ताइवानमाथि चीनले आक्रमण गरे जापान र अमेरिका चुप बस्दैनन् : आबे- विश्व - कान्तिपुर समाचार

ताइवानमाथि चीनले आक्रमण गरे जापान र अमेरिका चुप बस्दैनन् : आबे

कान्तिपुर संवाददाता

काठमाडौँ — जापानका पूर्वप्रधानमन्त्री सिन्जो आबेले चीनले ताइवानमाथि आक्रमण गरे अमेरिका र जापान चुप लागेर नबस्ने चेतावनी दिएका छन् । समाचार संस्था रोयटर्सका अनुसार बुधबार एक थिंक ट्यांकलाई दिएको भर्चुअल भाषणमा आबेले ताइवानको संकट जापानको पनि संकट हुने बताएका हुन् ।

सम्बोधनका क्रममा आबेले भने, 'ताइवानको संकट जापानको पनि संकट हो । यस्तो अवस्थामा जापान-अमेरिका गठबन्धनका लागि पनि संकटकालजस्तै हुनेछ । चिनियाँ राष्ट्रपति सी जिनपिङलाई भ्रम नरहोस् कि अमेरिका र जापानले साथ दिनेछ ।'

गत वर्ष स्वास्थ्यका कारण प्रधानमन्त्री पद छाडेका आबे जापानको सत्तारूढ लिबर डेमोक्रेटिक पार्टीको सबैभन्दा ठूलो गुटका प्रमुख मानिन्छन् । उनी अहिले पनि पार्टीभित्र निकै प्रभावशाली भूमिकामा रहेका छन् ।

चिनियाँ राष्ट्रपति सी चिनफिङले ‘ताइवानसँगको एकीकरण पूरा हुनुपर्ने’ बताउँदै आएका छन् । ‘विभाजन’ लाई विरोध गर्ने चिनियाँ नागरिकको परम्परा रहेको उल्लेख गर्दै उनले एकीकरणमा जोड दिएका छन् । ताइवानले आफूलाई एक सार्वभौम मुलुकका रूपमा मान्छ भने चीनले भने ताइवानलाई भने एक अलग प्रान्तका रूपमा हेर्छ । चीनले बल प्रयोग गरेर एकीकरण गर्ने कुरा भने गरेको छैन ।

चीन र ताइवान

  • चीन र ताइवान सन् १९४० को दशकमा गृहयुद्धका क्रममा विभाजित भएका थिए । चीनले ताइवान कुनै न कुनै रूपमा मेनल्यान्डका रूपमा आओस् भन्ने चाहन्छ ।
  • चीनमा गृहयुद्धका क्रममा चियाङ काई शेकका सैनिक माओ त्से तुङका कम्युनिस्ट सैनिकबाट कुटिएका थिए । चियाङ र उनको कुमिन्ताङ सरकार बाँकी रहेका अधिकारीहरू सन् १९४९ मा भागेर ताइवान पुगेका थिए । धेरै समयसम्म ताइवानमा यही समूहको दबदबा रहेको थियो । स्थानीय नागरिकले सरकार तानाशाही भएकोमा व्यापक विरोध गरेपछि चियाङका छोरा चियाङ चिङ कुओले प्रजातान्त्रीकरणको अभ्यास गरेका थिए ।
  • पछि राष्ट्रपति ली तेङ हुईले संवैधानिक परिवर्तन गर्दै प्रजातान्त्रिक राजनीतिक व्यवस्थातर्फ मुलुकलाई लगेका थिए । उनलाई ताइवानको ‘प्रजातन्त्रका पिता’ पनि भनिन्छ ।
  • ताइवानको आफ्नै संविधान रहेको छ । ताइवानमा प्रजातान्त्रिक तरिकाबाट नेताहरू चुनिन्छन् । ताइवानसँग झन्डै ३ लाख सक्रिय सैनिक रहेका छन् ।
  • ताइवानलाई थोरै मुलुकले मात्रै स्वतन्त्र देशका रूपमा मान्यता दिएका छन् । विश्वका धेरै मुलुकले चिनियाँ सरकारलाई नै मान्यता दिएका छन् । अमेरिका र ताइवानसँग आधिकारिक रूपमा सम्बन्ध स्थापित छैन । तर अमेरिकाले ताइवानले आफ्नो रक्षा गर्न पाउने विषयसँग सम्बन्धित कानुन भने बनाएको छ ।

प्रकाशित : मंसिर १५, २०७८ १०:४९
प्रतिक्रिया
पठाउनुहोस्

जिसस प्रमुख र पूर्वसांसद नै पराजित

मेनुका ढुंगाना

अछाम — मंगलबार सम्पन्न भएको नेपाली कांग्रेस क्षेत्र नम्बर १ को निवार्चनमा महाधिवेशन प्रतिनिधि पदमा चर्चित अनुहार नै पराजित भए । जिल्लामा कांग्रेसका पुराना नेता र महत्त्वपूर्ण जिम्मेवारी पाएका नेताले नै पराजय भोग्नु परेको हो ।

