कथाकार भट्टराईको 'फ्राइडे कन्फ्युजन' सार्वजनिक

पत्रपत्रिकाहरुमा कथा लेख्दै आएका भट्टराईले विभिन्न समयमा लेखेका कथा र नयाँ कथाहरुलाई मिलाएर कृतिको रुप दिएका हुन् ।

पुस्तकको लोकार्पण गर्दै आख्यानकार ध्रुवचन्द्र गौतमले नयाँ पुस्तामा लेखन कर्म खस्किइरहेको अवस्थामा नयाँ कथाकारहरु आउनु धेरै राम्रो भएको बताए । उनले भट्टराईको कथा कृतिको लेखनीबारे चर्चा गर्दै राम्रो कथाकारको रुपमा उदय भएको उल्लेख गरे ।

कथा संग्रहमा भूमिका समेत लेखेका गौतमले भने- 'नयाँ कथाकारहरुमा यत्तिको संभावनायुक्त लेखन भएका व्यक्ति कमै भेटिन्छन् त्यसैले आगामी दिनमा अझ राम्रो कृति आउने संभावना छ ।' अर्का साहित्यकार अभि सुवेदीले भट्टरईले कथा संग्रहमा राखेका ६ वटा कथाहरु खाडी मुलुकमा नेपालीहरु बाँचिरहेको जीवनसँग सम्बन्धित रहेकाले त्यहाँको भोगाइबारे आफू परिचित रहेको बताए । उनले मरुभूमि कथा लेख्नेहरुका लागि उर्वरभूमि भएको टिप्पणी गरे ।

कथाकार भट्टराईको यो कृतिमा १८ वटा कथा छन् । उनी कुनै समय आँफै पनि खाडी मुलुकमा रोजगारीका लागि गएका थिए । त्यही रोजगारीमा रहँदा देख भोगेका केही दृश्यहरुलाई कथाको आकार दिएका छन् । उनले त्यसबाहेक अन्य जीवन जगत राजनीतिक विषयवस्तु समेत छोएर लेखेका कथा संग्रहमा छन् ।

पुस्तक सार्वजनिक समारोहमा कथाकार भट्टराईले आफू गणित र लेखा विषयको शिक्षण पेसामा आबद्ध भए पनि घरायसी साहित्यिक वातावरणका कारण नजानिँदो तरिकाले यसमा भिजेको बताए । 'पत्रपत्रिकाहरुमा मात्र लेखेर छापेर खास लेखकको छवि बनाउन गार्‍हो पर्ने रहेछ । त्यसैले मैले पुस्तक नै निकाल्ने निर्णय गरेको हुँ' उनले कृति प्रकाशनको पृष्ठभूमिबारे भने ।

उनले हरेक वर्ष यस्ता कृतिहरु प्रकाशित गर्ने उद्देश्यले रहेको पनि बताए । कार्यक्रममा पुस्तकमा रहेको एउटा कथा 'घोषणा' लाई नाटकको रुपमा मञ्चन गरिएको थियो । शिल्पी थिएटरका कलाकारहरुले मञ्चन गरेको नाटकमा अहिलेको राजनीतिक दलहरुले गरिरहेको भोटको राजनीतिको समसामियक तस्बिर देखाइएको थियो । पुराना र नयाँ राजनीतिक दलहरुको कार्यशैली र एउटा मतदाताले चुनावताका भोग्नुपर्ने मानसिक तनावको चित्र पनि भट्टराईको कथामा छ ।