यकाको चक्रपथ, नयाँ बानेश्वर, वसुन्धरा, पुरानो बानेश्वर, नारायणटार, नागार्जुन, सातदोबाटो, कोटेश्वर, काँडाघारी, भैँसेपाटी, कपन, सानेपा, माकलवारी, टोखालगायतका स्थानबाट हराएका मोटरसाइकल एवं स्कुटर आज सम्बन्धित धनीलाई जिम्मा लगाएको हो ।

कार्यक्रममा महाशाखाका प्रमुख एवं प्रहरी वरिष्ठ उपरीक्षक (एसएसपी) जनक भट्टराईले सादा पोशाकमा खटिएको प्रहरी टोलीले विशेष सूचना संकलन तथा सुराकीमार्फत मोटरसाइकल बरामद गर्दै आएको जानकारी दिए । उनले एकान्त ठाउँमा पार्किङ नगर्नसमेत सवारी धनीलाई आग्रह गरे ।

महाशाखाले चालू आर्थिक वर्षमा उपत्यकाका विभिन्न स्थानबाट हराएका १७६ मोटरसाइकल फेला पारेर सम्बन्धित धनीलाई जिम्मा लगाइसकेको छ भने चोरीमा संलग्न २१ जनालाई पक्राउ गरी कारबाहीका लागि उपत्यकाका विभिन्न वृत्तमा पठाइसकेको छ ।

प्रकाशित : मंसिर १२, २०७८ १६:३६
प्रतिक्रिया
पठाउनुहोस्

कांग्रेस कञ्चनपुरको सभापतिमा बोगटी विजयी 

भवानी भट्ट

कञ्चनपुर — नेपाली कांग्रेस कञ्चनपुरको सभापतिमा संस्थापन पक्षका पदम बोगटी निर्वाचिन भएका छन् । संस्थापन पक्षकै अर्का उम्मेदवार बहादुरसिंह थापालाई पराजित गर्दै बोगटी निर्वाचित भएका हुन् । 

शनिबार भएको मतदानको मत परिणाम आइतबार सार्वजनिक भएको हो । जसअनुसार बोगटीले ८०६ र थापाले ७१५ मत प्राप्त गरे ।

बोगटी संस्थापन पक्षकै केन्द्रीय सदस्य रमेश लेखक निकट हुन् भने थापा केन्द्रीय सदस्य एनपी साउद निकट हुन् । दुवैले प्यानल बनाएरै चुनाव लडेका थिए । निर्वाचन समितिका अनुसार उपसभापतिमा मीनबहादुर सिंह र हरिशचन्द्र राना विजयी भएका छन् । सचिवमा हेमराज ओझा र भीमराज भट्ट निर्वाचित भएका छन् ।

यसैगरी सहसचिवमा नाफुसिंह साउद र पुष्कल चौधरी विजयी भएका छन् । जिल्ला समितिका लागि शनिबार भएको निर्वाचनमा १६ सय १८ मतदातामध्ये १५ सय ७१ मत खसेको थियो ।


प्रकाशित : मंसिर १२, २०७८ १६:३३
पूरा पढ्नुहोस्
प्रतिक्रिया
पठाउनुहोस्
×