पोर्न फिल्म बनाएको र प्रसारण गरेको आरोपमा राज कुन्द्रा पक्राउ- विश्व - कान्तिपुर समाचार
कान्तिपुर वेबसाईट
AdvertisementAdvertisement

पोर्न फिल्म बनाएको र प्रसारण गरेको आरोपमा राज कुन्द्रा पक्राउ

कान्तिपुर संवाददाता

काठमाडौँ — मुम्बई प्रहरीले बलिउड अभिनेत्री शिल्पा सेट्टीका श्रीमान् तथा व्यवसायी राज कुन्द्रालाई पक्राउ गरेको छ । पोर्न फिल्म बनाएको तथा त्यसलाई अनलाइनमार्फत प्रसारण गरेको आरोपमा उनलाई पक्राउ गरिएको भारतीय सञ्चारमाध्यमले जनाएका छन् ।

राज कुन्द्रा

मोबाइल एपमार्फत फिल्म प्रसारण गरेको आरोपमा कुन्द्रालाई पक्राउ गरिएको मुम्बई प्रहरीले जनाएको छ । ‘यसबारेमा हामीसँग पर्याप्त प्रमाण छन्, थप अनुसन्धान गरिरहेका छौं,’ मुम्बई प्रहरीले प्रेस रिलिजमा भनेको छ । ब्रिटिस रियालिटी सो ‘सेलेब्रिटी बिग ब्रदर’ को २००७ का विजेतासमेत रहेकी शिल्पाका श्रीमान् कुन्द्रा यसअघि पनि पटक–पटक विवादमा मुछिएका छन् । सन् २००५ मा कुन्द्रालाई क्रिकेटमा म्याच फिक्सिङको आरोप लागेपछि क्रिकेटसम्बन्धी सबै प्रकारका गतिविधिमा आजीवन प्रतिबन्ध लगाइएको थियो ।

त्यतिबेला उनले शिल्पासँग मिलेर राजस्थान रोयल्सको व्यवस्थापन गरेका थिए । भारतमा पोर्नोग्राफी उत्पादन र प्रसारण गैरकानुनी मानिन्छ । तर व्यक्तिगत रुपमा पोर्नोग्राफी हेर्नुलाई भने गैरकानुनी मानिदैन । अमेरिका र बेलायतपछि भारतबाट सबैभन्दा धेरै पोर्न फिल्मका दर्शक रहेको बताइएको छ ।

नेपालमा पश्मिना व्यवसायदेखि हिरा व्यापारसम्म

बीबीसी हिन्दीका अनुसार राज कुन्द्राका बुवा बालकृष्ण बेलायतमा बस कन्डक्टरका रुपमा काम गर्थे । सन् १९९४ मा कुन्द्रा व्यवसाय गर्न नेपाल आएका थिए । नेपालमा पश्मिना सलको व्यवसायबाट उनले राम्रो आम्दानी गरेका थिए । त्यसैबाट उनको भाग्य फेरिएको बताइएको छ । उनी नेपालबाट बेलायत फर्केर पश्मिना सल आपूर्ति गर्न थाले । उनले बेलायतका चर्चित फेसन हाउसमा पश्मिना आपूर्ति गरे । पहिलो वर्ष नै उनले पश्मिना व्यवसायबाट २ करोड पाउन्ड कमाएका थिए ।

पश्मिना व्यवसायपछि उनले हिराको व्यापारमा हात हाले । रुस, युक्रेन, यूएईलगायतका मुलुकमा खानी, घरजग्गा र ऊर्जा क्षेत्रमा पनि लगानी गरे । विभिन्न कारणले उच्च शिक्षा हासिल गर्न असमर्थ रहेका कुन्द्राले डेढ लाख रुपैयाँबाट व्यवसाय सुरु गरेका थिए ।

उनले सन् २००९ मा शिल्पा सेट्टीसँग विवाह गरेका थिए । शिल्पा र कुन्द्राका एक छोरा र एक छोरी छन् ।

