शय्या विस्तार गर्दै भक्तपुर अस्पताल
भक्तपुर — कोरोना महामारीबीच प्रदेश अस्पतालमा उत्कृष्ट घोषित भक्तपुर अस्पतालले शय्या विस्तार गर्ने भएको छ । चालु आर्थिक वर्षको असार मसान्तभित्र ७५ शय्याको अस्पताललाई २ सय शय्यामा विस्तार गरिने भएको हो । बिरामीको चाप बढेकाले क्षमता विस्तारको तयारी थालिएको मेडिकल सुपरिटेन्डेन्ट डा. सुमित्रा गौतमले बताइन् ।
वाग्मती प्रदेशद्वारा सञ्चालित अस्पतालमा ७५ शययाको एचडीयू, बालबालिकाका लागि ६ शययाको एनआईसीयू तथा ल्याप्रोस्कोपी, सिस्टेस्कोपी, हिस्टेस्कोपी, अर्थोस्कोपी, इन्डोस्कोपीलगायत सेवा विस्तारको तयारी थालिएको हो । नाक, कान, घाँटी, मुटु रोगको ओपीडी सेवा र मुख्यमन्त्री जनता स्वास्थ्य परीक्षण कार्यक्रमलाई परिमार्जनसहित सञ्चालनमा ल्याउने डा. गौतमले बताइन् । अस्पतालमा आईसीयू सेवासमेत सुरु भइसकेको छ । महामारीकै अवधिमा ६ वटा भेन्टिलेटरसहित आईसीयू सेवा थालिएको उनले बताइन् । यहाँ ल्याप्रोस्कोपी सर्जरीसमेत सुरु भएको छ ।
शनिबार अस्पताल अनुगमनमा आएका वाग्मती प्रदेशका मुख्यमन्त्री डोरमणि पौडेलसँग अस्पताल विकास समितिका अध्यक्ष मिलन सुवाल र मेसु डा. गौतमले सेवाग्राहीलाई प्रभावकारी सेवा दिन दरबन्दीका विशेषज्ञ चिकित्सक र कर्मचारी पूर्तिको माग गरे । ‘श्री चन्द्रलोक डिस्पेन्सरी’ को नामबाट १९६१ मा स्थापित अस्पताललाई २०६० सालमा ७५ शययाको बनाइएको हो ।
प्रकाशित : फाल्गुन ८, २०७७ २०:३२