भारतीय लोकसभाबाट विवादित कृषि कानुन फिर्ता गर्ने विधेयक पारित- विश्व - कान्तिपुर समाचार
कान्तिपुर वेबसाईट
AdvertisementAdvertisement

भारतीय लोकसभाबाट विवादित कृषि कानुन फिर्ता गर्ने विधेयक पारित

कान्तिपुर संवाददाता

काठमाडौँ — भारतीय लोकसभाबाट तीनवटै विवादित कृषि कानुन फिर्ता गर्नेसम्बन्धी विधेयक पारित भएको छ । विपक्षीको हंगामाका बीच लोकसभाबाट ध्वनिमतबाट उक्त विधेयक पारित भएको हो । कांग्रेसलगायतका विपक्षी दलले भने लोकसभामा उक्त विषयमाथि चर्चा हुनुपर्ने माग गरेका थिए ।

कृषिमन्त्री नरेन्द्रसिंह तोमरले लोकसभामा विधेयक पेस गरेका थिए । लोकसभाको प्रक्रिया सुरु हुनेबित्तिकै मन्त्री तोमरले विधेयक पेस गरेका थिए । त्यसअघि कांग्रेस नेता जयराम रमेशले मोदी सरकारले संसद्‍मा बिनाबहस नै उक्त कानुन फिर्ता गर्न चाहेको बताएका थिए ।

१६ महिना जसरी अलोकतान्त्रिक तरिकाले विधेयक ल्याइएको थियो त्यसरी नै फिर्ता लिन खोजिएको आरोप लगाएका छन् । त्यस्तै कांग्रेस महासचिव रणदीप सुरजेवालाले पनि कृषि कानुन फिर्ता लिने प्रक्रियामाथि प्रश्न उठाएका छन् ।

यसअघि गत मंसिर ३ गते भारतीय प्रधानमन्त्री नरेन्द्र मोदीले तीन वटै कृषि कानुन फिर्ता लिने घोषणा गरेका थिए । मोदी सरकारले ल्याएका किसानसम्बन्धी विभिन्न तीन वटा कानुनको विरोधमा एक वर्षदेखि किसानहरु आन्दोलित छन् । उनीहरू संसद्‍बाट कानुन फिर्ताको प्रक्रिया पूरा भएपछि मात्रै आन्दोलन स्थगित गर्ने अडानमा छन् ।

भारतीय किसान युनियनका नेता न्यूनतम समर्थन मूल्यको प्रत्याभूति नभएसम्म आन्दोलन फिर्ता नगर्ने घोषणा गरेका छन् । किसान नयाँ कानुन लागू भएको खण्डमा कृषि क्षेत्रमा कर्पोरेट क्षेत्रको बर्चस्व स्थापित हुने, किसानहरुले आफ्ना उत्पादनको न्यूनतम समर्थन मूल्य(एमएसपी) पनि नपाउने भन्दै चर्को विरोध भएको थियो । ।

विधेयकमा गरिएको व्यवस्थाले राज्यहरुको मण्डीमार्फत् हुने आम्दानी गुम्ने र अन्तत: किसानहरुले न्यूनतम मूल्य पनि नपाउने जिकिर गरेका छन् । साथै नयाँ विधेयकले ठूलो कम्पनीहरुको बर्चस्व स्थापित गर्ने र त्यसले कालान्तरमा साना र गरीब किसानहरुलाई मर्कामा पार्ने दाबी गरिएको छ । त्यतिमात्र होइन, निजी क्षेत्रबाट मण्डीहरु खुल्ने र परम्परागत मण्डीहरु विस्थापित हुन गई किसानहरु कर्पोरेट र ठूला कम्पनीहरुमाथि निर्भर रहनुपर्ने परिस्थिति सिर्जना हुने पनि विरोधीहरुको दाबी छ ।

प्रकाशित : मंसिर १३, २०७८ १३:२२
प्रतिक्रिया
पठाउनुहोस्

मदिरा सेवनबाट आपराधिक घटना बढ्दै

विप्लव महर्जन

सल्यान — केही दिनअघि शारदा नगरपालिका ५ रानीकोटका ३३ वर्षीय शेरबहादुर चन्दको हत्या गरेको आरोपमा प्रहरीले मृतककी भाउजु २६ वर्षीया लक्ष्मी चन्द र २५ वर्षीया राधा पौडेललाई पक्राउ गर्‍यो ।

प्रहरीले अनुसन्धान गर्दै जाँदा मदिरा सेवन गरेर राधा र लक्ष्मीले धारिलो हतियार प्रयोग गरी देवरको हत्या गरेको खुल्न आयो । घटनापछि उनीहरूले प्रमाण नष्ट गर्न देवरलाई घर नजिकै राति नै जलाएका थिए । अहिले दुवैजना प्रहरीको हिरासतमा छन् । प्रहरीले घटनाको थप अनुसन्धान गरिरहेको जनाएको छ ।

