भुटानी पूर्वप्रधानमन्त्रीले शुभकामना दिँदै भने- 'भुटानको दसैं विशेष भएको छ'- विश्व - कान्तिपुर समाचार
कान्तिपुर वेबसाईट
AdvertisementAdvertisement

भुटानी पूर्वप्रधानमन्त्रीले शुभकामना दिँदै भने- 'भुटानको दसैं विशेष भएको छ'

एजेन्सी

काठमाडौँ — भुटानका *पूर्वप्रधानमन्त्री छिरिङ तोब्गेले दसैंको अवसरमा नेपालीसहित नेपालीभाषीहरुलाई शुभकामना व्यक्त गरेका छन् । भिडियो सन्देशमार्फत् उनले शुभकामना दिएका हुन् ।

'महत्वपूर्ण चाड दसैंमा सबै आमा-बुवा, दाजु-भाइ, दिदी-बहिनीमा म र मेरो परिवार हार्दिक मंगलमय शुभकामना व्यक्त गर्दछ । यस विशेष चाडमा सबैको सुख शान्ति र समृद्धिको कामना गर्दछौँ,' तोब्गेले भिडियोमार्फत् भनेका छन् ।

साथै यस वर्ष भुटानको दसैं पर्व विशेष रहेको पनि उनले बताएका छन् । भुटानका राजा-रानीले विवाह गरेको १० वर्षको अवसरमा यस वर्षको दसैं विशेष भएको उनले बताएका छन् ।

'भुटानमा यस वर्षको दसैं विशेष भएको छ । यसपटक श्री ५ महाराजधिराज र महारानीको विवाह भएको १० वर्ष पुगेको छ । उहाँहरुले हामीलाई सुख दिन धेरै मेहनत गर्नुभयो । जसको लागि उहाँहरुलाई हामीले सधैँ धन्यवाद दिएका छौँ । साथै उहाँहरुले हामीलाई राजकुमार दिनुभएकोमा हामी खुसी छौँ,' पूर्वप्रधानमन्त्री तोब्गेले भनेका छन् ।

यस्तै कोभिड महामारीका कारण भेटघाट गर्न र टीका लगाउन सुरक्षित नहुने भएकाले संयम् भएर दसैं मनाउन उनले आग्रह गरेका छन् । कोभिड संक्रमणबाट अति कम क्षति भएका विश्वभरका देशमध्ये भुटान पनि एक हो । पूर्वप्रधानमन्त्री तोब्गेले शुभकामना सन्देशको क्रममा आफ्ना राजाको आशिर्वादका कारण क्षति बढ्न नपाएको बताएका थिए ।

*यस समाचारमा यसअघि भुटानका पूर्वप्रधानमन्त्री छिरिङ तोब्गे हुनुपर्नेमा असावधानीवश् अन्यथा सम्बोधन भएकोले सच्याइएको छ । -सम्पादक

प्रकाशित : आश्विन २९, २०७८ १६:५९
प्रतिक्रिया
पठाउनुहोस्

न्यायको खोजीमा बगिरहेका आँसु [फोटो फिचर]

तस्बिर : प्रकाशचन्द्र तिमिल्सेना

काठमाडौँ — देशभर दसैंको रमझम छ । अधिकांश नेपालीहरु टीका जमरा लगाएर मिठो खाँदै रमाइलो गरिरहेका छन् । नेपालगन्जकी रुबी खान भने विजया दशमीकै दिन काठमाडौंको मुटु मानिने माइतीघर मण्डलामा न्यायको खोजीमा आमरण अनसन बसिरहेकी छन् । प्रहरी हिरासतमै आमरण अनसन बस्न थालेकी रुबीले रिहाइपछि आठौं दिन पनि आमरण अनसन जारी राखेकी छन् ।

उनीसहित गत साता बाँकेदेखि २० दिन हिँडेर आएकाहरु माइतीघरमै धर्ना बसिरहेका छन् । सर्वोच्च अदालतको आदेशपछि बाँकेस्थित हिरासतमा गुपचुप रुपमा राखिएकी खानलाई प्रहरीले बिहीबार रिहा गरेको थियो । प्रहरीको रिहाइपछि खान माइतीघर पुगेर आमरण अनसन बस्न थालेकी हुन् ।

प्रहरीले पूर्वाग्रह राखी खानलाई पक्राउ गरेको ठहर गर्दै सर्वोच्चले रिहा गर्न आदेश दिएपछि उनी बिहीबार नै छुटेकी हुन् ।

बाँकेकी नकुन्नी धोबीको मृत्यु तथा निर्मला कुर्मीको अपहरण गरी हत्या भएको भनिएको घटनामा अनुसन्धान माग गर्दै नेपालगन्जबाट आएको टोलीको नेतृत्व गरेकी रुबी खानलाई जिल्ला प्रहरी कार्यालयको पत्रबमोजिम भन्दै महानगरीय प्रहरी वृत्त सिंहदरबारले पक्राउ गरी गत २३ गते नेपालगन्ज पठाएको थियो ।

तर, अधिवक्ता मोहना अन्सारीले रुबीका तर्फबाट बन्दी प्रत्यक्षीकरणको रिट दायर गरेकी थिइन् । सोही रिटको सुनुवाइका क्रममा न्यायाधीश अनिलकुमार सिन्हाको इजलासले बिहीबार नै खानलाई हिरासतमुक्त गर्न आदेश दिएको हो ।

प्रकाशित : आश्विन २९, २०७८ १६:२८
पूरा पढ्नुहोस्
प्रतिक्रिया
पठाउनुहोस्
×