राष्ट्रपति सीले भने- 'बीआरआई साझेदारको व्यवसाय विस्तारमा चीनको समर्थन'
बेइजिङ — यस वर्षको चिनियाँ अन्तर्राष्ट्रिय सेवा व्यापार मेला शुक्रबारदेखि बेइजिङमा सुरू भएको छ । सेप्टेम्बर ७ तारिखसम्म चल्ने ५ दिने मेलामा नेपालका तर्फबाट बेइजिङस्थित व्यापारीहरूले सहभागिता जनाएका छन् ।
मेलाको उद्घाटन समारोहमा चीनका राष्ट्रपति सी चिनफिङले चीनले अघि सारेको बेल्ट एण्ड रोड (बीआरआई) मा संलग्न मुलुकहरूसँगको सेवा व्यवसायलाई अझ घनिष्ठ पार्दै जाने उद्घोष गरे । उनले भने, ‘बीआरआई परियोजनामा सहभागी मुलुकहरूसित सम्बन्धित सेवाको व्यवसायलाई चीनले अझै समर्थन गर्दै जानेछ ।’
पछिल्लो समय चीनमा कोरोना महामारी पूर्णतः नियन्त्रित अवस्थामा भएपनि स्वास्थ्यसम्बन्धी प्रोटोकल भने कायम राखिएको छ । बेइजिङमै भएको कार्यक्रमलाई सीले भिडियोमार्फत सम्बोधन गरेका थिए । चीनको प्राविधिक विकासको हित विश्वका अरू मुलुकसँग सेयर गर्ने बताउँदै सीले डिजिटल व्यापारिक क्षेत्रको निर्माणमा जोड दिए । खुलापन, सहकार्य, आपसी हित र वीन–वीनको सिद्धान्तमा अडेर सेवा व्यापार विकासका अवसर बाँड्दै विश्व अर्थतन्त्रको पुनरूत्थानमा सक्रिय हुने पनि सीले बताए ।
नेपालको प्रतिनिधित्व गर्दै चीन-नेपाल सांस्कृतिक केन्द्र र हिमालय एयरलाइन्सले नेपाली हस्तकलाका सामग्री, सिंगिङ बाउल, नेपाली उत्पादनहरू, पर्यटकीय प्रवर्द्धन जस्ता गतिविधिहरू प्रदर्शनीमा समेटेका छन् ।
मेलाका दौरान महत्त्वपूर्ण छलफलका सत्रहरू पनि समावेश गरिएको बेइजिङस्थित नेपाली दूतावासका मिनिस्टर छविन्द्र पराजुलीले बताए । शुक्रबार विश्वका पर्यटकीय सहर सम्बन्धी संगठन वर्ल्ड टुरिजम सिटीज फेडरेसनले कोभिडपछिको पर्यटन विषयक छलफल कार्यक्रम संचालन गरेको थियो । विश्वका पर्यटकीय सहरहरूको गठबन्धनमा काठमाडौं पनि सदस्यका रूपमा छ । कोभिडपछि पर्यटनलाई कसरी चलायमान बनाउने र कसरी दिगो विकास गर्ने बारेमा छलफल भएको कार्यक्रममा सहभागी मिनिस्टर पराजुलीले जानकारी दिए । आइतबारको छलफलमा परम्परागत चिनियाँ उपचार पद्धतिलाई कसरी आयुर्वेदसँग जोड्ने लगायत मेला अवधिभर महत्त्वपूर्ण बहस सत्रहरू हुने पनि उनले बताए ।
विशेषगरी यो मेलामा सेवा सम्बन्धी उत्पादन तथा व्यवसायको प्रदर्शन गरिन्छ ।
सेवा व्यापारिक क्षेत्रको सबैभन्दा ठूलो प्रदर्शनी मानिने यो मेला सन् २०१२ देखि हुन थालेको हो । ७ पटक आयोजित यो मेलामा नेपालले पनि भाग लिँदै आएको छ । विश्वका १५३ वटा मुलुक तथा क्षेत्रका १० हजार भन्दा बढी उद्योग व्यवसायले यस पटकको मेलामा भाग लिएका छन् ।
प्रकाशित : भाद्र १८, २०७८ १८:२५