ओस्करमा अभिनेत्री फ्रान्सेस म्याकडोरमेन्डको 'ह्याट्रिक'- मनोरञ्जन - कान्तिपुर समाचार

ओस्करमा अभिनेत्री फ्रान्सेस म्याकडोरमेन्डको 'ह्याट्रिक'

कान्तिपुर संवाददाता

काठमाडौँ — अभिनेत्री फ्रान्सेस म्याकडोरमेन्डले 'नोम्याडल्यान्ड'बाट यो वर्ष ओस्करमा उत्कृष्ट अभिनेत्रीतर्फको अवार्ड उचालिन् । उनले ओस्करमा उत्कृष्ट अभिनेत्रीको अवार्ड जितेको यो तेस्रो पटक हो ।

यसअघि उनले सन् १९९७ मा 'फार्गो' र सन् २०१८ मा 'थ्री बिलबोर्डस एपिङ मिजोरी'बाट उत्कृष्ट अभिनेत्रीको अवार्ड जितेकी थिइन् । अभिनेत्री क्याथ्रिन हेप्रनले यसअघि चारपटकसम्म यो विधामा अवार्ड पाएकी थिइन् ।

'नोम्याडल्यान्ड'मा म्याकडोरमेन्डले अमेरिकाको आर्थिक मन्दीमा सम्पूर्ण कुरा गुमाएकी ६० वर्षीया महिलाको भूमिका निभाएकी छिन् । यो वर्ष बाफ्टा र गोल्डेन ग्लोब (फिल्म ड्रामा)मा उत्कृष्ट अभिनेत्रीको अवार्ड जितेकी उनले ओस्कारको यो विधामा भायोला डेभिस (मा रेनिज ब्ल्याक बटम), भेनेसा कर्बी (पिसेस अफ अ वुमन) र केरी मलिगन (प्रमिसिङ यङ वुमन) सँग प्रतिस्पर्धा गर्नुपर्‍यो ।

अवार्ड जितिसकेपछि म्याकडोरमेन्डले भनिन्,'म सँग कुनै शब्द छैन । मेरो आवाज तरबारमा छ । तरबार हाम्रो काम हो र मलाई काम मनपर्छ । यो थाहा पाउनु भएकोमा धन्यवाद ।'

सम्बन्धित समाचार

ओस्करमा 'नोम्याडल्यान्ड' ले जित्यो उत्कृष्ट चलचित्र, निर्देशक र अभिनेत्रीको अवार्ड

प्रकाशित : वैशाख १३, २०७८ १०:४७
प्रतिक्रिया
पठाउनुहोस्

उपत्यकामा निषेधाज्ञा लगाउनेबारे छलफल गर्न सीडीओहरूको बैठक बस्दै

कान्तिपुर संवाददाता

काठमाडौँ — सोमबार काठमाडौं, भक्तपुर र ललितपुर जिल्लाका प्रमुख जिल्ला अधिकारीहरूको बैठक काठमाडौं जिल्ला प्रशासन कार्यालयमा बस्दै छ । उक्त बैठकले उपत्यकाका तीनवटै जिल्लामा कहिलेदेखि निषेधाज्ञा लगाउने भन्ने विषयमा निर्णय लिन सक्ने उच्च स्रोतले दाबी गरेको छ ।

ललितपुरका निमित्त सीडीओ ललितकुमार बस्नेतका अनुसार अत्यावश्यक सेवाबाहेकका अन्य सेवा बन्द गर्ने विषयमा छलफल गर्न आइतबार उपत्यकाका तीनवटै जिल्ला प्रशासकहरूको बैठक बसेको थियो । ‘हिजो हामी तीनै जना बसेर के गर्ने भन्नेबारे एक प्रकारको सोच बनाइसकेका छौं । अब आज पनि बैठक छ । हामी बसेर थप निर्णय गर्छौं,’ उनले भने ।

यस्तै भक्तपुर जिल्लाका सहायक सीडीओ मुकेशकुमार केशरीका अनुसार सीसीएमसीको आइतबारको बैठकले गरेको सिफारिसका बारेमा थप निर्णय गर्नका लागि तीनै जना सीडीओहरुको बैठक काठमाडौंमा बस्न लागेको हो ।

उनका अनुसार सबै जिल्लाले के गर्ने भनेर सोमबार दिउँसोसम्म केही निर्णय आउने सम्भावना छ । ‘अवस्था जटिल हुँदै गएको छ । त्यसैले उपत्यकाको हकमा के गर्ने भनेर उहाँहरूले हिजो पनि छलफल गरेर एउटा निर्णय गर्नुभयो,’ उनले भने, ‘आज पनि सीसीएमसीको सिफारिसमा केही निर्णय होला ।’

आइतबार बसेको सीसीएमसीको बैठकले काठमाडौं उपत्यकाको हकमा सक्रिय संक्रमितको संख्या एक हजारभन्दा बढी भए कुनै पनि बेला निषेधाज्ञा जारी गर्न सक्ने अधिकार उपत्यकाका तीनवटै जिल्ला प्रशासन कार्यालयहरूलाई दिएको थियो ।

स्वास्थ्य तथा जनसंख्यामन्त्री हृदयेश त्रिपाठीले दिएको जानकारीअनुसार सोमबार बिहान डी–सीसीएमसीको बैठक बसेर कहिले देखि निषेधाज्ञा जारी गर्ने निर्णय गर्नेछन् । ‘हामीले नयाँ कुनै निर्णय गरेको होइन, ६ गते जारी गरेका आदेशहरुलाई पालना गराउन सिफारिस गरेको मात्रै हो,’ उनले भने, ‘हामीले ६ गते नै अवस्था हेरेर जिल्ला प्रशासनले निर्णय लिन सक्छ भनिसकेका हौं । त्यसैलाई अब कार्यान्वयन गर भनेको हो ।’

मन्त्री त्रिपाठीका अनुसार केही दिनका लागि निषेधाज्ञा जारी हुने भएकाले सर्वसाधारणलाई केही तयारी गर्ने समय पनि दिनुपर्ने भएको बताए । उनका अनुसार डी–सीसीएमसीले काठमाडौं उपत्यकामा वैशाख १५ देखि निषेधाज्ञा लागू गर्न सक्छ । ‘अहिलेलाई निषेधाज्ञा मात्रै हुन्छ । तर, यसले पनि स्थिति नियन्त्रणमा नआउने अवस्था भएको खण्डमा भने लकडाउन नै गर्न जरुरी हुन्छ,’ उनले भने, ‘अहिले हाम्रो लक्ष्य मान्छेको आवागमनलाई मात्रै नियन्त्रण गर्नु हो । त्यो निषेधाज्ञाबाटै सम्भव हुन्छ ।’

प्रकाशित : वैशाख १३, २०७८ १०:४७
पूरा पढ्नुहोस्
प्रतिक्रिया
पठाउनुहोस्
×