भारतबाट अस्ट्रेलिया फर्कनेलाई जेल हाल्ने नियमको विरोध- विश्व - कान्तिपुर समाचार

भारतबाट अस्ट्रेलिया फर्कनेलाई जेल हाल्ने नियमको विरोध

‘यात्रुहरू कहाँबाट आउँदै छन् भन्ने आधारमै विभेदकारी नीति अवलम्बन गर्नु हुँदैन’
एजेन्सी

क्यानबेरा — भारतबाट फर्कने आफ्ना नागरिकलाई जेल हाल्ने निमय ल्याएपछि अस्ट्रेलिया सरकारको चर्को आलोचना भएको छ । उक्त कदम जातिवादी र मानवअधिकारको ठाडो उल्लंघन भएको जनाउँदै कतिपयले भर्त्सना गरेका छन् । 

अस्ट्रेलियाले सोमबार (मे ३) देखि लागू हुने गरी भारतमा रहेका नागरिक स्वदेश फर्किएमा ५ वर्ष जेल सजाय र ६६ हजार अस्ट्रेलियन डलरसम्म जरिवाना गर्ने नियम ल्याएको हो । अस्ट्रेलियाली स्वास्थ्यमन्त्री ग्रेग हन्टले भारतमा कोरोनाको संक्रमण तीव्र भएकाले कम्तीमा १४ दिन त्यहाँ बसेका व्यक्ति अस्ट्रेलिया फर्के उक्त सजाय गरिने जनाएका हुन् । यसअघि अस्ट्रेलियाले मे १५ सम्मका लागि भारतबाट हुने सम्पूर्ण उडानहरू रोकेको थियो । अस्ट्रेलियाली प्रधानमन्त्री स्कट मरिसनले उक्त कदम जातिवादी भएको आरोपको खण्डन गरेको बीबीसीले जनाएको छ ।

‘एक वर्षअघि चीनको सीमा बन्द गर्ने निर्णय गरेपछि पनि सरकारविरुद्ध यस्तै आरोपहरू लगाइएको थियो,’ सिड्नी रेडियोसँग कुरा गर्दै मरिसनले भने, ‘महामारीमा कुनै राजनीति वा विचारधारा हुँदैन । राजनीतिले केही हुनेवाला छैन किनकि यो भाइरस हो ।’

सरकारको नयाँ नियम कोरोनाकै कारण लागू गरिएको विश्वकै कडा नियम भएको बताइएको छ । उक्त निर्णयले आफ्ना नागरिक देशमा फर्के पनि अपराधी ठहर हुने भन्दै स्थानीय सञ्चारमाध्यमहरूले समाचार सम्प्रेषण गरेका छन् । आजसम्म कुनै पनि मुलुकले आफ्ना नागरिक स्वदेश फर्किएमा जेल सजाय हुने वा जरिवाना हुने नियम लागू गरेका छैनन् । हाल भारतमा करिब ९ हजार अस्ट्रेलियाली नागरिक छन् । तीमध्ये ६ सय जना भाइरसको उच्च जोखिममा रहेका सरकारको अनुमान छ ।

स्वास्थ्यमन्त्री हन्टले आफूहरूको मुख्य उद्देश्य अस्ट्रेलियाली नागरिकलाई कोरोना भाइरसको संक्रमणबाट बचाउनुरहेको बताएका छन् । पछिल्लो समय भारतबाट अस्ट्रेलिया आएका नागरिकमा कोरोनाको संक्रमण उच्च देखिएको छ । स्वास्थ्यमन्त्री हन्टले संक्रमण बढिरहेको देशबाट आउने नागरिकको संख्या बढेको कारण यो नियम लगाउनुपरेको बताएका छन् ।

अस्ट्रेलियामा भाइरसको संक्रमणका कारण हालसम्म ९ सय १० जनाले ज्यान गुमाएका छन् । यो अन्य देशहरूको तुलनामा निकै कम हो । तर पछिल्लो समय भारतबाट अस्ट्रेलिया फर्केका नागरिकहरूमा भाइरस संक्रमणको दर निकै उच्च देखिएको थियो ।

विदेशमन्त्री मरिस पेइनका अनुसार भारतबाट आएका ५७ प्रतिशतभन्दा बढीमा संक्रमण पुष्टि भएपछि सरकार नयाँ नियम ल्याउन बाध्य भएको हो । गत मार्चमा त्यस्तो संक्रमण १० प्रतिशतभन्दा कम थियो । उनले पछिल्लो समय स्वास्थ्य तथा चिकित्सा सेवामा निकै भार परेको जनाइन् ।

तर पनि आफ्नै नागरिकलाई देश फर्कन नदिनु गतल भएको कतिपयको दाबी छ । सिनेटर मेहरिन फारुकीले उक्त नियम ‘पूर्णतः डरलाग्दो र जातिवादी’ भएको ट्वीटरमा लेखेकी छन् । जातीय विभेदसम्बन्धी आयोगका पूर्वआयुक्त टिम साउथफोमासेनले पनि सरकारी कदम उचित मान्न नसकिने जनाएका छन् । उनका अनुसार यसअघि अमेरिका, युरोपेली संघ, यूकेलगायतका देशमा उच्च संक्रमण देखिँदा यस्तो नियम नल्याइएको बताए । ‘यात्रुहरू कहाँबाट आउँदै छन् भन्ने आधारमै विभेदकारी नीति अवलम्बन गर्नु हुँदैन,’ उनले भने ।