पूर्वसांसद तथा राजदूत बलबहादुर कुवँर र जिल्ला समन्वय समिति अछमका प्रमुख नरबहादुर कुवँर नेपाली कांग्रेसको महाधिवेशन प्रतिनिधिमा पराजित भएका छन् । समन्वय समिति प्रमुख कुवँरले खुलातर्फ उम्मेद्वारी दर्ता गराएका थिए । उनले जम्मा २० मत मात्रै प्राप्त गरे । पूर्वमन्त्री गोविन्दबहादुर शाह र जिल्ला पार्टी सभापति भरतकुमार स्वारले दुई प्यानल बनाएका थिए । तर, उनी कुनै प्यानलमा अटाएनन् । अछामको निर्वाचन क्षेत्र नम्बर १ मा मंगलबार सम्पन्न भएको मत परिणामामा पूर्वराजदूत तथा सांसद कुवँर पनि महाधिवेशन प्रतिनिधिमा पराजित भए । उनी भरतकुमार स्वारको प्यानलबाट चुनाव लडेका थिए । उनले १९३ मत पाए ।

भौतिक रुपमा निर्वाचन क्षेत्रमा नभएका तर, वारेशनामाबाट महाधिवेशन प्रतिनिधिमा उम्मेद्वारी दर्ता गरेका पूर्वआईजिपी मोतिलाल बोहरा विजयी भएका छन् । खस आर्यतर्फबाट उम्मेदवार बनेका पूर्वआईजिपी बोहराले ३४१ मत प्राप्त गरेर विजयी भए । पुराना नेताहरुको कार्यशैली देखेर विरक्त भएका कार्यकर्ताले नयाँ अनुहारबाट केही अपेक्षा गरेको क्षेत्रीय प्रतिनिधिहरु बताउँछन् । विद्यार्थी राजनीतिबाट आएका नयाँ पुस्ताका युवा नेता तपेन्द्र खड्का, नृप साउद, डिवी सुनार, जयन्द्र स्वार, कृष्ण कुवँर लगायतका युवा महाधिवेशन प्रतिनिधिमा विजयी भएका छन् ।

अछाममा संस्थापनको वर्चस्व

अछामका दुई निर्वाचन क्षेत्रमध्ये क्षेत्र नम्बर १ मा तनावपूर्ण अवस्थाका बीच निर्वाचन भएको छ । मंसिर ६ गते क्षेत्रीय अधिवेशनको उद्घाटन भएको थियो । मतगणनाका बेला फर्जि मत खसेको पाइएपछि गणना स्थगित भएर पुनः मतदान गर्ने निर्णय भएको थियो । सुरुको मतदानमा कुनै पनि प्यानल नबनाएर स्वतन्त्र उम्मेदवारी दिएका नेताहरूले पुनः मतदान गर्नुपर्ने अवस्था आएपछि संस्थापन पक्षकै दुई टिम बनाएका थिए ।

पूर्व सूचना तथा सञ्चारमन्त्री गोविन्दबहादुर शाह र कांग्रेस जिल्ला सभापति भरतकुमार स्वारको नेतृत्वमा अर्को टिम बन्यो । तर विजयी भने कुनै एक प्यानल भएनन् । दुई वटै टिमबाट चुनाव जिते । पूर्वमन्त्री शाहले भने आफ्नो टिममा पौडेल पक्ष र गगन थापा पक्षसँग समीकरण गरेका थिए । दुई टिमबाट संस्थापन पक्षका २० जना महाधिवेशन प्रतिनिधिमा विजयी भएका छन् । संस्थापन इतरका ५ जना विजयी भए ।

क्षेत्र नम्बर २ मा संस्थापनका २२ जना र संस्थापन इतरका ३ जना निर्वाचित भएका थिए । दुवै निर्वाचन क्षेत्र भएको अछाममा ४२ जना संस्थापन र ८ जना संस्थापन इतरमा महाधिवेशन प्रतिनिधि विजयी भएका छन् । क्षेत्र नम्बर १ को विवादले जिल्ला अधिवेशन तोकिएको समयमा हुन नसकेको कांग्रेस जिल्ला सचिव नमबहादुर शाहीले बताए । उनका अनुसार अब केन्द्रीय महाधिवेशनपछि मात्रै अछाममा जिल्ला अधिवेशन हुनेछ ।

प्रकाशित : मंसिर १५, २०७८ १०:४४
पूरा पढ्नुहोस्
प्रतिक्रिया
पठाउनुहोस्
×