जिल्लाको बन्गाड कुपिण्डे नगरपालिका १० माझकाँडाका ५५ वर्षीय नीमबहादुर कुवरले धारिलो हतियार (खुर्पा) प्रयोग गरी २०७८ असोज २६ गते ३३ वर्षीय छोरा रुपलाल कुवरको हत्या गरे । दसैंको समयमा छोराले थोरै मासु दिएको भन्दै झगडा परेको कुरा बाहिरिए पनि छोराले बेलाबेलामा गाली गलौज गरेर मानसिक तनाब दिने गरेको कारण आवेगमा उनले आफ्नै घरमा छोराको हत्या गरेको प्रहरी समक्ष स्वीकार गरे । छोराको हत्यापछि उनी अहिले जेल चलान भएका छन् ।

यस्तै कुमाख गाउँपालिका ५ तिमिलेका ४७ वर्षीय कविराम खड्काले पनि २०७८ कात्तिक २ गते घरायसी विवादका कारण धारिलो हतियार प्रहार गरी ४२ वर्षीया श्रीमती कली खड्काको हत्या गरेका थिए । आर्थिक अवस्था कमजोर भएका कारण श्रीमान र श्रीमतीबीच दैनिक झगडा पर्ने गरेको थियो । श्रीमतीको हत्या गर्नुअघि उनले अत्याधिक मदिरा सेवन गरेका थिए ।

अपराध न्युनिकरणका लागि सम्बन्धित निकायले विभिन्न सचेतनामूलक कार्यक्रम गर्दैआए पनि जिल्लामा गम्भीर प्रकृतिका अपराधका घटना बढ्दैगएको प्रहरीले जनाएको छ । खुला रुपमा पाइने घरेलु तथा सीलबन्दी मदिराका कारण जिल्लामा गम्भीर किसिमका हत्या, बलत्कार, बोक्सीको आरोपमा कुटपिट, अभद्र वयवहार, घरेलु हिंसा जस्ता आपराधिक घटना बढदैगएको प्रहरीको बुझाइ छ ।

जिल्ला प्रहरी कार्यालय सल्यानको तथ्यांक अनुसार जिल्लामा २०७५/७६ मा १ सय ४ आपराधिक घटना भएका थिए । त्यसमध्ये सबैभन्दा बढी हत्या १४, अभद्र व्यवहार २५ र १३ वटा बलत्कारका घटना थिए । ०७६/०७७ मा १ सय २२ घटना भएका थिए । जसमा बलत्कार र उद्योग २६, अभद्र व्यवहार २७, हत्या ४ लगायत अन्य छन् । ०७७/०७८ मा १ सय ३७ घटना भए ।

हत्या १२, हत्याको उद्योग १०, बलत्कार ३०, उद्योग ६ लगायत अन्य छन् । यस्तै आब ०७८/०७९ को चार महिनाको अवधिमा ५० घटना भइसकेका छन् । जसमा कर्तव्य ज्यान ४, ज्यान मार्ने उद्योग ७ र बलत्कार तथा उद्योग १२ छन् ।

सल्यानमा मदिरा सेवनका कारण ८० प्रतिशत गम्भीर र अन्य अपराधका घटना घटेका जिल्ला प्रहरी कार्यालय सल्यानका प्रनाउ सुमित खड्काले बताएका छन् । बैदेशिक रोजगारी, गरिबी र बालविवाहले पनि आपराधिक गतिविधि बढ्दैगए पनि सबैभन्दा बढी मदिरा सेवनकै कारण भएको प्रहरीको तथ्यांक छ । प्रनाउ खड्काका अनुसार मदिरा सेवनका कारण जिल्लामा भएका ८० प्रतिशत अपराधका घटनामध्ये ९० प्रतिशत प्रत्यक्ष र १० प्रतिशत अप्रत्यक्ष छन् ।

जिल्ला प्रहरी कार्यालय सल्यानका सूचना अधिकारी प्रहरी प्रवक्ता प्रहरी निरीक्षक अर्जुन पौडेलका अनुसार पछिल्लो समय पीडित पक्षले धमाधम उजुरी गर्ने क्रम बढेको छ । जसले गर्दा आपराधिक घटना बढेको देखिएको उनको भनाइ छ ।

भौगोलिक रुपमा हेर्दा तुलनात्मक रुपमा विकट क्षेत्रमा मदिराका कारण बढी घटना हुने गरेको तथ्यांक छ । साथै त्यस्ता क्षेत्रका घटना अनुसन्धानमा पनि कठिनाइ हुने प्रहरीले जनाएको छ ।

प्रमुख जिल्ला अधिकारी लक्ष्मीदेवी हुमागाईँले भने प्रहरीको एक्लो अभियानले मात्रै अपराधका घटना कम नहुने बताइन् । ‘आपराधिक गतिविधि नियन्त्रण गर्न जिल्लाका ३४ स्थानमा प्रहरी चौकी, बिट राखेर सुरक्षाको व्यवस्था मिलाइएको छ । प्रहरी परिचालन गरेर मदिरा नियन्त्रणको पनि प्रयास भइरहेको छ’ उनले भनिन् ‘सुरक्षाकर्मीको मात्र एक्लो प्रयासले सम्भब छैन । सरकोकारवाला सबैले साथ दिनुपर्छ ।’

प्रकाशित : मंसिर १३, २०७८ १३:१४
पूरा पढ्नुहोस्
प्रतिक्रिया
पठाउनुहोस्
×