मापसेसँगै लागूऔषध सेवनको पनि परीक्षण
काठमाडौँ — प्रहरीले पहिलोपटक र्यापिड टेस्ट किटको प्रयोग गरी लागूऔषध सेवन परीक्षण सुरु गरेको छ । महानगरीय प्रहरी परिसर ललितपुरले आइतबारदेखि र्यापिड टेस्ट किटको प्रयोग गरी सवारी चालकको लागूऔषध सेवनको परीक्षण सुरु गरेको हो ।
प्रहरीले आइतबार ललितपुरका १३ स्थानमा ७ जनामा परीक्षण गर्दा ३ जनामा पोजेटिभ देखिएको जनाएको छ ।
यसअघि मादक पदार्थ सेवनको मात्र चेकिङ मात्र हुँदै आएको थियो । सवारी चालकले मादक तथा लागूपदार्थ सेवन गरी सवारी साधन चलाउनु दुर्घटना बढ्नुको एक कारण रहेको भन्दै र्यापिड टेस्ट गरी लागूऔषध परीक्षणको सुरुवात गरेको जनाएको छ । ‘र्यापिड टेस्ट किटको प्रयोगबाट हुने परीक्षणले गाँजा र अन्य लागूऔषध प्रयोग गरेको तत्काल थाहा पाइन्छ,’ प्रहरी परिसर ललितपुरका प्रवक्ता प्रज्वल महर्जनले भने, ‘त्यस्तो पाइएको खण्डमा अहिले ट्राफिक नियम अनुसार नै कारबाही गरिरहेका छौं ।’ त्यस्तै निरन्तर सेवन गरेको पाइएमा अन्य कानुन पनि आकर्षित हुने उनले बताए ।
मापसे जस्तै लागूऔषध पदार्थको परीक्षणलाई पनि अभियानको रुपमा चलाइने उनले जानकारी दिए । मापसे चेकिङ हरेक व्यक्तिलाई गरेपनि लागूऔषध सेवन त्यसमध्ये शंकापद व्यक्तिलाई मात्र गरिने प्रहरीले जनाएको छ । मोटरसाइकल, ट्रक तथा ट्रिपर र अन्य गाडीलाई समूह विभाजन गरी योजनाबद्ध ढंगबाट छुट्टाछुट्टै ठाउँमा लागूऔषध सेवनको परीक्षण गरिने प्रहरीले जनाएको छ ।
दैनिक परीक्षण नगरिएपनि लागूपदार्थ सेवनको छड्के परीक्षण जुनसुकै समयमा गरिने प्रवक्ता महर्जनले बताए ।