अस्ट्रेलियास्थित भारतीय समुदाय पनि नयाँ नियमप्रति आक्रोशित बनेको छ । बीबीसीसँग कुरा गर्दै कतिपयले आफूहरूलाई ‘अपराधी तथा दोस्रो दर्जाको नागरिक’ का रूपमा हेरिएको गुनासो गरेका छन् । अस्ट्रेलियाको जनसंख्याको २.६ प्रतिशत भारतीय मूलका नागरिक छन् ।

त्यस्तै, कानुनविद्हरूले पनि नागरिकलाई देशमा आउन रोक्ने नियम अन्तर्राष्ट्रिय कानुनविपरीत भएको जनाएका छन् । ‘सरकारले यस्ता नियमहरू विभेदकारी छैनन् भन्ने यकिन गर्नुपर्छ र जनस्वास्थ्यमा देखिएको जोखिम रोक्ने कदमका रूपमा उचित उपाय पत्ता लगाउनुपर्छ,’ अस्ट्रेलियाली मानवअधिकार आयोगले भनेको छ ।

प्रकाशित : वैशाख २१, २०७८ ११:५३
प्रतिक्रिया
पठाउनुहोस्

बिल र मेलिन्डा गेट्सले गरे सम्बन्धविच्छेद

कान्तिपुर संवाददाता

काठमाडौँ — बिल गेट्स र मेलिन्डा गेट्सले सम्बन्धविच्छेदको घोषणा गरेका छन् । विवाह गरेको २७ वर्षपछि दुवैले दम्पतीका रुपमा अब सँगै बस्न नसक्ने उल्लेख गर्दै सम्बन्धविच्छेदको घोषणा गरेका हुन् । 

दुवैले सामाजिक सञ्जालमार्फत वक्तव्य जारी गर्दै सम्बन्धविच्छेदको जानकारी दिएका छन् ।

संयुक्त वक्तव्यमा भनिएको छ, ‘हामीलाई अब एक दम्पतीका रुपमा अघि बढ्न सक्दैनौँ भन्ने लागेको छ ।’ सन् १९८७ मा मेलिन्डा र बिलको भेट भएको थियो । बिलको कम्पनी माइक्रोसफ्टमा मेलिन्डा प्रोडक्ट म्यानेजरका रुपमा आबद्ध हुने क्रममा दुवैको भेट भएको हो ।

उनीहरुले सन् १९९४ मा हवाईमा रहेको लानाई आइल्यान्डमा विवाह गरेका थिए । उनीहरुको दुई छोरी र एक छोरा रहेका छन् । त्यस्तै उनीहरुले संयुक्त रुपमा लोककल्याणकारी संस्था बिल एन्ड मेलिन्डा गेट्स फाउन्डेसन चलाउँदै आएका छन् ।

पछिल्लो पटक कोरोना महामारीको रोकथाम र नियन्त्रण तथा खोप अभियानलाई सघाउन फाउन्डेसनले विश्व स्वास्थ्य संगठनलाई करोडौं सहयोग गरेको छ । ‘गम्भीर रुपको सोचविचारपछि हामीले हाम्रो वैवाहिक सम्बन्धलाई टुंग्याउने निर्णय गरेका हौँ,’ वक्तव्यमा भनिएको छ । ‘विगत २७ वर्षमा हामीले ३ जना छोराछोरी हुर्कायौं । एउटा उत्कृष्ट संस्था बनायौं जसले विश्वभरमा मानिसहरुको स्वास्थ्य तथा गुणस्तरीय जीवन बाँच्नका लागि सहयोग गरिरहेको छ ।’

उनीहरुले फाउन्डेसनको अभियानलाई निरन्तरता दिने पनि प्रतिबद्धता जनाएका छन् । ‘हामीले हाम्रो मिसनलाई निरन्तरता दिन्छौं तर हामी अब एक दम्पतीका रुपमा बढ्न सक्दैनौं,’ वक्तव्यमा भनिएको छ ।

आफूहरुले जिन्दगीमा नयाँ बाटो हिँड्न खोजेको र आफ्नो परिवारको निजत्वको सम्मान गर्न पनि उनीहरुले सबैलाई आग्रह गरेका छन् ।

फोर्ब्स म्यागजिनका अनुसार १३४ बिलियन अमेरिकी डलरको सम्पत्तिसहित बिल गेट्स विश्वकै चौथो धनी व्यक्ति हुन् । ६५ वर्षीय बिल गेट्सले लोककल्याणकारी काममा आफूलाई केन्द्रित गर्ने उल्लेख गर्दै गत वर्ष माइक्रोसफ्टको बोर्डबाट राजीनामा दिएका थिए । सन् १९७५ मा बिल गेट्सले कम्प्युटर सफ्टवेयर कम्पनी स्थापना गरेका थिए । जसबाट नै उनले प्रशस्त सम्पत्ति आर्जन गरेका थिए ।

प्रकाशित : वैशाख २१, २०७८ ११:५२
पूरा पढ्नुहोस्
प्रतिक्रिया
पठाउनुहोस्
×