भारतमा ६३ दिनपछि १ लाखभन्दा कममा कोरोना संक्रमण- विश्व - कान्तिपुर समाचार
कान्तिपुर वेबसाईट
AdvertisementAdvertisement

भारतमा ६३ दिनपछि १ लाखभन्दा कममा कोरोना संक्रमण

भारतमा पछिल्लो २४ घण्टामा ८६ हजार ४ सय ९८ जनामा कोरोना संक्रमण पुष्टि
इकान्तिपुर डेस्क

काठमाडौँ — कोरोना भाइरस महामारीको दोस्रो लहरका कारण अस्तव्यस्त बनेको भारतमा पछिल्ला केही दिनयता संक्रमण घट्न थालेको छ । भारतको स्वास्थ्य तथा परिवार कल्याण मन्त्रालयका अनुसार पछिल्लो २४ घण्टामा ८६ हजार ४ सय ९८ जनामा संक्रमण पुष्टि भएको छ ।

भारतमा ६३ दिनपछि १ लाखभन्दा कममा संक्रमण पुष्टि भएको हो । त्यस्तै सोमबार भारतमा ६६ दिनयताकै कम संक्रमण देखिएको पनि मन्त्रालयले जनाएको छ ।

त्यस्तै पछिल्लो २४ घण्टामा भारतमा १ लाख ८२ हजारभन्दा बढी निको भएका छन् । भारतमा हालसम्म कुल २ करोड ८९ लाख ९६ हजार ४ सय ७३ जनामा संक्रमण पुष्टि भइसकेको छ । त्यस्तै भारतमा संक्रमणमुक्त हुनेको संख्या २ करोड ७३ लाख ४१ हजारभन्दा बढी छ ।

। पछिल्लो २४ घण्टामा भाइरसको संक्रमणका कारण २ हजार १ सय २३ जनाले ज्यान गुमाएका छन् । योसँगै भारतमा हालसम्म कोभिड–१९ को संक्रमणबाट मृत्यु हुनेको संख्या ३ लाख ५१ हजार ३ सय ९ पुगेको छ । भारतमा हाल १३ लाख ३ हजार ७ सय २ जना सक्रिय संक्रमित छन् ।

भारतमा गत मे ७ मा एकैदिन ४ लाख १४ हजार १ सय ८८ जनामा संक्रमण पुष्टि भएको थियो । भारतमा एकैदिन सबैभन्दा बढी मे १९ मा ४ हजार ५ सय २९ जनाको कोरोनाले मृत्यु भएको थियो ।

भाइरस प्रभावित देशहरूको सूचीमा भारत विश्वकै दोस्रो स्थानमा छ । सबैभन्दा बढी प्रभावित अमेरिकामा ३ करोड ३३ लाख ७७ हजारभन्दा बढी संक्रमित छन् । अमेरिकामा कोरोनाबाट करिब ५ लाख ९८ हजार जनाको मृत्यु भएको छ । मंगलबार बिहानसम्म विश्वभर १७ करोड ३५ लाख ४४ हजारभन्दा बढी संक्रमित भइसकेका छन् । तीमध्ये ३७ लाख ३४ हजारभन्दा बढीको ज्यान गएको जोन्स हप्किन्स विश्वविद्यालयले जनाएको छ ।


प्रकाशित : जेष्ठ २५, २०७८ ११:१३
प्रतिक्रिया
पठाउनुहोस्

अन्तर्राष्ट्रिय गोलसंख्यामा सुनील क्षत्रीले मेसीलाई उछिने

इकान्तिपुर डेस्क

काठमाडौँ — भारतीय कप्तान सुनील क्षत्रीले अन्तर्राष्ट्रिय गोल संख्यामा स्टार फुटबल खेलाडी लियोनल मेसीलाई उछिनेका छन् । विश्वकप छनोटअन्तर्गत सोमबार दोहास्थित जसिम बिन हमाद रंगशालामा बंगलादेशविरुद्धको खेलमा २ गोल गर्दै क्षत्रीले मेसीलाई उछिनेका हुन् । 

तस्बिर : भारतीय फुटबल संघ

उक्त खेल भारतले २–० ले जितेको थियो । क्षत्रीको उत्कृष्ट प्रदर्शनमा विश्वकप २०२२ को छनोटमा भारतले पहिलो जित पनि हात पारेको छ । भारतले खेलेका ७ मध्ये यसअघि ३ खेलमा बराबरी र ३ मा हार बेहोरेको थियो । भारतले दुवै गोल दोस्रो हाफमा गरेको हो । खेलको ७९औं र ९२औं मिनेटमा गोल गर्दै कप्तान क्षत्रीले भारतलाई महत्त्वपूर्ण जित दिलाएका हुन् । योसँगै उनले आफ्नो अन्तर्राष्ट्रिय गोल संख्या ७४ पुर्‍याएका छन् ।

सुनील क्षत्रीले यूएईका अली माबखौतलाई पनि गोलसंख्यामा उछिनेका छन् । सन् २००५ को जुन १२ मा पाकिस्तानविरुद्धको खेलमा डेब्यु गरेका उनले अहिलेसम्म ११७ वटा अन्तर्राष्ट्रिय खेल खेलेका छन् । माबखौतले गत हप्ता मात्रै २ गोल गर्दै आफ्नो अन्तर्राष्ट्रिय गोलसंख्या ७३ पुर्‍याएका थिए । समूह ‘ई’ मा रहेको भारत ६ अंकसहित तेस्रो स्थानमा छ । समूहमा कतार २२ अंकसहित पहिलो र ओमान १२ अंकसहित दोस्रो स्थानमा रहेको छ ।

त्यस्तै मेसीले भने गत बिहीबार चिलीविरुद्ध पेनाल्टीमार्फत गोल गर्दै आफ्नो गोलसंख्या ७२ पुर्‍याएका थिए । मेसीले अर्जेन्टिनाबाट १४३ खेल खेलेका छन् । सक्रिय खेलाडीमध्ये भने पोचुर्गलका क्रिस्टियानो रोनाल्डोको नाममा सबैभन्दा बढी १०३ अन्तर्राष्ट्रिय गोल रहेको छ । रोनाल्डोले पोर्चुगलका लागि १७४ खेल खेलेका छन् ।

अहिले खेलिरहेका खेलाडीमध्ये रोनाल्डोपछि सुनील क्षत्री सबैभन्दा अन्तर्राष्ट्रिय गोल गर्ने खेलाडी हुन् । अन्तर्राष्ट्रिय फुटबलमा सबैभन्दा बढी गोल गर्ने खेलाडी भने इरानका अली दाई हुन् । उनले १४९ खेलबाट १०९ गोल गरेका छन् । अन्तर्राष्ट्रिय फुटबलमा सबैभन्दा बढी गोल गर्ने खेलाडीको सूचीमा रोनाल्डो दोस्रो र क्षत्री १०औँ स्थानमा रहेका छन् ।

प्रकाशित : जेष्ठ २५, २०७८ १०:३१
पूरा पढ्नुहोस्
प्रतिक्रिया
पठाउनुहोस्
×