चन्द समूहका काठमाडौं सेक्रेटरीसहित तीन पक्राउ- उपत्यका - कान्तिपुर समाचार
कान्तिपुर वेबसाईट
AdvertisementAdvertisement

चन्द समूहका काठमाडौं सेक्रेटरीसहित तीन पक्राउ

कान्तिपुर संवाददाता

काठमाडौँ — नेत्रविक्रम चन्द नेतृत्वको नेकपाका काठमाडौं सेक्रेटरी विपिन भनिने भीमसेन घिमिरेसहित तीन जना काठमाडौंको टोखाबाट पक्राउ परेका छन् । 

प्रहरी प्रधान कार्यालय विशेष ब्युरो र महानगरीय प्रहरी परिसर काठमाडौंको संयुक्त टोलीले घिमिरेसहित काठमाडौं सदस्य हरिबहादुर चन्द र वीरेन्द्रबहादुर शाहीलाई पक्राउ गरेको हो । उनीहरूको साथबाट चन्दा रसिद, चन्दा असुलेको अर्धकट्टी बुक र भूमिगत तथा हिंसात्मक गतिविधि सञ्चालनसम्बन्धी गोप्य कागजात पनि बरामद गरिएको प्रहरीले जनाएको छ । हजारदेखि लाख रुपैयाँसम्मका केही चन्दा रसिद बरामद भएको छ भने यसअघि चन्दा असुल गरिएका अर्धकट्टीमा रकम खुलाइएको छैन ।

परिसर प्रवक्ता डीएसपी प्रमेश विष्टले तीनै जनाविरुद्ध जबर्जस्ती चन्दा असुलमा संलग्न रहेको कसुरमा पक्राउ गरिएको र अदालतले ५ दिन थुनामा राखेर अनुसन्धान गर्न अनुमति दिएको बताए ।

प्रकाशित : पुस २३, २०७७ २०:४६
प्रतिक्रिया
पठाउनुहोस्

पाइलट तथा उड्डयनकर्मीलाई जहाजमा फोटो–भिडियोग्राफीमा रोक

सुरज कुँवर

काठमाडौँ — उडान सुरक्षामा असर पर्ने कारण देखाउँदै नागरिक उड्डयन प्राधिकरणले नियमित उडानमा संलग्न हुने नेपाली वायुसेवाका सबै साना ठूला विमानका चालक लगायत उड्डयनकर्मीलाई उडानका क्रममा फोटो तथा भिडियोग्राफी गर्न रोक लगाएको छ ।

प्राधिकरण मातहतको फ्लाइट सेफ्टी स्ट्यान्डर्ड विभागले पुस १५ गते उडान सञ्चालन मापदण्ड संशोधन गर्दै उडानका क्रममा वायुयानको चालक कक्ष (ककपिट) तथा बोर्डमा पाइलट, एयर होस्टेस, इन्जिनियर, टेक्निसियन तथा फ्लाइट डिस्प्याचर र ककपिटको जम्पसिटमा बस्ने तेस्रो चालक वा प्राविधिकलाई लागू हुने गरी कुनै पनि प्रकारका यन्त्र तथा उपकरणबाट फोटो र भिडियो नखिच्न कडाइ गरेको हो ।

‘उडानमा स्टरायल ककपिट भन्ने एउटा नियम छ । त्यो भनेको खास उडानको समयमा कुनै पनि गतिविधिहरु नहुन जसका कारण पाइलटहरुको ध्यान नभाँडिओस् भन्ने हो,’ प्राधिकरणका महानिर्देशक राजन पोखरेलले भने, ‘यो नियम भारत लगायतका विभिन्न मुलुकमा छ । हाम्रोमा पछिल्लोपटक जहाजका गतिविधिहरु समेटेर भिडियो बनाउने,युट्युबमा राख्ने गतिविधि देखिएकाले रोक लगाउनु परेको हो ।’

प्राधिकरणले यदि कुनै पनि चालक दलका सदस्यलाई फोटो तथा भिडियोग्राफी गर्नु पर्ने आवश्यकता भएमा उडानअघि महानिर्देशक वा अन्य सरोकारवाला अधिकारीसँग लिखित अनुमति लिन सकिने भनेको छ । तर, अनुमति बिना गरिने फोटो तथा भिडियोग्राफीमा प्राधिकरणको फ्लाइट सेफ्टी स्ट्यान्डर्ड विभागले कारबाही गर्ने जनाएको छ । विभागले यो नियमबारे नेपालमा दर्ता भएका नौवटा आन्तरिक तथा अन्तर्राष्ट्रिय उडान गर्ने नेपाल वायुसेवा निगम र हिमालय एयरलायन्सलाई पत्राचार गरिसकेको छ ।

यसबारे प्राधिकरणले यसअघि पनि बेला बेला उजुरीका आधारमा चेतवानी दिँदै परिपत्र गर्दै आएको थियो । यसपटक भने मापदण्ड नै संशोधन गर्दै यो नियम लागू गरिएको हो । यसबारे थप विस्तृत नियमहरु पनि चाँडै सार्वजनिक गरिने महानिर्देशक पोखरेलले बताए ।

यसअघि लकडाउनका बेला नेपाल वायुसेवा निगमले अनुमति बिना युट्युब च्यानल सञ्चालन गर्दै आएका एक वरिष्ठ क्याप्टेनमा कोरोना देखिएपछि आफ्ना सबै उडान कर्मचारीलाई भिडियो तथा फोटोग्राफी नगर्न परिपत्र गरेको थियो । निगमको अपरेसन विभागले प्राधिकरणले जारी गरेको नियम उडान सुरक्षाका लागि सकारात्मक भएको उल्लेख गर्दै निर्देशन प्राप्त भएकै दिन उडानमा संलग्न हुने सबै पाइलट, एयरहोस्टेस र प्राविधिकहरुलाई कडाइकासाथ फोटो तथा भिडियोग्राफी नगर्न निर्देशन दिएको जनाएको छ ।

प्राधिकरणले यात्रुहरुका हकमा भने फोटोग्राफी तथा भिडियो खिच्न छुट दिएको छ । पर्यटकीय अवधारणमा सञ्चालित पर्वतीय उडान लगायतमा यात्रुहरुले फोटो तथा भिडियोग्राफी गर्न रोक लगाइएको छैन ।

प्रकाशित : पुस २३, २०७७ २०:३५
पूरा पढ्नुहोस्
प्रतिक्रिया
पठाउनुहोस्
×