गोल्डस्टार जुत्ता अब अमेरिकामा पनि
काठमाडौँ — नेपालमा सर्वाधिक रुचाइएको जुत्ता गोल्डस्टार सुज संयुक्त राज्य अमेरिकामा उपभोक्ताहरूले खरिद गर्ने गरी आधिकारिक रुपमा बजार प्रवेश गरेको छ ।
गोल्डस्टार जुत्ताको निर्माता तथा उत्पादक–वितरक कम्पनी किरण सुज म्यानुफ्याक्चरर्सले संयुक्त राज्य अमेरिकामा आधिकारिक वितरक नियुक्त गरी अमेरिकी बजारमा आफ्नो विक्री–वितरण सुरु गर्ने भएको छ ।
न्यूयोर्कमा आयोजित आधिकारिक कार्यक्रममा किरण सुज म्यानुफ्याक्चरर्सका अध्यक्ष आमिरप्रताप राणाले गोल्डस्टार जुत्ता संयुक्त राज्यभरका निर्दिष्ट स्थानहरूबाट उपलब्ध हुने घोषणा गरे ।
‘हामी संयुक्त राज्य अमेरिकामा संसारकै सबैभन्दा अग्लो स्थानमा बनेका डिजाइन ल्याउने कुरामा गर्व गर्दछौं । गोल्डस्टार व्यापक रूपमै दैनिक रूपमा प्रयोग हुने ब्रान्डका रूपमा परिचित छ । सबै क्षेत्रमा मानिस, सबैजसो आर्थिक अवस्थाका उपभोक्ताहरूले गोल्डस्टारलाई एक किफायती ब्रान्डका रुपमा छनोट गरेका छन्,’ उनले भने ।
