नौमती बजाएर पनि उठेन कर- उपत्यका - कान्तिपुर समाचार
कान्तिपुर वेबसाईट
AdvertisementAdvertisement

नौमती बजाएर पनि उठेन कर

७२ ठूला करदाताको नाम सार्वजनिक गरिएकोमा १५ जनाले मात्रै तिरे 
स्वास्थ्य राज्यमन्त्रीकै जनमैत्री अस्पतालले आंशिक मात्रै कर बुझायो
फोहोर व्यवस्थापनमा भएको ढिलाइले कर असुली प्रभावित : महानगर
कान्तिपुर संवाददाता

काठमाडौँ — काठमाडौं महानगरपालिकाले साउन १६ र २५ गते सूचना जारी गर्दै घरजग्गा/सम्पत्ति कर नतिर्ने ठूला करतादाको नाम सार्वजनिक गर्‍यो । ७२ ठूला करदाताको नाम सार्वजनिक गरेसँगै कर तिर्न ३० दिने अल्टिमेटमसमेत दियो ।

करदातालाई सूचित गर्न घरघरमा गएर माइकिङ गर्ने, सूचना टाँस्ने काम भयो । भदौ ९ मा त महिला समूह नै लगाएर नौमती बाजासमेत बजाइयो । तर महानगरले अनुमान गरेजस्तो कर उठ्न सकेन । अहिलेसम्म १५ जना करदाताले मात्र कर तिरेका छन् । जसमध्ये ८ जनाले आंशिक र ७ जनाले पूरा कर चुक्ता गरेको महानगरअन्तर्गतको राजस्व विभागले जनाएको छ ।

महानगरले सार्वजनिक गरेको सूचीमा कर तिरिसकेको सूचीमा अम्बे कम्प्लेक्सको पनि नाम समावेश थियो । पछि विभागले भूलवश अम्बे कम्प्लेक्सको नाम समावेश भएको भन्दै प्रस्टीकरण दिएको थियो । विभागका अनुसार आइतबारसम्ममा जिग्मी सिग्मी पर्वल विष्ट, बुद्ध महल, केशा प्रोपर्टिज प्रालि, सुरज आर्केड, बैसाली होटल प्रालि, राजेन्द्रकुमार काँवरा, होटल मर्स्याङ्दीले पूरा कर चुक्ता गरेका छन् ।

त्यस्तै, एनआरटी क्लब, युनाइटेड वर्ल्ड ट्रेड सेन्टर, काठमाडौं इन्जिनियरिङ कलेज, एलआरआई बोर्डिङ स्कुल, जनमैत्री अस्पताल, प्रवीणबहादुर केसी, स्टार मल, केजे प्रोपर्टिज प्रालि (गोपालजी प्रोपर्टिज) ले आंशिक कर तिरेका छन् । त्यसबापत ३ करोड ९४ लाख ९ हजार ६ सय ९८ रुपैयाँ कर संकलन भएको छ । स्वास्थ्य राज्यमन्त्री उमेश श्रेष्ठको लगानी रहेको जनमैत्री अस्पतालले नै आंशिक मात्रै कर बुझाएको छ ।

महानगरको राजस्व ऐनको दफा १२ (३) मा उपदफा २ बमोजिम कर रकमको वार्षिक १० प्रतिशत जरिवाना, सेवा बन्द गर्ने, सम्पत्ति रोक्का गर्नेलगायत कार्य गरी तिर्न बाँकी रकम सरकारी बाँकीसरह असुल गर्न सकिने व्यवस्था छ । तर महानगरले आफैंले बनाएको ऐनअनुसार पनि कर असुल गर्न सकेको छैन । महालेखा परीक्षकको प्रतिवेदनले महानगरले १ सय ६३ करदाताबाट २५ करोड १९ लाख ४१ हजार ६ सय ७८ रुपैयाँ असुल गर्नुपर्ने उल्लेख गरेको छ । प्रतिवेदनअनुसार सबैभन्दा बढी भाटभटेनी सुपर मार्केट एन्ड डिपार्टमेन्टल स्टोर प्रालिबाट ०७६/७७ सम्मको ४ करोड ४५ लाख २६ हजार ४ सय ६० असुल गर्नुपर्ने औंल्याएको छ ।

महानगरले कर असुलीलाई तीव्रता दिन गत वर्ष असोजदेखि अनलाइन भुक्तानी प्रणाली सञ्चालनमा ल्याएको छ । विभागका अनुसार उक्त प्रणालीमा हालसम्म २ लाख ५ हजार करदाता जोडिएका छन् । तर पनि पुरानो बक्यौता असुली सन्तोषजनक नभएको भन्दै नौमती बाजा अभियान नै चलाइएको थियो ।

