पाटन अस्पतालमा आईसीयू बेड अभाव- उपत्यका - कान्तिपुर समाचार
कान्तिपुर वेबसाईट
AdvertisementAdvertisement

पाटन अस्पतालमा आईसीयू बेड अभाव

जटिल खालका संक्रमित फर्कंदै,   महँगो शुल्क तिरेर निजीमा उपचार
प्रशान्त माली

ललितपुर — पाटन अस्पतालमा कोभिड–१९ का बिरामी बढ्न थालेपछि आईसीयू बेडको अभाव भएको छ । आईसीयूमा भर्ना गरेर उपचार गर्नुपर्ने बिरामी धमाधम फर्किन बाध्य भएका छन् । 


आमालाई आईसीयूमा राखेर उपचार गर्नुपर्ने भए पनि बेड खाली नभएको भन्दै अस्पतालले भर्ना लिन नमानेको सिन्धुपाल्चोकका चिरञ्जीवी ढुंगानाले बताए । ‘बिहीबार अचानक ज्वरोले थला पर्नुभएको थियो, श्वासप्रश्वासमा पनि समस्या देखापरेपछि पाटन अस्पताल ल्याइयो,’ उनले भने, ‘महँगो खर्च तिरेर निजी अस्पतालमा उपचार गराउन बाध्य भएका छौं ।’

धापाखेलका मानबहादुर बस्नेतले पनि यही पीडा भोगे । उनका आमाबुबालाई कोरोना संक्रमण भयो । आमालाई श्वास फेर्न गाह्रो भएपछि उनले पाटन अस्पताल पुर्‍याएका थिए । तर आईसीयू बेड नपाउँदा निजी अस्पतालमा उपचार गराइरहेका छन् । उनको बुबाको भने होम आइसोलेसनमा उपचार भइरहेको छ ।

अस्पतालमा भेन्टिलेटर १७ र आईसीयू बेड २१ वटा छन् । कोभिड–१९ को दोस्रो लहर चल्न थालेपछि संक्रमितको संख्या प्रत्येक दिन बढ्दै जाँदा नयाँ बिरामीले आईसीयू बेड पाउन छाडेका छन् । ‘बिरामीको संख्या बढ्दै गएकाले आईसीयू र भेन्टिलेटर पाउन मुस्किल परेको हो,’ पाटन अस्पतालका निर्देशक डा.रवि शाक्यले भने, ‘तर बिरामीलाई सधैंभरि आईसीयूमा राखेर उपचार गर्नुपर्ने अवस्था हुँदैन ।’ नयाँ आईसीयू खरिद गरेर तुरुन्तै स्थापना गरिहाल्न सक्ने अवस्था नभएको उनले बताए ।

‘कोभिडको उपचार गर्न २ सय ६० बेड छुट्याएका छौं,’ उनले भने, ‘बेड क्षमता बढाउन पनि सकिन्छ ।’ अस्पतालमा जम्मा ६ सय ५० बेड छन् । अहिले अस्पतालमा कोभिडका ८० जना बिरामी भर्ना भएका छन् । हाल कोरोनाविरुद्धको खोप लगाउनेको संख्या बढ्न थालेको डा. शाक्यले बताए । ‘दैनिक ८ सयदेखि एक हजार पुगेको छ,’ उनले भने, ‘चैत २५ देखि हालसम्म ६ हजारभन्दा बढीले भ्याक्सिन लगाइसकेका छन् ।’ अस्पतालले अन्य रोगको उपचारका लागि आउने बिरामीमा शंका लागेमा पीसीआर टेस्ट पनि सुरु गरेको छ ।

प्रकाशित : वैशाख ४, २०७८ १०:२३
प्रतिक्रिया
पठाउनुहोस्

परीक्षण गरिएका आधालाई संक्रमण

शंकर आचार्य

पर्सा — पर्सामा कोरोना संक्रमितको संख्या दिनदिनै बढ्दो छ । यहाँ परीक्षण गराउनेमध्ये आधामै संक्रमण पुष्टि भइरहेकाले स्थिति भयावह बनेको छ ।

वीरगन्जको रक्सौल नाकास्थित हेल्थ डेस्कमा शुक्रबार स्वास्थ्य परीक्षण गराउँदै भारतबाट आएका सर्वसाधारण

नारायणी अस्पतालमा बिहीबार ७५ पीसीआर र ३ एन्टिजेनबाट गरी ७८ जनाको स्वाब परीक्षण गरिएकोमा ३८ जनामा कोरोना पुष्टि भएको हो । संक्रमितमध्ये ३१ जना पर्साका, ३ जना बाराका, २ रौतहटका, १/१ जना मकवानपुर र काठमाडौंका छन् । संक्रमितमध्ये २२ पुरुष र १६ महिला छन् । उनीहरू १ देखि ८७ उमेरका छन् ।

नारायणी अस्पतालका कोभिड संयोजक डा. सरोज रोशन दासले सातादेखि संक्रमितको संख्या ह्वात्तै बढेको र दैनिक बढ्ने क्रम जारी रहेको बताए । ‘यसै सातादेखि संक्रमित दर बढेको हो,’ उनले भने, ‘हाल कुल परीक्षणमध्ये झन्डै आधामा संक्रमण पुष्टि हुन थालेको छ ।’

अस्पतालको आईसीयू कक्षमा ३ संक्रमितलाई भर्ना गरी उपचार भइरहेको उनले बताए । उनीहरूलाई श्वासप्रश्वासमा समस्या देखिएकाले अक्सिजन दिएर राखिएको छ । चैतको दोस्रो सातादेखि अस्पतालमा फेरि संक्रमित बढेका हुन् । अस्पतालमा १७ संक्रमित भर्ना भएकोमा ३ जनाको मृत्यु भइसकेको छ । ११ जना निको भएर घर फर्किएका छन् । अस्पतालको आईसीयू र एचडीयू कक्षको क्षमता ३० देखि ३५ जनासम्मको भएकाले तत्कालै संक्रमितको उपचारमा समस्या नरहेको डा. दास बताउँछन् ।

यता, वीरगन्जस्थित नेपाल–भारत सीमामा थप कडाइ गरिएको सीमा प्रहरी चौकी इनर्वाका प्रमुख प्रहरी नायब निरीक्षण पूर्णप्रसाद दाहालले बताए । भारतबाट भित्रिने जो कोहीको पनि यहाँस्थित हेल्थ डेस्कमा स्वास्थ्य परीक्षण गर्न थालिएको उनको भनाइ छ ।

‘यसअघि भारतको अन्य सहरबाट आउनेको मात्र स्वास्थ्य परीक्षण गर्ने गरिएकामा हाल भने भारतबाट भित्रिने सबैको स्वास्थ्य परीक्षण अनिवार्य गरिँदै छ,’ उनले भने, ‘अहिले सीमावर्ती सहर रक्सौलबाट आउनेको पनि स्वास्थ्य परीक्षण हुने गरेको छ, ज्वरो देखिनेको तत्कालै एन्टिजेन परीक्षण गरिन्छ ।’ कोरोनाको दोस्रो लहर सुरु भएयता पर्सामा संक्रमितको संख्या करिब २ सय ५० पुगेको छ । अस्पतालमा गम्भीर खालका संक्रमितलाई मात्र भर्ना गरेर उपचार भइरहेको छ । सामान्य संक्रमित भने होम आइसोलेसनमै छन् ।

प्रकाशित : वैशाख ४, २०७८ १०:२२
पूरा पढ्नुहोस्
प्रतिक्रिया
पठाउनुहोस्
×