प्रकाशित : श्रावण ५, २०७८ १३:५६
प्रतिक्रिया
पठाउनुहोस्

रकम अभावमा स्वास्थ्य बिमा प्रभावित

सरकारले माग रकमको आधा पनि उपलब्ध नगराएपछि अस्पताल संकटमा
विनोद भण्डारी

मोरङ — सरकारले समयमा स्वास्थ्य बिमाको रकम उपलब्ध नगराउँदा मोरङका अस्पतालको स्वास्थ्य बिमा कार्यक्रम प्रभावित भएको छ । सरकारी अस्पतालले उधारोमा औषधि ल्याएर बिरामीलाई वितरण गरिरहेका छन् । निजी अस्पतालले पनि उपचार गराएबापतको करोडौं रुपैयाँ नपाएको गुनासो गरेका छन् ।

विराटनगरमा निजीतर्फ नोबेल र विराट शिक्षण अस्पतालले बिमा कार्ड भएका बिरामीको उपचार गर्दै आएका छन् ।
सरकारले सर्वसाधारणलाई स्वास्थ्य बिमा गराएर २०७२ चैतदेखि एक लाख रुपैयाँ बराबरको औषधि र उपचार खर्च निःशुल्क गराउँदै आएको छ । कोसी अस्पतालले बिमा कार्ड भएका बिरामीको उपचार गरेबापत सरकारबाट असारसम्ममा ४ करोड ३४ लाख रुपैयाँ पाउन बाँकी छ ।

सरकारले समयमै रकम उपलब्ध नगराउँदा सेवा सञ्चालनलाई निरन्तरता दिन गाह्रो भएको अस्पतालका मेडिकल सुपरिन्टेन्डेन्ट डा. चुमनलाल दासले बताए । सरकारसँग माग गरेको रकमको आधाभन्दा कम मात्र उपलब्ध गराउँदा अस्पताल आर्थिक रूपमा संकटमा परेको उनको भनाइ छ । एक वर्षयता उपचार र वितरण गरेको औषधिबापतको ४ करोड ३४ लाख रुपैयाँ सरकारबाट लिन बाँकी रहेको उनले सुनाए ।

स्वास्थ्य बिमा कार्ड भएका बिरामीको प्रथम बिन्दु अर्थात् रेफर सेन्टरमध्येको एक पथरी शनिश्चरे नगर अस्पतालले पनि आर्थिक समस्याले सेवा बन्द गर्ने तयारी गरेको छ । रेफर लिन आउने बिरामीको सामान्य परीक्षण गरेर औषधि वितरण गरेबापतको ५५ लाख रुपैयाँ अस्पतालले औषधि सप्लायर्सलाई तिर्न बाँकी छ । नगरका स्वास्थ्य शाखा प्रमुख मुरारी आचार्यका अनुसार औषधि सप्लायर्सलाई ५५ लाख रुपैयाँ तिर्न नसक्दा औषधि नै आपूर्ति हुन छाडेको छ । सरकारसँग ५५ लाख माग गर्दा ९ लाख रुपैयाँ मात्र उपलब्ध गराएको उनले बताए । सप्लायर्सले औषधि आपूर्ति बन्द गरेसँगै अस्पतालले स्वास्थ्य बिमा उपचार सेवा नै बन्द गर्नुपर्ने स्थिति आएको उनको भनाइ छ ।

स्वास्थ्य बिमा कार्ड भएका बिरामीको उपचार र औषधिबापत यहाँको नोबेल शिक्षण अस्पतालले सरकारसँग दुई वर्षको अवधिमा ४० करोडभन्दा बढी रकम लिन बाँकी रहेको जनाएको छ । यति धेरै रकम सरकारसँग बक्यौता राखेर बिमाको उपचार सेवालाई निरन्तरता दिन सक्ने अवस्था नरहेको अस्पताल प्रशासन प्रमुख दीपेश राईले बताए । यो अस्पतालमा दैनिक सात सयभन्दा बढी बिमाका बिरामी परीक्षणका लागि आउने गरेका छन् ।

राईका अनुसार अस्पतालले बिमाका बिरामीको उपचार गरेबापत पाउनुपर्ने रकम माग गर्दा त्यसको आधा पनि उपलब्ध गराउँदैन ।

प्रकाशित : श्रावण ५, २०७८ १३:५६
पूरा पढ्नुहोस्
प्रतिक्रिया
पठाउनुहोस्
×