तर त्यसको पनि परिणाम उत्साहजनक देखिएन । विभाग प्रमुख डा. शिवराज अधिकारीले फोहोर व्यवस्थापनमा भएको ढिलाइले महानगरप्रति स्थानीयहरूमा नकारात्मक धारणा बनेका कारण पनि कर असुली अभियानले अपेक्षाकृत उपलब्धि हासिल गर्न नसकेको दाबी गरे । ‘फोहोर र कर उठाउने विभाग नै फरक छ । आ–आफ्नो जिम्मेवारी हुन्छ तर महानगबासीले दुवैलाई एकै ठाउँमा राखेर हेर्दा कर उठाउन सकेनौं,’ उनले भने ।

प्रकाशित : भाद्र २८, २०७८ ०५:५६
प्रतिक्रिया
पठाउनुहोस्

उपत्यकाका बन्द होटलका श्रमिकलाई ५५ लाख बाँडिँदै 

कान्तिपुर संवाददाता

काठमाडौँ — कोरोना माहामारीका कारण होटल बन्द हुँदा जीविकोपार्जनमा कष्ट व्यहोरिरहेका काठमाडौं उपत्यकाका होटल मजदूरलाई राहतस्वरुप ५५ लाख रुपैयाँ वितरण गरिने भएको छ ।

होटलमा काम गरिरहेका ५८ सय हाराहारी मजदूर तथा कर्मचारीलाई लक्षित गर्दै पर्यटकीय सम्पदा, स्थल, उद्यान, पर्यटकीय मार्ग, ऐतिहासिक महत्वका स्थलहरु सफाई गराएर होटल श्रमिकलाई ५५ लाख रुपैयाँ वितरण गर्न लागिएको हो ।

कार्यक्रमको सुरुवात आइतबार त्रिभुवन अन्तर्राष्ट्रिय विमानस्थल प्रवेश गर्ने मूलगेटबाट गरिएको छ । कार्यक्रमका लागि संयुक्त राष्ट्र संघीय विकास कार्यक्रम (यूएनडीपी), नेपाल पर्यटन बोर्ड र होटल संघ (हान) समन्वय गरेका छन् । ‘दीगो पर्यटन परियोजनाअन्तर्गत कोभिड–१९ का बाट अतिप्रभावित होटल उद्योगबाट रोजगारी गुमाएका श्रमिकहरुलाई लक्षित गरी यो कार्यक्रम होटल संघ नेपाल र नेपाल पर्यटन बोर्डबीच सम्झौता भएअनुसार काठमाडौं महानगरपालिकासँगको समन्वयमा सुरु भएको छ’, हानले आइतबार जारी गरेको विज्ञप्तिमा भनिएको छ ।

हानका प्रथम उपाध्यक्ष विनायक शाहले ‘कोभिड प्रभावित श्रमिकहरुलाई दसैं अगाडि केही राहत दिने उदेश्यले काठमाडौं उपत्यकाका पर्यटकीय स्थल, मठमन्दिर तथा बाटो घाटो सरसफाई र हरियाली गर्ने’ उद्देश्य यस कार्यक्रमको रहेको बताए । हानका अनुसार, यस कार्यक्रमको श्रम दिन पाँच हजार रहेको छ । एउटा श्रमिकले बढीमा ४० दिन काम गर्न पाउने छन् । यसमा प्रतिदिन १ हजार ज्याला दिइने छ । यसको संयोजन हानले गर्ने जनाएको छ ।

होटल बन्द भएर बेरोजगार भएका सुपरभाइजर मुनीका भान्से, सुरक्षागार्ड, हाउसकिपर, सहयोगी, माली, सफाई कामदार, वेटर आदिले यसमा भाग लिन पाउने छन् । श्रमिकहरुले काठमाडौं उपत्यकाभित्र सम्पदा सरसफाई, पार्क गोडमेल, घाँस काट्ने आदिमात्रै गर्ने छन् । श्रमिक छनोटको जिम्मा कांग्रेस, एमाले र माओवादी निकट होटल मजदूरका केन्द्रीय संगठनलाई दिइएको हानले जनाएको छ ।

प्रकाशित : भाद्र २७, २०७८ २२:३३
पूरा पढ्नुहोस्
प्रतिक्रिया
पठाउनुहोस्
×